ក្រុមដោះមីនកម្ពុជានៅស៊ូដង់នឹងវិលត្រឡប់មកកម្ពុជាវិញនៅថ្ងៃចន្ទស្អែក
កងកម្លាំងរក្សាសន្តិភាពដោះមីនកម្ពុជាចំនួន ៥២នាក់នៅក្នុងប្រទេសស៊ូដង់នឹងត្រឡប់មកប្រទេសកម្ពុជាវិញនៅថ្ងៃចន្ទ៥កញ្ញាស្អែក។ អ្នកនាំពាក្យក្រសួងការពារជាតិនៃប្រទេសកម្ពុជាបានថ្លែងថា សកម្មភាពដោះមីនរបស់កម្ពុជានៅក្រៅប្រទេសគឺជាសក្ខីភាពបង្ហាញថា កម្ពុជា ចង់បានសុខសន្តិភាព។
ចុះផ្សាយនៅថ្ងៃ៖
ស្តាប់ - ០២:០៩
ពិធីស្វាគមន៍កងកម្លាំងដោះមីនកម្ពុជាចំនួន៥២នាក់ ដែលវិលត្រឡប់មកពីប្រទេសស៊ូដង់នឹងត្រូវប្រារព្ធធ្វើឡើងនៅថ្ងៃចន្ទទី៥កញ្ញាស្អែកនៅព្រលានយន្តហោះអន្តរជាតិភ្នំពេញ។
ចាប់តាំងពីឆ្នាំ២០០៦មកកងរក្សាសន្តិភាពដោះមីនកម្ពុជាក្នុងក្របខណ្ឌអង្គការសហប្រជាជាតិនៅប្រទេសស៊ូដង់ មានចំនួនសរុបទាំងអស់ ៥៧៧នាក់។
ប្រសិនបើគេសរុបចំនួនអ្នកដោះមីនកម្ពុជានៅក្រៅប្រទេសដែលបានបញ្ចប់បេសកម្ម មានចំនួន សរុប ៦១២ នាក់ហើយរហូតមកដល់ពេលនេះ។ រីឯកងរក្សាសន្តិភាពដោះមីនកម្ពុជាចំនួន២២៤នាក់ទៀតបាននិងកំពុងបំពេញភារកិច្ចរបស់ពួកគេនៅក្រៅប្រទេសក្នុងនោះ ៥នាក់នៅក្នុងប្រទេសស៊ូដង់ខាងត្បូងនិង២១៩នាក់ស្ថិតនៅក្នុងប្រទេសលីបង់។
លោក ឈុំ សុជាតិ អ្នកនាំពាក្យនៃក្រសួងការពារជាតិកម្ពុជា បានថ្លែងប្រាប់នៅថ្ងៃអាទិត្យនេះថា សកម្មភាពដោះមីនរបស់កម្ពុជានៅក្រៅប្រទេសក្នុងក្របខណ្ឌអង្គការសហប្រជាជាតិ បានបង្ហាញយ៉ាងច្បាស់ថា កងទ័ពកម្ពុជាមានសេចក្តីអង់អាចក្លាហានមានសណ្តានចិត្តមនុស្សធម៌និងចង់បានសុខសន្តិភាពនៅក្នុងពិភពលោកទាំងមូល។
លើសពីនេះទៅទៀត អ្នកនាំពាក្យក្រសួងការពារជាតិកម្ពុជា បានបន្តទៀតថា សកម្មភាពកងទ័ពខ្មែរនៅក្រៅប្រទេសនេះគឺ បង្ហាញពីមោទនភាពជាតិ។ កាលពីឆ្នាំ ១៩៩៣ កងទ័ពមួកខៀវរបស់អង្គការសហប្រជាជាតិជាច្រើនពាន់នាក់ បានមកបំពេញបេសកម្មរក្សាសន្តិភាពនៅក្នុងប្រទេសកម្ពុជា។ ប៉ុន្តែពេលនេះ ប្រទេសកម្ពុជាបានបញ្ជូនកងទ័ពរបស់ខ្លួនទៅក្រៅប្រទេសវិញម្តងដើម្បីបំពេញសកម្មភាពមនុស្សធម៌។
នៅក្នុងសេចក្តីថ្លែងការណ៍ចេញផ្សាយនៅថ្ងៃអាទិត្យនេះ លោក ស្រី Anne Lemaistre តំណាងស្តីទីនៃអង្គការសហប្រជាជាតិប្រចាំនៅកម្ពុជាបានថ្លែងស្វាគមន៍កិច្ចខិតខំប្រឹងប្រែងរបស់ក្រុមដោះមីនកម្ពុជាដែលនឹងត្រូវត្រលប់មកដល់ប្រទេសកម្ពុជាវិញនៅថ្ងៃស្អែក។
លោកស្រី Lemaistre បញ្ជាក់ទៀតថា កិច្ចការនិងបទពិសោធន៍របស់ក្រុមដោះមីនខ្មែរនៅក្នុងប្រទេសដែលឆ្លងកាត់ការឈឺឆាប់គឺជាប្រភពនៃមោទនភាព។ ម៉្យាងវិញទៀត លោកស្រី បានបន្ថែមទៀតថា ការងារទាំងអស់នេះនឹងចូលរួមចំណែកអភិវឌ្ឍន៍ប្រទេស ចូលរួមចំណែកបើកឧិកាសនិងផ្តល់ក្តីសង្ឃឹមដល់ប្រជាជនក្នុងប្រទេសដែលអស់លោកអ្នកបានជួយបម្រើ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ