សង្គមស៊ីវិលព្រួយបារម្ភពីការគុំកួនគ្នាក្រោយការបោះឆ្នោត
នៅថ្ងៃចន្ទនេះ ក្រុមអង្គការសង្គមស៊ីវិលដែលបានប្រមូលផ្តុំគ្នា ក្រោមស្លាក គណៈកម្មាធិការប្រព្រឹត្តិកម្ម បានចេញសេចក្តីថ្លែងការណ៍មួយ ដោយសម្តែងការព្រួយបារម្ភយ៉ាងខ្លាំង ចំពោះបញ្ហាបំភិតបំភ័យ ការគុំកួន ការគំរាមកំហែងក្នុងចំណោមប្រជាពលរដ្ឋមួយចំនួនក្រោយការបោះឆ្នោត។
ចុះផ្សាយនៅថ្ងៃ៖ កែប្រែថ្ងៃទី៖
ក្រុមសង្គមស៊ីវិលទាំងនោះអះអាងថា បញ្ហាហិង្សាដោយពាក្យសម្ដីកំពុងកើតឡើងពីក្រុមគាំទ្រគណបក្សនយោបាយមួយ ទៅគណបក្សនយោបាយមួយផ្សេងទៀត ពិសេសការគំរាមកំហែងពីមន្ត្រីថ្នាក់មូលដ្ឋាន ដូចជាមេភូមិ មេឃុំ និងអាជ្ញាធរមួយចំនួន ដែលមាននិន្នាការគាំទ្រគណបក្សកាន់អំណាច បានគំរាមទៅលើសកម្មជនគណបក្សប្រឆាំង បន្ទាប់ពីការបោះឆ្នោត ។
សេចក្តីថ្លែងការណ៍បន្តថា ប្រជាពលរដ្ឋនៅតំបន់មួយចំនួនកំពុងទទួលរងការគំរាមកំហែង និងការវាយប្រហារពាក្យសំដីពីសំណាក់អាជ្ញាធរមានសមត្ថកិច្ច ដោយសារតែអាជ្ញាធរទាំងនោះបានចោទប្រកាន់ពួកគេថា មិនបានបោះឆ្នោតជូនគណបក្សប្រជាជនកម្ពុជា។
សង្គមស៊ីវិលទាំងនោះបានហៅទង្វើបែបនេះថា ជាសកម្មភាពរំលោភច្បាប់និងរំលោភសិទ្ធិរបស់ពលរដ្ឋដែលស្ថាប័នពាក់ព័ន្ធត្រូវតែចាត់វិធានការជាបន្ទាន់ ក្នុងការទប់ស្កាត់ក៏ដូចជាការដាក់ពិន័យដល់ជនដែលបានប្រព្រឹត្ត។
ក្រុមអង្គការសង្គមស៊ីវិលទាំងនោះបានស្នើឲ្យគណបក្សជាប់ឆ្នោតទាំងពីរធ្វើសេចក្តីប្រកាសជម្រាបជូនអ្នកគាំទ្ររបស់ខ្លួន កុំឲ្យប្រព្រឹត្តបែបនេះ និងសុំឲ្យក្រសួងមហាផ្ទៃចាត់វិធានការទប់ស្កាត់ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ