សហភាពអឺរ៉ុបសាទរការបោះឆ្នោតនៅកម្ពុជាតែសោកស្តាយចំពោះភាពមិនប្រក្រតីខ្លះ
សហភាពអឺរ៉ុបបានថ្លែងសាទរចំពោះការបោះឆ្នោតដែលបានប្រព្រឹត្តទៅដោយសន្តិភាពកាលពីថ្ងៃទី២៨កក្កដា ប៉ុន្តែ បានសម្តែងការសោកស្តាយចំពោះអាជ្ញាធរដែលមិនបានចាត់វិធានការចាំបាច់នានា ដើម្បីលុបបំបាត់ភាពមិនប្រក្រតីនានា។ សហភាពអឺរ៉ុបបានអំពាវនាវឲ្យភាគីនយោបាយនានា រក្សាស្មារតីសន្តិភាព និងប្រជាធិបតេយ្យឲ្យបាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
នៅក្នុងសេចក្តីថ្លែងការណ៍មួយដែលចេញផ្សាយពីទីក្រុង ព្រុចសែល កាលពីថ្ងៃទី២៩កក្កដា អ្នកនាំពាក្យរបស់លោកស្រី Catherine Ashton តំណាងជាន់ខ្ពស់របស់សហភាពអឺរ៉ុបទទួលបន្ទុកកិច្ចការបរទេសនិងសន្តិសុខ បានថ្លែងសាទរចំពោះប្រជាជនកម្ពុជាដែលបានចូលរួមការបោះឆ្នោតយ៉ាងច្រើនកុះករ ហើយការបោះឆ្នោតនោះប្រព្រឹត្តទៅដោយសន្តិវិធី។ ម្យ៉ាងទៀត យុវជនបានចូលរួមយ៉ាងសកម្មនៅក្នុងយុទ្ធនាការឃោសនាបោះឆ្នោត។ សម្រាប់សហភាពអឺរ៉ុប នេះគឺជាសញ្ញាល្អគួរឲ្យលើកទឹកចិត្ សម្រាប់ប្រជាធិបតេយ្យនៅកម្ពុជា។
ចំណែកឯគណៈកម្មាធិការជាតិរៀបចំការបោះឆ្នោតក៏បានចាត់វិធានការចាំបាច់មួយចំនួន ក្នុងការកែលម្អការងាររបស់ខ្លួន ស្របតាមអនុសាសន៍របស់អ្នកសង្កេតការណ៍សហភាពអឺរ៉ុបកាលពីការបោះឆ្នោតលើកមុន។ យ៉ាងណាក៏ដោយ សហភាពអឺរ៉ុបបានសម្តែងការសោកស្តាយដែលអាជ្ញាធរមិនបានចាត់វិធានការដើម្បីលុបបំបាត់បញ្ហាមួយចំនួនដូចជា បញ្ហាបញ្ជីឈ្មោះអ្នកបោះឆ្នោត ការប្រើប្រាស់ប្រពន្ធ័ផ្សាយព័ត៌មានឲ្យស្មើភាព និងការប្រើប្រាស់ទ្រព្យសម្បត្តិរដ្ឋក្នុងពេលឃោសនារកសំឡេងឆ្នោតពីសំណាក់មន្ត្រីរាជការ និងកងកម្លាំងប្រដាប់អាវុធ។
សេចក្តីថ្លែងការណ៍របស់អ្នកនាំពាក្យតំណាងជាន់ខ្ពស់សហភាពអឺរ៉ុបបន្តថា ដោយផ្នែកលើលទ្ធផលបណ្តោះអាសន្ន គ្រប់ភាគីគួរតែចូលរួមជាវិជ្ជមានក្នុងការកសាងអនាគតប្រទេសជាតិ និងបង្ហាញការប្តេជ្ញាចិត្តប្រកបដោយន័យស្ថាបនាក្នុងការធ្វើកំណែទម្រង់ចាំបាច់នានាក្នុងទិសដៅពង្រឹងដំណើរការលទ្ធិប្រជាធិបតេយ្យនៅកម្ពុជា។ សហភាពអឺរ៉ុបក៏បានសម្តែងក្តីសង្ឃឹមថា រាល់ជម្លោះនានាដែលបញ្ជូនទៅគ.ជ.ប និងរាល់ចំណាត់ការនានានឹងធ្វើឡើងដោយតម្លាភាព និងយ៉ាងឆាប់រហ័ស។ ជាចុងក្រោសហភាពអឺរ៉ុបក៏បានអំពាវនាវឲ្យគ្រប់ភាគីរក្សាឲ្យបាននូវស្មារតីសន្តិភាពនិងប្រជាធិបតេយ្យ។
ទាក់ទងនឹងបញ្ហាដែលសហភាពអឺរ៉ុបលើកឡើងនេះ លោក កុយ គួងអ្នកនាំពាក្យក្រសួងការបរទេសកម្ពុជា បានប្រាប់អ្នកកាសែតនៅព្រឹកថ្ងៃអង្គារទី ៣០ កក្កដាថា រដ្ឋាភិបាល បានឆ្លើយតបទៅសហភាពអ៊ឺរ៉ុបវិញហើយតាមរយៈកំណត់ទូត កាលពីថ្ងៃទី២៧ មិថុនាកន្លងទៅ។ កំណត់ទូតដែលបង្ហាញពីគោលជំហរបស់រដ្ឋាភិបាលកម្ពុជា ថា កម្ពុជាមិនអាចទទួលយកបានទេ នូវសេចក្តីថ្លែងការណ៍របស់សហភាពអ៊ឺរ៉ុប ក្នុងឋានៈជារដ្ឋឯករាជ្យ។ ហើយថា ការបោះឆ្នោតនៅកម្ពុជា តែងតែប្រព្រឹត្តទៅដោយសេរី មានតម្លាភាព និងជាការបោះឆ្នោតបែបប្រជាធិបតេយ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ