គ.ជ.ប.ផ្សព្វផ្សាយពីនីតិវិធីដាក់/ទទួល និងដោះស្រាយបណ្ដឹង នៅមួយថ្ងៃមុនការបោះឆ្នោត និងថ្ងៃបោះឆ្នោត
កិច្ចប្រជុំផ្សព្វផ្សាយពីនីតិវិធីដាក់/ទទួល និងដោះស្រាយបណ្ដឹង នៅមួយថ្ងៃមុនការបោះឆ្នោត និងថ្ងៃបោះឆ្នោតបានបិទបញ្ចប់ នៅថ្ងៃទី១៨កក្កដា ហើយទើបតែថ្ងៃទី១៩កក្កដា ម្សិលមិញ គណៈកម្មាធិការជាតិរៀបចំការបោះឆ្នោត បានចេញសេចក្ដីប្រកាសព័ត៌មានលម្អិតនៃកិច្ចប្រជុំ ព្រមទាំងនីតិវិធីដាក់/ទទួល និងដោះស្រាយបណ្ដឹង ដែលប្ដឹងមួយថ្ងៃមុនការបោះឆ្នោត និងថ្ងៃបោះឆ្នោត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
ខណៈការបោះឆ្នោតជ្រើសតាំងតំណាងរាស្ត្រ នីតិកាលទី៥ កាន់តែខិតជិតចូលមកដល់ គណៈកម្មាធិការជាតិរៀបចំការបោះឆ្នោត បានរៀបចំកិច្ចប្រជុំផ្សព្វផ្សាយអំពីនីតិវិធីដាក់/ទទួលនិងដោះស្រាយបណ្ដឹង នៅ១ថ្ងៃមុនការបោះឆ្នោត និងនៅថ្ងៃបោះឆ្នោត ដល់គណបក្សនយោបាយ អង្គការមិនមែនរដ្ឋាភិបាល និងអ្នកសារព័ត៌មាន។
សេចក្ដីប្រកាសព័ត៌មានលម្អិតនៃកិច្ចប្រជុំ ចេញផ្សាយកាលពីថ្ងៃទី១៩ កក្កដា ឲ្យដឹងថា បណ្ដឹងដែលកើតឡើងនៅ១ថ្ងៃមុនការបោះឆ្នោត និងថ្ងៃបោះឆ្នោត មាន២ប្រភេទ៖ ទី១ គឺបណ្ដឹងសុំផ្ដន្ទាទោសចំពោះអ្នកប្រព្រឹត្តល្មើសនឹងច្បាប់បោះឆ្នោត។ ចំណែកទី២ គឺបណ្ដឹងសុំកែតម្រូវការខុសឆ្គង មានដូចជាបណ្ដឹងសុំឲ្យបោះឆ្នោតឡើងវិញ ឬរាប់សន្លឹកឆ្នោតឡើងវិញជាដើម។
ចំពោះបណ្ដឹងប្រភេទទី១ បើជាបណ្ដឹងសុំឲ្យដាក់ទោសលើមន្ដ្រីរៀបចំការបោះឆ្នោត អ្នកប្ដឹងឬអ្នកតំណាង ត្រូវប្ដឹងទៅថ្នាក់លើមួយថ្នាក់ ក្នុងរយៈពេល៣ថ្ងៃយ៉ាងយូរ បន្ទាប់ពីថ្ងៃកើតហេតុ ហើយការដោះស្រាយបណ្ដឹងតាមពេលវេលាសមស្របជាបន្ទាន់។ បណ្ដឹងនេះត្រូវបញ្ចប់ត្រឹមថ្នាក់គ.ជ.ប.។ ផ្ទុយទៅវិញ ប្រសិនបើវាជាបណ្ដឹងសុំឲ្យដាក់ទោសលើជនមិនមែនជាមន្ដ្រីបោះឆ្នោត ត្រូវប្ដឹងទៅគណកម្មការឃុំ-សង្កាត់រៀបចំការបោះឆ្នោត រយៈពេល៣ថ្ងៃយ៉ាងយូរបន្ទាប់ពីថ្ងៃកើតហេតុ។ ហើយបណ្ដឹងនេះ អាចប្ដឹងពីគណកម្មការរៀបចំការបោះឆ្នោតពីថ្នាក់ឃុំ-សង្កាត់ រហូតដល់ក្រុមប្រឹក្សាធម្មនុញ្ញ ដែលជាកន្លែងកាត់សេចក្ដីចុងក្រោយបង្អស់។
ដោយឡែក បណ្ដឹងប្រភេទទី២ ដែលជាបណ្ដឹងសុំកែតម្រូវការខុសឆ្គង មានដូចជាបណ្ដឹងសុំឲ្យបោះឆ្នោតឡើងវិញ ឬរាប់សន្លឹកឆ្នោតឡើងវិញ នៅពេលបោះឆ្នោតនិងរាប់សន្លឹកឆ្នោត ប្រសិនបើកើតមានករណីមិនប្រក្រតី តំណាងគណបក្សនយោបាយអាចប្ដឹងផ្ទាល់មាត់ភ្លាមៗ ទៅប្រធានការិយាល័យបោះឆ្នោត។ ហើយប្រធានការិយាល័យដោះស្រាយក្នុងកម្រិតសមត្ថកិច្ចរបស់គាត់។ ក្រៅពីប្ដឹងផ្ទាល់មាត់ទៅប្រធានការិយាល័យ តំណាងគណបក្សក៏អាចប្ដឹងជាលាយលក្ខណ៍អក្សរ ទៅគណកម្មការឃុំ-សង្កាត់រៀបចំការបោះឆ្នោត យ៉ាងយូរបំផុតត្រឹមម៉ោង១១និង៣០នាទីព្រឹក ថ្ងៃទី២៩កក្កដា។ បណ្ដឹងនេះអាចប្ដឹងជាបន្តបន្ទាប់រហូតដល់គណៈកម្មាធិការជាតិរៀបចំការបោះឆ្នោត។ ហើយសេចក្ដីសម្រេចរបស់ គ.ជ.ប. គឺជាសេចក្ដីសម្រេចចុងក្រោយ នៅមុនការប្រកាសលទ្ធផលបណ្ដោះអាសន្ននៃការបោះឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ