គ.ជ.ប.ទទួលបានរបាយការណ៍ចំនួន៤៨ ស្ដីពីភាពមិនប្រក្រតី ជុំវិញការបោះឆ្នោត
គណៈកម្មការជាតិរៀបចំការបោះឆ្នោត ហៅកាត់ថា គ.ជ.ប. ទទួលបានរបាយការណ៍សរុបចំនួន ៤៨ពីរាជធានី និងខេត្ត ចំនួន ១១។ ដែលករណីជាច្រើន ក្នុងរបាយការណ៍ គ.ជ.ប. អះអាងថា បានពិនិត្យ និងដោះស្រាយតាមច្បាប់បោះឆ្នោតហើយ។ នេះបើតាមសេចក្ដីប្រកាសព័ត៌មាន មួយរបស់គ.ជ.ប. ចុះថ្ងៃអាទិត្យទី ១១ សីហា ឆ្នាំ ២០១៣។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
របាយការណ៍ចំនួន៤៨ ករណីខាងលើ ត្រូវបានគ.ជ.ប. ទទួលបានរវាងពីថ្ងៃទី២ រហូតដល់ថ្ងៃទី ៦ សីហា ដែលមានករណីមួយចំនួនធំក្នុងរបាយការណ៍ ត្រូវបានភាគីពាក់ព័ន្ធ បានដាក់ពាក្យប្ដឹង មកគណៈកម្មការជាតិរៀបចំការបោះឆ្នោត តាមឋានានុក្រម។ ហើយមកដល់ពេលនេះ គ.ជ.ប. ក៏បានយកមកពិនិត្យ និងដោះស្រាយ និងសម្រេច ក្នុងក្របខ័ណ្ឌច្បាប់បោះឆ្នោត រួចរាល់ហើយផងដែរ។
ក្នុងរបាយការណ៍ ត្រូវបានគេរកឃើញថា ភាពមិនប្រក្រតីពាក់ព័ន្ធច្រើន នៅរាជធានី និងខេត្តចំនួន ១១ ដែលមានដូចជា៖ ភ្នំពេញ បាត់ដំបង កំពង់ឆ្នាំង កំពង់ស្ពឺ កណ្ដាល ក្រចេះ ព្រះវិហារ ព្រៃវែង ពោធិ៍សាត់ តាកែវ និងឧត្ដរមានជ័យ។ ភាគីពាក់ព័ន្ធ គឺមានចំនួន ៥ ដែលបានដាក់របាយណ៍នេះ មកគ.ជ.ប. ដែលមានភាគីគណបក្សសង្គ្រោះជាតិ គណបក្សប្រជាជនកម្ពុជា គណបក្សហ្វ៊ុនស៊ិនប៉ិច អាជ្ញាធរ និងប្រជាពលរដ្ឋ។
នៅក្នុងសេចក្តីប្រកាសព័ត៌មានដដែល គ.ជ.ប. បានអះអាងថា ខេត្តក្រុងផ្សេងទៀត ដែលមិនពាក់ព័ន្ធក្នុងរបាការណ៍ និងមណ្ឌលបោះឆ្នោតភាគច្រើនទៀត ការបោះឆ្នោត បានប្រព្រឹត្តទៅ ជាធម្មតា ហើយចំនួន អ្នកបោះឆ្នោតក៏មានចំនួនខ្ពស់ផងដែរ។ តែទោះជាយ៉ាងណាគ.ជ.ប. បានកត់សម្គាល់ថា មានការិយាល័យបោះឆ្នោតចំនួន២ មានអាត្រាអ្នកបោះឆ្នោត ត្រឹមប្រមាណជាង ៦៤% ឯការិយាល័យផ្សេងទៀត មានចាប់ពី៧៥ ទៅ ជិត៨៣%។
ទាក់ទងនឹងរបាយការណ៍ ខាងលើ គ.ជ.ប. ក៏បានទទួលស្គាល់ដែរថា មានកើតឡើងពិតមែននូវភាពមិនប្រក្រតី ដែលរំខាន និងជះឥទ្ធិពលដល់អ្នកបោះឆ្នោត ការបោះឆ្នោត និងការរាប់សន្លឹកឆ្នោត។ តែទោះជាយ៉ាងណា គ.ជ.ប. បញ្ជាក់ថា ផលប៉ះពាល់មានត្រឹមកំរិតណាមួយ ប៉ុណ្ណោះ ដែលវាមិនបណ្ដាលប៉ះពាល់ធ្ងន់ធ្ងរឡើយ។
របាយការណ៍ស្ដីពីភាពមិនប្រក្រតីមួយចំនួន ត្រូវបានគណបក្សសង្គ្រោះជាតិ បែងចែកជា៣ប្រភេទ គឺបញ្ជីឈ្មោះបោះឆ្នោតឆ្នាំ២០១២ លិខិតបញ្ជាក់ អត្តសញ្ញាណ និងហេតុការណ៍នានា នៅក្នុងថ្ងៃបោះឆ្នោត។ តែចំពោះឯកសារភស្ដុតាងសម្រាប់បញ្ជាក់សម្អាង គណបក្សសង្គ្រោះជាតិ មិនបានដាក់ជូន គ.ជ.ប. ទេ ដែលគណបក្សខាងលើ នឹងផ្ដល់ជូន ទៅគណៈកម្មការពិសេសសម្រាប់ធ្វើការស៊ើបអង្កេតភាពមិនប្រក្រតី និងវាយតម្លៃផលប៉ះពាល់នៃការបោះឆ្នោត តែប៉ុណ្ណោះ។
ទាក់ទងនឹងបញ្ហានេះត្រូវបានលោក យឹម សុវណ្ណ អ្នកនាំពាក្យរបស់គណបក្សសង្គ្រោះជាតិ បានបញ្ជាក់ថា មិនទុកចិត្ត លើសមត្ថកិច្ច របស់ គ.ជ.ប.។ ហើយលោក បានជំរុញ ឱ្យមានការព្រមព្រៀងបង្កើតគណៈកម្មការពិសេសឱ្យបាន ឆាប់រហ័ស។ អ្នកនាំពាក្យគណបក្សប្រឆាំងរូបនេះ បានបង្ហាញជំហរដដែល ដោយចង់ឱ្យមានដំណោះស្រាយតាមការទាមទារ របស់គណបក្សខ្លួន។ ហើយចំពោះការប្រកាសឱ្យធ្វើមហាបាតុកម្មនោះ គ្រាន់តែជាជម្រើសមួយចុងក្រោយប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ