គណៈកម្មាធិការជាតិរៀបចំការបោះឆ្នោត ទទួលបានបណ្ដឹងចំនួន២៧៥ហើយ
បើគិតត្រឹមថ្ងៃអាទិត្យនេះ ថ្ងៃទី២១កក្កដា ត្រូវនឹងថ្ងៃទី២៦ នៃយុទ្ធនាការឃោសនាបោះឆ្នោត គណៈកម្មាធិការជាតិរៀបចំការបោះឆ្នោត ទទួលបានបណ្ដឹងចំនួន២៧៥ហើយ។ បណ្ដឹងចំនួន២២៦ ត្រូវបានដោះស្រាយរួចហើយ។ ចំណែកបណ្ដឹងដែលសេសសល់ គណកម្មការឃុំ-សង្កាត់ និងខេត្ត រៀបចំការបោះឆ្នោត កំពុងតែដោះស្រាយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
លោកកែវ ផល្លា ប្រធាននាយកដ្ឋាន សេវាកម្មច្បាប់ និងវិវាទកម្ម នៃគណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប. បានឲ្យដឹងនៅថ្ងៃអាទិត្យ ទី២១កក្កដា នេះថា គណកម្មការឃុំ-សង្កាត់រៀបចំការបោះឆ្នោត ទទួលបណ្ដឹងបានចំនួន២៧៥ហើយ។ មានបណ្ដឹងចំនួន២២៦ ត្រូវបានដោះស្រាយរួច។ ចំណែកនៅថ្នាក់ខេត្ត-រាជធានីវិញ មានបណ្ដឹងចំនួន៨២។ បណ្ដឹងចំនួន៧៤ ត្រូវបានដោះស្រាយរួចរាល់ នៅសល់១៨បណ្ដឹងមិនទាន់ដោះស្រាយ។ ចំណែកនៅថ្នាក់ជាតិវិញ បានទទួលបណ្ដឹងចំនួន១៩ ដោះស្រាយរួចស្រេចអស់១៨ នៅសល់១បណ្ដឹង។ នេះបើគិតត្រឹមថ្ងៃអាទិត្យ ទី២១កក្កដា ត្រូវនឹងថ្ងៃទី២៦ នៃយុទ្ធនាការឃោសនាបោះឆ្នោត។
ខណៈយុទ្ធនាការឃោសនាបោះឆ្នោតកាន់តែខិតជិតដល់ថ្ងៃបញ្ចប់ លោកទេព នីថា អគ្គលេខាធិការ គណៈកម្មាធិការជាតិរៀបចំការបោះឆ្នោត បានវាយតម្លៃថា ដំណើរការឃោសនារកសំឡេងឆ្នោតរយៈពេល២៦ថ្ងៃកន្លងមកនេះ ប្រព្រឹត្តិទៅដោយល្អប្រសើរ បើទោះជាមានចំណុចអវិជ្ជមានខ្លះ ព្រមទាំងអំពើហិង្សាតិចតួចកើតឡើងក៏ដោយចុះ។
ជាមួយគ្នានោះ អគ្គលេខាធិការគ.ជ.ប. រូបនេះ ក៏សូមអំពាវនាវ ឲ្យគណបក្សនយោបាយ ព្រមទាំងសកម្មជនគណបក្សនយោបាយ ឲ្យយកចិត្តទុកដាក់គោរពច្បាប់បោះឆ្នោត បទបញ្ជា នីតិវិធី និងក្រមសីលធម៌សម្រាប់គណបក្សនយោបាយក្នុងការឃោសនាបោះឆ្នោតឲ្យបានម៉ឺងម៉ាត់។ លោកក៏សំណូមពរឲ្យគណបក្សនយោបាយសហការជាមួយគណកម្មការឃុំ-សង្កាត់ និងខេត្តរៀបចំការបោះឆ្នោត រួមទាំងអាជ្ញាធរការពារសន្តិសុខ សណ្ដាប់ធ្នាប់សម្រាប់ការបោះឆ្នោត ដើម្បីឲ្យការឃោសនាបោះឆ្នោតប្រព្រឹត្តទៅដោយសេរី ត្រឹមត្រូវ ប្រកបដោយប្រសិទ្ធភាព មានសណ្ដាប់ធ្នាប់ និងសុវត្ថិភាព។
លោកទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោត ក៏សូមអំពាវនាវឲ្យប្រជាពលរដ្ឋដែលមានឈ្មោះក្នុងបញ្ជីបោះឆ្នោត ឲ្យទៅពិនិត្យមើលឈ្មោះរបស់ខ្លួន ដែលឥឡូវនេះមានបិទផ្សាយនៅឯគណកម្មការឃុំ-សង្កាត់រៀបចំការបោះឆ្នោត ហើយនៅមួយថ្ងៃមុនការបោះឆ្នោត នឹងមានបិទផ្សាយនៅតាមការិយាល័យបោះឆ្នោត។
លោកក៏បានបញ្ជាក់បន្ថែម ឲ្យប្រជាពលរដ្ឋទាំងអស់ដែលមានឈ្មោះបោះឆ្នោត ត្រៀមឯកសារបញ្ជាក់អត្តសញ្ញាណឲ្យបានរួចរាល់ ខណៈការបោះឆ្នោតកាន់តែខិតជិតចូលមែនទែនហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ