វិទ្យាសា្ថនជាតិប្រជាធិបតេយ្យរៀបចំវេទិកាជជែកពិភាក្សាបេក្ខជនតំណាងរាស្ត្រ
វិទ្យាស្ថានជាតិប្រជាធិបតេយ្យ ហៅកាត់ថា NDI បានឲ្យដឹងតាមរយៈសេចក្ដីប្រកាសព័ត៌មានរបស់ខ្លួនថា NDI នឹងឧបត្ថម្ភដល់វេទិកាជជែកពិភាក្សាបេក្ខជនតំណាងរាស្ត្រ ចំនួន៩នៅខេត្តចំនួន៥ ព្រមទាំងវេទិកា២ផ្សេងទៀត ដែលនឹងត្រូវចាក់ផ្សាយតាមទូរទស្សន៍ជាតិកម្ពុជានាពេលដ៏ខ្លីខាងមុខនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
ដើម្បីបន្តប្រពៃណីឧបត្ថម្ភវេទិកាជជែកពិភាក្សានៅកម្ពុជា ដែលខ្លួនបានធ្វើចាប់ពីឆ្នាំ២០០៣មក វិទ្យាស្ថានជាតិប្រជាធិបតេយ្យ ហៅកាត់ថា NDI បានឲ្យដឹងតាមរយៈសេចក្ដីប្រកាសព័ត៌មានថា ខ្លួននឹងឧបត្ថម្ភវេទិកាជជែកពិភាក្សាបេក្ខជនតំណាងរាស្ត្រចំនួន៩ នៅក្នុងខេត្តចំនួន៥។ ព្រមទាំងវេទិកាថ្នាក់ជាតិចំនួន២ទៀត ដែលនឹងត្រូវចាក់ផ្សាយតាមទូរទស្សន៍ជាតិនាពេលឆាប់ៗខាងមុខនេះ។
វេទិកាដែលឧបត្ថម្ភដោយ NDI នេះ ធ្វើឡើងក្នុងគោលបំណងផ្ដល់ឱកាសឲ្យប្រជាពលរដ្ឋ បានជួបផ្ទាល់ជាមួយបេក្ខជនតំណាងរាស្ត្រ ដើម្បីចោទជាសំណួរ ក្នុងន័យស្វែងរកដំណោះស្រាយសមស្រប សម្រាប់បញ្ហានានាដែលកើតមាននៅតាមមូលដ្ឋាន។ ការជជែកពិភាក្សាផ្លាស់ប្ដូរយោបល់នេះ នឹងជួយឲ្យប្រជាពលរដ្ឋវាយតម្លៃ និងសម្រេចចិត្តបានប្រសើរជាងមុន លើជម្រើសគណបក្សនយោបាយទាំង៨ ដែលនឹងត្រូវប្រកួតប្រជែងក្នុងការបោះឆ្នោតជ្រើសតាំងតំណាងរាស្ត្រនីតិកាលទី៥ ឆ្នាំ២០១៣ ខាងមុខនេះ។
អ្នកស្រី ឡូរ៉ា ថនថុន នាយិកាជាន់ខ្ពស់នៃវិទ្យាស្ថានជាតិប្រជាធិបតេយ្យនៅកម្ពុជា ឲ្យដឹងថា វេទិកាជជែកពិភាក្សាគឺជាមូលដ្ឋាននៃលទ្ធិប្រជាធិបតេយ្យ ដែលនឹងរុញច្រានការបោះឆ្នោត ឲ្យចេញឆ្ងាយពី បក្សពួកនិយម អំណាច និងការទិញទឹកចិត្ត។ វេទិកាជជែកពិភាក្សា នឹងធ្វើឲ្យការសម្រេចចិត្តបោះឆ្នោត ពឹងផ្អែកលើ ថ្វីមាត់បញ្ចុះបញ្ចូល និងគំនិតដ៏ល្អប្រសើរនានា ដែលលើកឡើងដោយគណបក្សនយោបាយ។
មានគណបក្សចំនួន៦ នឹងចូលរួមក្នុងវេទិកាពិភាក្សាថ្នាក់ខេត្ត។ គណបក្សទាំង៦នោះរួមមាន គណបក្សប្រជាជនកម្ពុជា គណបក្សសង្គ្រោះជាតិ គណបក្សហ៊្វុនស៊ិនប៉ិច គណបក្សខ្មែរឈប់ក្រ និងគណបក្សសញ្ជាតិកម្ពុជា។ ចំណែក គណបក្ស២ទៀត គឺគណបក្សសាធារណរដ្ឋប្រជាធិបតេយ្យ និងគណបក្សខ្មែរអភិវឌ្ឍន៍សេដ្ឋកិច្ច នឹងចូលរួមជាមួយគណបក្សទាំង៦ខាងដើម ដើម្បីជជែកពិភាក្សាក្នុងវេទិកាថ្នាក់ជាតិ។
គួរបញ្ជាក់ផងដែរថា វេទិកាជជែកពិភាក្សានឹងធ្វើឡើងនៅតាមខេត្តចំនួន៥ រួមមាន ខេត្តសៀមរាប កំពង់ធំ កំពង់ចាម កណ្ដាល និងតាកែវ ពីថ្ងៃទី៧កក្កដា ដល់ថ្ងៃទី២០កក្កដា។ ចំណែកវេទិកាជជែកពិភាក្សាថ្នាក់ជាតិចំនួន២ នឹងត្រូវចាក់ផ្សាយតាមរយៈកញ្ចក់ទូរទស្សន៍ជាតិ នៅថ្ងៃទី២០និង២១ កក្កដា ហើយក្រោយមកនឹងត្រូវចាក់ឡើងវិញ នៅថ្ងៃទី២៤និង២៥ កក្កដាខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ