យន្តហោះម៉ាឡេស៊ីត្រូវគ្រាប់មីស៊ីលដែលក្រុមឧទ្ទាមអ៊ុយក្រែនអាចបាញ់ច្រលំ
ក្រុមស៊ើបអង្កេតអន្តរជាតិកំពុងបន្តការងាររុករកភស្តុតាងនៅទីកន្លែងផ្ទុះធ្លាក់យន្តហោះម៉ាឡេស៊ី MH១៧។ សម្មតិកម្មកាន់តែរឹងមាំបង្ហាញថា យន្តហោះត្រូវរងការវាយប្រហារពីគ្រាប់មីស៊ីល។ ប៉ុន្តែ អ្នកជំនាញអន្តរជាតិ ចង់ប្រមូល និងផ្គុំបំណែកយន្តហោះឡើងវិញ និងសិក្សាទៅលើរូបភាពរបស់ផ្កាយរណបដើម្បីបញ្ជាក់ថា តើយន្តហោះពិតជាត្រូវរងគ្រាប់មីស៊ីលមែនដែរឬទេ។
ចុះផ្សាយនៅថ្ងៃ៖
ស្តាប់ - ០២:២៥
ដោយពឹងផ្អែកទៅលើរូបភាពបំណែកយន្តហោះ រប៉ាត់រប៉ាយ ដែលគេឃើញនៅក្នុងសារព័ត៌មានបរទេស ដូចជាThe New York Times និងFinancial Timesអ្នកជំនាញខាងយោធាជាច្រើនបានវាយតម្លៃថា យន្តហោះម៉ាឡេស៊ីដឹកអ្នកដំណើរទំនងត្រូវរងគ្រាប់មីស៊ីលប្រភេទ SA ១១ ដែលគេបាញ់ចេញពីលើដី។ តាមលោកJustin Bronk អ្នកវិភាគរបស់វិទ្យាស្ថានសេវា នៅទីក្រុងឡុងដ៍ ស្លាកស្នាមអំបែងគ្រាប់ដែលនៅដិតជាប់លើបំណែកយន្តហោះម៉ាឡេស៊ី គឺដូចគ្នានឹងស្លាកស្នាមដែលជាឥទ្ធិពលរបស់គ្រាប់មីស៊ីល SA ១១។ ប៉ុន្តែ យ៉ាងណាក៏ដោយ សន្និដ្ឋាននឹងអាចប្រាកដជាងនេះ នៅពេលណាគេអាចប្រមូលបំណែក ផ្គុំតួយន្តហោះ ឡើងវិញ។
តាមអ្នកជំនាញរបស់អាកាសចរណ៍ស៊ីវិលម៉ាឡេស៊ី បំណែកយន្តហោះនឹងបង្ហាញពីព័ត៌មានលម្អិតដែលប្រអប់ខ្មៅមិនអាចផ្តល់បាន។ គេបានអំពាវនាវឲ្យក្រុមស៊ើបអង្កេតចូលទៅរកភស្តុតាងឲ្យបានឆាប់បំផុត ព្រោះថា បើសិនជាក្រុមមនុស្សនាំគ្នាដើរជាន់លុកលុយកាន់តែច្រើននៅកន្លែងផ្ទុះធ្លាក់យន្តហោះ នោះ គេអាចប្រឈមនឹងការបាត់ភស្តុតាងសំខាន់ៗដែរ។
តាមមន្រ្តីជាន់ខ្ពស់របស់ទីភ្នាក់ងារស៊ើបការណ៍សម្ងាត់របស់អាមេរិក អាមេរិកមានរូបភាពផ្កាយរណបដែលបញ្ជាក់ថា យន្តហោះម៉ាឡេស៊ីដឹកអ្នកដំណើរ ២៩៨នាក់ ត្រូវគ្រាប់មីស៊ីលSA ១១ ដែលបាញ់ចេញពីតំបន់គ្រប់គ្រងដោយក្រុមឧទ្ទាមបំបែកទឹកដីអ៊ុយក្រែន។ ដោយសារតែគ្រាប់មីស៊ីលបាញ់ចេញពីតំបន់ក្រុមឧទ្ទាមដូច្នេះ គឺច្បាស់ណាស់ថា គឺក្រុមនេះដែលបាញ់មីស៊ីល ប៉ុន្តែ យ៉ាងណាក៏ដោយ អាមេរិកមិនអាចបញ្ជាក់ថា តើជនណាជាអ្នកបាញ់ឲ្យប្រាកដ ហើយនៅក្នុងគោលដៅអ្វីទេ។
មន្រ្តីស៊ើបការណ៍សម្ងាត់អាមេរិកដែលសុំមិនបញ្ចេញឈ្មោះបានវាយតម្លៃថា ការបាញ់មីស៊ីលសំដៅបំផ្លាញយន្តហោះម៉ាឡេស៊ីអាចធ្វើឡើងកំហុសបច្ចេកទេស គឺ ក្រុមឧទ្ទាមនិយមរុស្ស៊ី ដែលខ្វះសមត្ថភាពប្រើប្រាស់មីស៊ីលដ៏ទំនើបមួយនេះ បាញ់ច្រលំ។ មន្រ្តីអាមេរិកបានលើកឡើងពីកំហុសបច្ចេកទេសដែល អាមេរិក និងរុស្ស៊ីធ្លាប់ធ្វើកន្លងមក ដោយបាញ់ច្រលំទៅលើយន្តហោះដឹកអ្នកដំណើរ របស់អីរ៉ង់ និងអ៊ីតាលី កាលពីឆ្នាំ ១៩៨៣ និង១៩៨៨។
តាមទីភ្នាក់ងារស៊ើបការណ៍សម្ងាត់អាមេរិក រុស្ស៊ីបានបញ្ជូនសព្វាវុធ និងបង្វឹកហាត់ក្រុមឧទ្ទាមអ៊ុយក្រែនឲ្យចេញប្រើអាវុធទំនើបៗរបស់រុស្ស៊ី ក៏ប៉ុន្តែ អាមេរិកមិនច្បាស់ទេថា តើអ្នកជំនាញរុស្ស៊ីមានបានបង្រៀនពួកឧទ្ទាមឲ្យចេះបាញ់គ្រាប់មីស៊ីលSA ១១ដែរឬទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ