មនុស្ស «រាប់លាននាក់» ចូលកម្សាន្តនៅភ្នំពេញ ទោះបីគ្មានបុណ្យអុំទូក
រយៈពេល៣ថ្ងៃនៃពិធីបុណ្យ អកអំបុក និងសំពះព្រះខែបានកន្លងផុតទៅហើយកាលពីយប់មិញ។ បើទោះបីជាពិធីបុណ្យអុំទូក និងបណ្តែតប្រទីបត្រូវបានរដ្ឋាភិបាលលុបចោលក៏ដោយ ក៏នៅតែមានមនុស្សជាច្រើនចូលមករាជធានីភ្នំពេញដើម្បីអបអរពិធីបុណ្យដ៏ធំនេះដែរ។ ប៉ុន្តែ ចំនួនអ្នកចូលរួមបានថយចុះយ៉ាងខ្លាំងបើធៀបទៅនឹងពិធីបុណ្យឆ្នាំមុនៗ។ អាជ្ញាធរវាយតម្លៃថា មានមនុស្ស២លាននាក់បានចូលមកភ្នំពេញនៅថ្ងៃបង្ហើយ ប៉ុន្តែ អ្នកដែលបានឃើញហេតុការណ៍វាយតម្លៃថាមានមនុស្សតិចជាងនេះ។
ចុះផ្សាយនៅថ្ងៃ៖
ស្តាប់ - ០២:១៩
មនុស្សប្រហែល២លាននាក់បានចូលមកភ្នំពេញកាលពីយប់ថ្ងៃសុក្រទី១១វិច្ឆិកាម្សិលមិញដែលជាថ្ងៃបង្ហើយនៃពិធីបុណ្យអុំទូក អកអំបុក និងសំពះព្រះខែ។ នេះបើតាមការវាយតម្លៃរបស់អាជ្ញាធររាជធានីភ្នំពេញ។ កាលពីថ្ងៃទី២នៃពិធីបុណ្យ៣ថ្ងៃ អាជ្ញាធរប៉ាន់ប្រមាណថាមានមនុស្សក្បែរនឹងមួយលាននាក់។ ប៉ុន្តែ តួលេខនេះត្រូវបានមនុស្សជាច្រើនដែលបានចូលរួមមិនយល់ស្របទេ ដោយពួកគេវាយតម្លៃថា ពិតជាមានមនុស្សតិចជាងនេះ។ ការវាយតម្លៃនេះដោយសំអាងថា ចរាចរណ៍ហាក់ដូចជាចង្អៀតបន្តិចមែននៅម្តុំវិមានឯករាជ្យ និងតាមដងទន្លេចតុមុខ ប៉ុន្តែ ចង្អៀតដោយសារតែអាជ្ញាធរអនុញ្ញាតឲ្យរថយន្ត និងម៉ូតូចេញចូលដោយគ្មានការហាមឃាត់ដូចកាលពីលើកមុនៗទេ។
ផ្ទុយទៅវិញអវត្តមាននៃពិធីបុណ្យអុំទូកបានធ្វើឲ្យប្រជាពលរដ្ឋខ្មែរជាច្រើនបង្វែរដំណើរកម្សាន្តរបស់ខ្លួនទៅកាន់បណ្តាខេត្តនានាវិញ។ លោក អាំង គឹមអ៊ាង ប្រធានសមាគមទីភ្នាក់ងារទេសចរណ៍កម្ពុជាបានឲ្យដឹងថា ប្រជាពលរដ្ឋខ្មែរជាច្រើននាំគ្នាទៅកម្សាន្តតាមបណ្តាខេត្តមាត់សមុទ្រ ខេត្តសៀមរាប និងភូមិភាគឦសាននៃប្រទេស។ មិនត្រឹមតែចំនួនមនុស្សមកភ្នំពេញទេដែលថយចុះ ប៉ុន្តែ ចំនួនទេសចរជនជាតិខ្មែរដែលចេញទៅក្រៅប្រទេសក្នុងពិធីបុណ្យអុំទូកឆ្នាំនេះក៏ថយចុះដែរ នេះបើតាមប្រភពដដែល។ ការថយចុះនេះគឺដោយសារតែស្ថានភាពមិនល្អនៃសេដ្ឋកិច្ចដែលបណ្តាលមកពីបញ្ហាទឹកជំនន់។ ទឹកជំនន់ដែលបានបំផ្លាញសេដ្ឋកិច្ចកម្ពុជាជាង៥០០លានដុល្លារ និងបានសម្លាប់មនុស្សជាង២៥០នាក់។
របាយការណ៍របស់ប៉ូលិសក៏បានឲ្យដឹងដែរថា គ្រោះថ្នាក់ចរាចរណ៍ក្នុងរយៈពេល ៣ ថ្ងៃនៃពីធីបុណ្យអុំទូក ពីថ្ងៃទី៩ ដល់ថ្ងៃទី១១ វិច្ឆិកា ឆ្នាំ២០១១ នេះ មានការថយចុះនៅទូទាំងប្រទេស ពោលគឺគ្រោះថ្នាក់ចរាចរណ៍ក្នុងរយៈពេល ៣ ថ្ងៃក្នុងពិធីបុណ្យអុំទូកបានកើតឡើងចំនួន ៤៣ លើកធៀបនឹង៥៨លើកកាលពីឆ្នាំ២០១០។ ប៉ុន្តែ ចំនួនអ្នកស្លាប់ដោយគ្រោះថ្នាក់ចរាចរណ៍បែរជាកើនឡើងទៅវិញ ដោយឆ្នាំនេះមានមនុស្សស្លាប់១៨នាក់កើនលើសឆ្នាំមុនម្នាក់។ នៅឯភ្នំពេញ សមត្ថកិច្ចប៉ូលិសបានយកចិត្តទុកដាក់រក្សាសណ្តាប់ធ្នាប់ដោយប្រុងប្រយ័ត្នជាងមុនបន្ទាប់ពីទទួលបានបទពិសោធន៍ដ៏រន្ធត់នៃការរត់ជាន់គ្នាលើស្ពានពេជ្រដែលបណ្តាលឲ្យមនុស្សស្លាប់ជាង៣៥០នាក់ និងរាប់រយនាក់ទៀតរងរបួស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ