លោកវ៉ាន់ ណាតស្លាប់មុនសាលដីកាកាត់ទោសឌុច
អតីតអ្នកទោសគុកទួលស្លែងលោកវ៉ាន់ ណាត បានទទួលមរណភាពហើយកាលពីវេលាថ្ងៃត្រង់ថ្ងៃចន្ទទី៥ខែកញ្ញា នេះ។ លោក វ៉ាន់ ណាត អាយុ៦៦ឆ្នាំបានស្លាប់ក្រោយពីបានសន្លប់មិនដឹងខ្លួនអស់រយៈ ពេល១០ថ្ងៃមក។ លោក វ៉ាន់ ណាត បានស្លាប់មុនពេលដែលតុលាការកំពូលនៃសាលាក្តីខ្មែរក្រហមត្រូវ ប្រកាសសាលដីកាផ្តន្ទាទោសឌុចអតីតប្រធានគុកទួលស្លែង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៩
លោកវ៉ាន់ ណាតបានស្លាប់ហើយ ស្លាប់មុនកាំង ហ្គេចអ៊ាវ ហៅឌុច អតីតប្រធានគុកទួលស្លែង ដែលជាអ្នកបញ្ជាអោយមានការធ្វើទារុណកម្មអ្នកទោសគុកទួលស្លែង ដែលក្នុងនោះ ក៏មានលោក វ៉ាន់ ណាតផងដែរ។
លោកវ៉ាន់ ណាតបានស្លាប់នៅម៉ោងជិត១រសៀលនៅចន្ទទី៥កញ្ញានេះបន្ទាប់ពីលោកបានសន្លប់លែងដឹងខ្លួន១០ថ្ងៃមកហើយនោះ។
លោកវ៉ាន់ ណាត ត្រូវបានគេដឹងថាមានជំងឺតម្រងនោម និងត្រូវលាងឈាមជាប្រចាំជាច្រើនឆ្នាំមកហើយ។ ជំងឺទឹកចូលសួតមួយថែមទៀតបានធ្វើអោយសុខភាពលោកវ៉ាន់ ណាតធ្លាក់ចុះដុនដាបខ្លាំងចាប់តាំងពីថ្ងៃទី២៦ខែសីហាមក។ លោកវ៉ាន់ ណាតបានសន្លប់បាត់ស្មារតីតាំងពីពេលនោះមក។
លោកវ៉ាន់ ណាតអាយុ៦៦ឆ្នាំបានលាចាកលោក នៅពេលដែលអ្នកបញ្ជាអោយធ្វើទារុណកម្មលោកក្នុងសម័យខ្មែរក្រហមកំពុងរស់នៅ និងទទួលបានការថែរក្សានៅក្នុងមន្ទីរឃុំឃាំងនៃសាលាក្តីខ្មែរក្រហម។ លោកវ៉ាន់ ណាតបានស្លាប់ដោយមិនបានលឺការដាក់ទោសទៅលើឌុចអតីតប្រធានគុកទួលស្លែងនោះឡើយ។
មន្ត្រីផ្នែកកិច្ចការសាធារណៈរបស់សាលាក្តីខ្មែរក្រហម លោកហ៊ុយ វណ្ណៈបានថ្លែងសោកស្តាយ ចំពោះមរណភាពរបស់លោកវ៉ាន់ ណាត។ លោកហ៊ុយ វណ្ណៈរៀបរាប់អោយដឹងថាលោកវ៉ាន់ ណាតបានចូលរួមចំណែកក្នុងដំណើរការសាលាក្តីខ្មែរក្រហមជាប្រវត្តិសាស្ត្រ ហើយ ថាការស្លាប់របស់លោកវ៉ាន់ ណាតនឹងអាចជំរុញអោយតុលាការខ្មែរក្រហមគិតគូរបន្ថែមទៀតអំពីភាពចាស់ជរារបស់ជនរងគ្រោះ និងជនជាប់ចោទផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ