ក្រុមសហគមន៍ការពារព្រៃឡង់បែកផ្លូវគ្នា ដោយសារបារម្ភពីសុវត្ថិភាព
តំណាងសហគមន៍ព្រៃឡង់ប្រមាណជា៣០០នាក់ដែលបានធ្វើដំណើរពីខេត្ត៤ផ្សេងៗគ្នាចូលព្រៃឡង់ដើម្បីត្រួតពិនិត្យការកាប់ព្រៃឈើខុសច្បាប់បានចាប់ផ្តើមបែកផ្លូវគ្នាហើយនៅថ្ងៃសៅរ៍នេះដោយសារបារម្ភពីសុវត្ថភាពផ្ទាល់ខ្លួន។ វេទិកាសាធារណៈដែលគ្រោងធ្វើឡើងនៅថ្ងៃចន្ទខាងមុខនេះត្រូវបានលុបចោល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
តំណាងសហគមន៍ព្រៃឡង់ជាង៣០០នាក់ដែលបានធ្វើដំណើរចូលព្រៃដើម្បីត្រួតពិនិត្យការកាប់បំផ្លាញព្រៃឡង់អស់រយៈពេលប្រមាណជា១សប្តាហ៍មកហើយនោះ បានចាប់ផ្តើមបែកផ្លូវគ្នាហើយនៅថ្ងៃសៅរ៍នេះ។ ការបំបែកផ្លូវគ្នានេះគឺដោយសារការបារម្ភពីសុវត្ថិភាពផ្ទាល់ខ្លួន។ មិនមានការបំបែកជាទ្រង់ទ្រាយធំពីសំណាក់អាជ្ញាធរទេប៉ុន្តែប្រជាជនមានការភ័យខ្លាចដោយសារពួកគេអាចប្រឈមនឹងការចោទប្រកាន់ផ្សេងៗ។
លោក ឈុត វុទ្ធី ប្រធានអង្គការការពារធនធានធម្មជាតិកម្ពុជាដែលបានតាមដានប្រជាជនតាំងពីថ្ងៃដំបូងមក បានបញ្ជាក់ប្រាប់លម្អិតនៅថ្ងៃសៅរ៍នេះថា ប្រជាជនខ្លះបានធ្វើដំណើរថ្មើរជើងអស់រយៈពេល៥ថៃ្ង អ្នកខ្លះទៀតអស់រយៈពេល១សប្តាហ៍និងអ្នកខ្លះទៀតអស់រយៈពេលជិត១០ថ្ងៃមកហើយដើម្បីត្រួតពិនិត្យការកាប់បំផ្លាញព្រៃឡង់នៅក្នុងខេត្តកំពង់ធំ។
លោក ឈុត វុទ្ធី បានបន្ថែមទៀតថា ប្រជាជនទាំងនោះមិនទាន់បានបញ្ចប់បេសកកម្មរបស់ខ្លួនទេតែពួកគេបង្ខំចិត្តបែកផ្លូវត្រលប់ទៅគេហដ្ឋានរៀងខ្លួនចាប់ពីថ្ងៃនេះតទៅ។ តំណាងសហគមន៍ទាំងនោះមកពីខេត្តក្រចេះ ស្ទឹងត្រែង កំពង់ធំនិងខេត្តព្រះវិហារដើម្បីការពារព្រៃឡង់ដែលមានទំហំប្រមាណជា៤០ម៉ឺនហិកតា។ ព្រៃនេះផ្តល់ផលជាច្រើនដល់សហគមន៍ជនជាតិភាគតិចដូចជាវល្លិនិងជ័រទឹកជាដើម។
លោក វុទ្ធីបានកត់សម្គាល់ថា តំណាងសហគមន៍សុខចិត្តបំបែកផ្លូវគ្នាពីព្រោះពួកគេខ្លាចអាជ្ញាធរដែលបំពាក់ទៅដោយកាំភ្លើងដើរមកជិតក្បួនរបស់ប្រជាជន។
លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជាដែលបានតាមដានសកម្មភាពប្រជាជនការពារព្រៃឡង់យ៉ាងម៉ត់ចត់នោះបានបញ្ជាក់បន្ថែមថា ប្រជាជនបារម្ភពីការចោទប្រកាន់ណាមួយពីសំណាក់អាជ្ញាធរអ៊ីចឹងហើយទើបពួកគាត់ចាប់ផ្តើមបំបែកគ្នានៅថ្ងៃនេះ។ លោកបានចោទប្រកាន់ថា អាជ្ញាធរបានរារាំងដំណើររបស់ប្រជាជនដែលមានបំណងការពារព្រៃឡង់។
បើយោងតាមគម្រោង បន្ទាប់ពីត្រួតពិនិត្យព្រៃឡង់ហើយ ប្រជាជនការពារព្រៃឡង់ត្រូវចូលរួមវេទិកាសាធារណៈមួយនៅក្នុងខេត្តកំពង់ធំនៅថ្ងៃចន្ទសប្តាហ៍ក្រោយនេះប៉ុន្តែឥឡូវនេះវេទិកាត្រូវបានគេលុបចោលដោយសារអាជ្ញាធរមិនផ្តល់ការអនុញ្ញាតនិងដោយសារប្រជាជនបានបង្ខំចិត្តបែកផ្លូវគ្នាតាំងពីថ្ងៃនេះម្ល៉េះ។
លោក ស៊ុង វណ្ណា អភិបាលស្រុកសណ្តាន់ខេត្តកំពង់ធំទីដែលប្រជាជនជួបជុំគ្នាដើម្បីបរិហារការកាប់បំផ្លាញព្រៃឈើនោះ បានបដិសេដនៅថ្ងៃសៅរ៍នេះ ព័ត៌មានដែលថា ប្រជាជនត្រលប់ទៅស្រុកកំណើតវិញដោយសារការរំខានពីសំណាក់អាជ្ញាធរ។
លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជាបានសម្តែងការសោកស្តាយនិងបានបញ្ជាក់ថា ប្រជាជនការពារព្រៃឡង់មិនបានសម្រេចគោលដៅរបស់ខ្លួនទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ