គណបក្សសង្គ្រោះជាតិបរាជ័យនៅក្រុមប្រឹក្សាធម្មនុញ្ញ
នៅថ្ងៃទី៣១ សីហានេះ គឺជាលើកទី១ហើយដែលក្រុមប្រឹក្សាធម្មនុញ្ញ បានបើកសវនាកាលើកទី១របស់ខ្លួនដើម្បីដោះស្រាយបណ្តឹងស្តីពីភាពមិនប្រក្រតីនៃការបោះឆ្នោត និងបណ្តឹងទាស់នឹងលទ្ធផលបោះឆ្នោតរបស់គណបក្សសង្គ្រោះជាតិ នៅមណ្ឌលខេត្តក្រចេះ។ តែទីបំផុតទៅ ក្រុមប្រឹក្សាធម្មនុញ្ញដែលជាស្ថាប័នកំពូលដោះស្រាយបណ្តឹងបោះឆ្នោត នោះ បានសម្រេចតម្កល់សេចក្តីសម្រេចរបស់គ.ជ.ប និងប្រកាសបិទផ្លូវតវាជាស្ថាពរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
ក្នុងសវនាការពេញមួយថ្ងៃនៅក្រុមប្រឹក្សាធម្មនុញ្ញ គណបក្សសង្គ្រោះជាតិដែលជាដើមបណ្តឹងក្នុងសំណុំរឿងប្តឹងទាស់ស្តីភាពមិនប្រក្រក្រតីនៃការបោះឆ្នោត និងបណ្តឹងទាំស់លទ្ធផលបោះឆ្នោតនៅមណ្ឌលខេត្តក្រចេះនោះ បានទទួលបរាជ័យហើយ។ បរាជ័យព្រោះតែក្រុមប្រឹក្សាធម្មនុញ្ញដែលជាស្ថាប័នកំពូលដោះស្រាយភាពបណ្តឹងបោះឆ្នោតនោះ បានចាត់ទុកសេចក្តីសម្រេចរបស់គណៈកម្មាធិការជាតិរៀបចំការបោះឆ្នោត គជបនៅថ្ងៃទី១៥សីហា ថាបានការ និងតម្រូវឱ្យ គ.ជ.ប ត្រូវចាត់វិធានការដាក់ទណ្ឌកម្មលើមន្ត្រីការិយាល័យបោះឆ្នោតទាំង៨ ដែលបានបណ្តាលឱ្យកញ្ចប់សុវត្ថិភាព “ក”ចំហ។ ហើយសវនាការរបស់ក្រុមប្រឹក្សាធម្មនុញ្ញ បានសម្រេចបិទផ្លូវតវាជាស្ថាពរ។
តែយ៉ាងណាក៏ដោយ លោក គួយ ប៊ុនរឿន តំណាងរាស្ត្រ និង ជាអ្នកទទួលបន្ទុកការបោះឆ្នោតរបស់គណបក្សសង្គ្រោះជាតិ បានថ្លែងប្រាប់អ្នកសារព័ត៌មាននៅមុខទីស្នាក់ការក្រុមប្រឹក្សាធម្មនុញ្ញក្រោយការបញ្ចប់សវនាការថា គណបក្សសង្គ្រោះជាតិ មិនអាចទទួលយកបានទេនូវការសម្រេចចិត្តរបស់ក្រុមប្រឹក្សាធម្មនុញ្ញ។ លោក គួយ ប៊ុនរឿន បានបន្តថា គណបក្សសង្គ្រោះជាតិ នឹងងាកមករកភាពយុត្តិធម៌ស្តីពីភាពមិនប្រក្រតីនៃការបោះឆ្នោតនេះទៅកាន់តុលាការជាបន្ត។
សវនាកាលើកទី១របស់ក្រុមប្រឹក្សាធម្មនុញ្ញលើបណ្តឹងគណកប្សសង្គ្រោះជាតិ បានចាប់ផ្តើមតាំងពីម៉ោង៨ និង៣០នាទីព្រឹកនេះ ដោយមានការចូលរួមពីក្រុមប្រឹក្សាធម្មនុញ្ញទាំង៩ រូប ដែលមានលោក ឯក សំអុលជាប្រធាន រីឯដើមបណ្តឹង គឺ គណបក្សសង្គ្រោះជាតិដែលមានសមាសភាព៣រូប គឺលោកកែវ ភីរម្យ និងមេធាវី ជួង ជុងី រួមទាំងលោក មេធាវី កែត ឃី។ ដោយឡែកចុងចោទ គ.ជ.បវិញ មានលោក ម៉ៅ សុភារិទ្ធិ លោក កែវ ផល្លា និង លោក ហាវ៉ាណ ស៊ីវិល័យ។
គួរំលឹកថា គណបក្សសង្គ្រោះជាតិ បានប្តឹង ដោយស្នើឱ្យក្រុមប្រឹក្សាធម្មនុញ្ញបដិសេធសេចក្តីសម្រេចរបស់គណៈកម្មាធិកាជាតិរៀបចំការបោះឆ្នោត (គ.ជ.ប)ដែលសម្រេចមិនដោះស្រាយបណ្តឹងរបស់គណបក្សសង្គ្រោះជាតិនៅមណ្ឌលខេត្តក្រចេះ និងការរាប់សន្លឹកឆ្នោតទាំងអស់នៅទូទាំងមណ្ឌលខេត្តក្រចេះឡើងវិញ រួមទាំងការបើកកាស៊ើបអង្កេតលើការបង្កភាពមិនប្រក្រតី និងការផ្តន្ទាទោសដល់អ្នកប្រព្រឹត្តិដោយយោងទៅតាមច្បាប់ជាដើម។
ប៉ុន្តែលោក នី ចរិយា ប្រធានផ្នែកស៊ើបអង្កេតរបស់អង្គការអាដហុក ដែលបានចូលរួម ស្តាប់សវនារបស់ក្រុមប្រឹក្សាធម្មនុញ្ញដែរនោះ បានឱ្យដឹងថា បើទោះបីជាក្រុមប្រឹក្សាធម្មនុញ្ញផ្តល់ឱកាសដល់ដើមចោទ និងចុងចោទ ឡើងបកស្រាយក៏ដោយ ក៏ការសាកសួររបស់ក្រុមប្រឹក្សាធម្មនុញ្ញ មិនបានឆ្លុះបញ្ចាំងទៅនឹងអង្គហេតុនៃបណ្តឹងនោះទេ។ ហើយថា ក្រុមប្រឹក្សាធម្មនុញ្ញ គួរតែចិត្តទុកដាក់លើកំហុសឆ្គងរបស់គ.ជ.ប ដែលបានប៉ះពាល់ដល់សម្លេងឆ្នោតគណបក្សនីមួយនោះ។
ការសម្រេចរបស់ក្រុមប្រឹក្សាធម្មនុញ្ញនៅពេលនេះ ត្រូវបានគេមើលឃើញថា នឹងអាចជាកំសួលកាន់តែខ្លាំងដែលនឹងនាំឱ្យផ្ទុះបាតុកម្ម ខណៈដែលការចរចាផ្នែកនយោបាយរបស់គណបក្សជាប់ឆ្នោតទាំងពីរ មិនទាន់ទៅមុខនៅឡើយនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ