វិបត្តិគ្រីមេ នឹងជំរុញឱ្យសហភាពអឺរ៉ុបរួសរាន់ស្វែងរកឯករាជ្យផ្នែកថាមពល ?
ចុះផ្សាយនៅថ្ងៃ៖
ស្តាប់ - ០៤:២៥
វិបត្តិអ៊ុយក្រែន ភាពក្រអើតក្រទមរបស់រុស្ស៊ី ការឈ្លានពានក្រសោបយកគ្រីមេ មកធ្វើជារណបរុស្ស៊ី បាននិងកំពុងដាស់សហភាពអឺរ៉ុប ឱ្យភ្ញាក់ពីភាពដេកដួលពឹងរុស្ស៊ីលើវិស័យថាមពលឧស្ម័ន។ ជំនួបកំពូលសហភាពអឺរ៉ុប ដែលប្រព្រឹត្តទៅនៅថ្ងៃទី ២០ និង២១មីនា នេះ នៅទីក្រុងព្រុចសែល ជាឱកាសមាសសម្រាប់ពន្លឿនដំណើរការស្វែងរកឯករាជភាពផ្នែកថាមពល និងកាត់បន្ថយការនាំចូលឧស្ម័នពីរុស្ស៊ី។ តើទីផ្សារថាមពលអឺរ៉ុបពឹងលើរុស្ស៊ីយ៉ាងណា ? តើអឺរ៉ុបអាចយកអ្វីមកជំនួសថាមពលឧស្ម័នរុស្ស៊ី ? និងដោយវិធីណា ?
តាំងពីមួយសប្តាហ៍មុនការបើកជំនួបកំពូលម្ល៉េះ ដែលក្រុមប្រឹក្សាអឺរ៉ុប បានបង្ហាញកង្វល់យ៉ាងខ្លាំង ចំពោះជោគវាសនានៃការផ្គត់ផ្គង់ថាមពល និងបានអំពាវនាវ ឱ្យប្រទេសជាសមាជិកទាំងអស់ ប្រឹងប្រែងរកដំណោះស្រាយ និង ហ៊ានធ្វើពហិការខ្លះ កាត់បន្ថយការពឹងពាក់រុស្ស៊ី ក្នុងផ្នែកថាមពល ជាពិសេសថាមពលឧស្ម័ន។
ក្នុងពេលបច្ចុប្បន្ននេះ អឺរ៉ុបទាំងមូល ពឹងពាក់យ៉ាងខ្លាំងលើរុស្ស៊ី មានធនធានធម្មជាតិឧស្ម័នយ៉ាងក្រាសក្រែល ! រុស្ស៊ី បានក្លាយជាអ្នកផ្គត់ផ្គង់ឧស្ម័ន ចំណាត់ថា្នក់លេខមួយនៅអឺរ៉ុប។ មួយភាគបួននៃឧម័នហ្កាសប្រើប្រាស់នៅអឺរ៉ុបខាងលិច គឺនាំចូលពីប្រទេសរុស្ស៊ី ហើយសមាជិកសហភាពអឺរ៉ុបខ្លះ ដូចជាប៊ុលហ្ការី ឬប្រទេសក្នុងតំបន់បាល់ទិក ប្រើហ្កាសនាំចូលពីរុស្ស៊ី ស្ទើរតែទាំងស្រុង។ ហ្កាសរុស្ស៊ី ដែលបង្ហូរលក់មកអឺរ៉ុប ប្រមាណ៦០% ត្រូវឆ្លងកាត់ប្រទេសអ៊ុយក្រែន។ អ៊ុយក្រែនដែលមានជម្លោះដោយផ្ទាល់ជាមួយរុស្ស៊ីនោះ ជាកូនបំណុលជំពាក់ថ្លៃហ្កាសម៉ូស្គូវណ្ឌក (១៥៥០លានដុល្លារ)នៅឡើយរហូតមកទល់នឹងពេលនេះម៉ោងនេះ។
រាល់ពេលមានវិបត្តិ មានជម្លោះជាមួយអ៊ុយក្រែន ឬជាមួយអឺរ៉ុប រុស្ស៊ីតែងតែកិកកុកយកហ្កាសមកធ្វើជាអាវុធគំរាម ជាអាវុធការពារមិនខ្លាចការព្រមានអ្វីពីខាងក្រៅសោះ ឬអាចនិយាយបានតាមម្យ៉ាងទៀត ថាអឺរ៉ុប និងអ៊ុយក្រែន មិនសូវហ៊ានក្អក ហ៊ានព្រមានដាក់ទណ្ឌកម្មខ្លាំងអីលើរុស្ស៊ីទេ ព្រោះខ្លាចម៉ូស្គូកាច់បិទទុយយោហ្កាស លែងលក់ឧស្ម័នឱ្យ។ សង្គ្រាមឧស្ម័នអាចនឹងផ្ទុះឡើងជាថ្មីទៀត ! គ្មាននរណាទាន់ភ្លេចឡើយសង្គ្រាមឧស្ម័នពីរលើក នៅឆ្នាំ២០០៦ និង២០០៩ ដែលកាលណោះរុស្ស៊ីបានកាច់បិទបង្អត់ថាមពលហ្កាសនៅអ៊ុយក្រែន។ សង្រ្គាមនោះ ក៏បានធ្វើឱ្យថ្នាក់ដឹកនាំអឺរ៉ុបចាប់ផ្តើមគិតគូរស្វែងរកប្រភពថាមពលថ្មី សម្រាប់មកជំនួសហ្កាសរុស្ស៊ី ខ្លះៗហើយ។ វិបត្តិនៅគ្រីមេ នាពេលនេះ គឺពិតជាឈ្នាន់បន្ថែមល្បឿន ឱ្យការស្វែងរកដំណោះស្រាយកាត់បន្ថយការរំពឹងលើរុស្ស៊ីទៅមុខកាន់តែលឿនប៉ុណ្ណោះ។ គ្រាន់តែចាំមើលថា តើជាអាទិភាពប៉ុណ្ណា ?!
ដំបូងឡើយ សំណុំរឿងស្វែងរកឯករាជ្យផ្នែកថាមពល ពុំមានចែងក្នុងគម្រោងនៃជំនួបកំពូលសហភាពអឺរ៉ុបក្រុងព្រុចសែល ថ្ងៃព្រហស្បតិ៍ និងសុក្រនេះទេ ប៉ុន្តែ ការចូលឈ្លានពាននិងកាន់កាប់ទឹកដីស្វយ័តគ្រីមេជាចំណុះម៉ូស្គូ បានរុញច្រានសហគមន៍អឺរ៉ុបនិងរុស្ស៊ីឱ្យក្លាយជាគូបក្សដិបក្សប្រឈមមុខដាក់គ្នាដោយចំៗតែម្តង។ ដូច្នេះក្រុមប្រឹក្សាអឺរ៉ុប ក៏ត្រូវតែប្តូរយុទ្ធសាស្ត្រប្រជុំឱ្យបានសមស្របទៅតាមកាលៈទេសៈដែរ។
ដើម្បីកាត់បន្ថយភាពអាស្រ័យខ្លាំងលើរុស្ស៊ី ជាពិសេសសម្រាប់បណ្តាប្រទេសនៅប៉ែកខាងកើតអឺរ៉ុប ក្រុមប្រឹក្សាអឺរ៉ុប ចង់ឃើញសហភាពមានប្រភពថាមពលចម្រុះ ច្រើនជាងមុន ពោលគឺបន្តអភិវឌ្ឍន៍ប្រភពថាមពលមិនចេះរីងស្ងួត អភិវឌ្ឍន៍ហេដ្ឋារចនាសម្ព័ន្ធដែលជាគ្រឹះសំខាន់សម្រាប់ភាពរលូននៃការធ្វើឱ្យកាន់តែសម្បូរបែបផ្នែកថាមពល។
ជាក់ស្តែង ការចរចាជាមួយរុស្ស៊ីក្នុងគម្រោងសាងសង់បំពង់បង្ហូរហ្កាស South Stream ប៉ែកខាងត្បូង ព័ទ្ធអ៊ុយក្រែន ក្រោមសមុទ្ទខ្មៅ ដោយឆ្លងកាត់ប្រទេសប៊ុលហ្ការី ស៊ែប៊ី និងហុងគ្រី ដែលនឹងអាចផ្តើមប្រតិបត្តិការនៅឆ្នាំ២០១៨បាន ក្នុងទំហំ១៥%នៃសេចក្តីត្រូវការអឺរ៉ុប ត្រូវទុកចោលអូសតាមពេលវេលាសិន។
អង់គ្លេស និងប៉ូឡូញ បានទាមទារឱ្យមានការអភិវឌ្ឍន៍ថាមពលដើរដោយនុយក្លេអ៊ែរ និងផលិតកម្មឧស្ម័នSchiste។ ឧស្ម័នSchiste ដែលគណៈកម្មការអឺរ៉ុប ទើបបានបោះឆ្នោតអនុម័ត កាលពីថ្ងៃទី ២២មករា ២០១៤ បើកភ្លើងខៀវ ឱ្យប្រទេសសមាជិកអាចមានលទ្ធភាពផលិតទាញយកហ្កាសប្រភេទនេះមកប្រើប្រាស់ ប្រសិនបើអាចគោរពបានទាំងស្រុងគោលការណ៍អនាម័យនិងបិរស្ថានរួម។ ថាមពលឧស្ម័ននេះ បើទោះបីមានផលិតកម្មយ៉ាងពេញទំហឹងនៅសហរដ្ឋអាមេរិកមែន ប៉ុន្តែនៅអឺរ៉ុបវិញមានការប្រទាញប្រទង់គ្នាខ្លាំង លើវិធីទាញបូមយកឧស្ម័ន ព្រោះយល់នាំឱ្យខូចបរិស្ថានខ្លាំង។
ចំណែកសហរដ្ឋអាមេរិក ជាសម្ព័ន្ធមិត្ត ដែលព្រួយបារម្ភដូចគ្នានឹងនយោបាយរុស្ស៊ីលើអ៊ុយក្រែន ក៏យល់ថាការដែលអឺរ៉ុបរំពឹងខ្លាំងលើរុស្ស៊ី រំខានខ្លាំងណាស់ដល់នយោបាយអាមេរិកចំពោះរុស្ស៊ី។ អាមេរិកបានផ្តើមជាសេ្រចពិចារណាលទ្ធភាពលក់ឧស្ម័នអាមេរិក ទៅឱ្យអឺរ៉ុប ដោយបង្ហូរតាមទុយយោឆ្លងកាត់មហាសមុទ្ទអាត្លង់ទិកតែម្តង ព្រោះអាមេរិកជាមហាអំណាចលេខមួយផ្នែកផលិតឧស្ម័នធម្មជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ