តំណាងគណបក្សសង្គ្រោះជាតិ ត្រៀមជួបអាជ្ញាធររាជធានីភ្នំពេញ នៅរសៀលនេះ
នៅរសៀល ម៉ោង ៣ និង ៣០ នាទី ថ្ងៃសុក្រ ទី១៨តុលានេះ អាជ្ញាធររាជធានីភ្នំពេញ នឹងជួបប្រជុំជាមួយតំណាងគណបក្សសង្គ្រោះជាតិ អំពីគម្រោងធ្វើបាតុកម្មជាថ្មី របស់បក្សប្រឆាំងរយៈពេល ៣ថ្ងៃ ចាប់ពីថ្ងៃទី២៣តុលា។ គណបក្សសង្រ្គោះជាតិ កាលពីថ្ងៃទី១៦តុលា បានផ្ញើលិខិតមួយ ជូនអភិបាលរាជធានីភ្នំពេញ ស្តីពីការធ្វើមហាបាតុកម្មអហិង្សា នៅទីលានប្រជាធិបតេយ្យ និងការដង្ហែក្បួនបាតុកម្មដោយសន្តិវិធី នៅថ្ងៃទី២៣-២៤-២៥ខែតុលាខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ជាមហាបាតុកម្មអហិង្សា ដែលនឹងប្រព្រឹត្តទៅចាប់ពីវេលាម៉ោង ៧ព្រឹក នៅថ្ងៃទី២៣តុលា ដល់វេលាម៉ោង ៦ល្ងាច ថ្ងៃទី២៥ ខែតុលា ឆ្នាំ២០១៣ នៅទីលានប្រជាធិបតេយ្យ ដោយមានការសម្តែងមតិរបស់បាតុករ ការសម្តែងសិល្បៈ ចម្រៀង និងការបញ្ចាំងខ្សែភាពយន្តឯកសារ ការអង្គុយដោយស្ងៀមស្ងាត់ និងការដង្ហែក្បួនយកញត្តិទៅប្រគល់ជូនអង្គការសហប្រជាជាតិ តាមរយៈឧត្តមស្នងការអង្គការសហប្រជាជាតិ ទទួលបន្ទុកសិទ្ធិមនុស្សប្រចាំនៅកម្ពុជា និងស្ថានទូតនានា ដូចជា៖ ស្ថានទូតបារាំង ជប៉ុន សហរដ្ឋអាមេរិក ចិន ឥណ្ឌូនេស៊ី អង់គ្លេស និងស្ថានទូតអូស្រ្តាលី។
តាមលិខិតដដែលនោះ មហាបាតុកម្ម ដែលដឹកនាំដោយលោកសមរង្ស៊ី និងលោក កឹមសុខា ដោយមានរៀបចំធ្វើវេទិកា និងរោងសម្រាប់បាតុកម្មស្នាក់នៅនោះ ដើម្បីស្វែងរកការពិត និងយុត្តិធម៌ជូនប្រជាពលរដ្ឋ ពាក់ព័ន្ធនឹងភាពមិនប្រក្រតី នៃការបោះឆ្នោត និងទាមទារឲ្យរដ្ឋាភិបាល គោរព និងអនុវត្តឲ្យបានពេញលេញតាមកិច្ចព្រមព្រៀង ទីក្រុងប៉ារីស ថ្ងៃទី២៣តុលា ឆ្នាំ១៩៩១ ព្រមទាំងធានាឲ្យមានការគោរពសិទ្ធិមនុស្ស និងអនុវត្តឲ្យបានត្រឹមត្រូវ តាម គោលការណ៍ប្រជាធិបតេយ្យ សេរី ពហុបក្ស ដូចមានចែងនៅក្នុងរដ្ឋធម្មនុញ្ញ នៃព្រះរាជាណាចក្រកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ