សិស្សប្រឡងបាក់ឌុបនាំគ្នាសែនព្រេនស្រោចទឹកអោយប្រឡងជាប់
មុនថ្ងៃប្រឡងបាក់ឌុប២ថ្ងៃ បេក្ខជន-បេក្ខនារីមានអារម្មណ៍ច្របូកច្របល់។ អ្នកខ្លះនាំគ្នាទៅសែន អ្នកខ្លះនាំគ្នាទៅស្រោចទឹក អ្នកខ្លះទៀតគិតគូរពីររឿងទិញវិញ្ញាសាសម្រាប់បើកចម្លង។ ចំណែកឯសមាគមគ្រូបង្រៀនឯករាជកម្ពុជាវិញ ពួកគេអំពាវនាវកុំអោយមានទង្វើធ្លាយវិញ្ញាសានៅថ្ងៃប្រឡង។
ចុះផ្សាយនៅថ្ងៃ៖ កែប្រែថ្ងៃទី៖
នៅវេលាម៉ោងប្រមាណជា៨ព្រឹកនៅថ្ងៃសៅរ៍នេះ បេក្ខនារីប្រឡងបាក់ឌុបចំនួនបីនាក់នៅក្នុងសាលាបឹងត្របែកបានកាន់ចានដែលមានផ្លែប៉ោម ផ្លែមាននិងផ្លែចេកដើរសំដៅទៅកាន់រោងអ្នកតាមានទីតាំងនៅក្បែរទីលានហាត់កីឡានៃវិទ្យាល័យបឹងត្របែកទីក្រុងភ្នំពេញ។
ក្នុងទឹកមុខញញឹមញញែម សិស្សទាំងបីនាក់នេះបាននិយាយប្រាប់ថា ពួកគេកំពុងរៀបចំសែនព្រេនទៅដល់អ្នកតានៅក្នុងសាលាដើម្បីសុំសេចក្តីសុខនិងម្យ៉ាងទៀតសុំអោយអ្នកតាជួយអោយពួកគេប្រឡងជាប់នៅឆ្នាំនេះ។ សិស្សម្នាក់ក្នុងចំណោមសិស្សបីនេះបានបញ្ជាក់បន្ថែមថា ការសែនព្រេនមុនពេលថ្ងៃប្រឡងនេះគឺជាប្រពៃណីរបស់ខ្មែរដែលធ្លាប់ធ្វើតៗគ្នាមក។ ការរៀបចំពិធីនេះនិងជួយកម្លាំងចិត្តសិស្សនៅថ្ងៃប្រឡងកុំអោយមានអារម្មណ៍ភ័យខ្លាច។
សិស្សមួយក្រុមផ្សេងទៀតដែលទើបសែនរួចហើយបាននិយាយថា ការសែនព្រេនត្រូវតែធ្វើប៉ុន្តែការខិតខំរៀនសូត្រក៏ជារឿងចាំបាច់ដែរដើម្បីអាចប្រឡងជាប់។ សិស្សមួយក្រុមផ្សេងទៀតនាំគ្នានិយាយអំពីរឿងស្រោចទឹក។ អ្នកខ្លះគ្រោងអោយមាតាបិតាស្រោចទឹកអោយប៉ុន្តែអ្នកខ្លះទៀតគ្រោងទៅវត្តដើម្បីអោយព្រះសង្ឃស្រោចទឹក។
នៅក្នុងប្រទេសកម្ពុជា អបិយជំនឿនៅតែដើរតួនាទីសំខាន់ដដែលនៅក្នុងជីវិតប្រចាំថ្ងៃរបស់ប្រជាជនខ្មែរ។ ការសែនព្រេនត្រូវបានគេធ្វើឡើងនៅពេលដែលគេជួបប្រទះគ្រោះភ័យនិងនៅពេលដែលគេទទួលបានជ័យជំនះលើអ្វីមួយ។
សិស្សមួយចំនួននាំគ្នានិយាយពីរឿងសែនព្រេនស្រោចទឹកប៉ុន្តែសិស្សមួយចំនួនផ្សេងទៀតនាំគ្នានិយាយអំពីការទិញវិញ្ញាសាព្រាង។ អ្នកខ្លះគ្រោងទិញវិញ្ញាសាព្រាងក្នុងតម្លៃជាង២ដុល្លារក្នុងមួយមុខវិជ្ជាឬ៣០ដុល្លារសម្រាប់គ្រប់មុខវិជ្ជា។ ការទិញក្នុងតម្លៃ៣០ដុល្លារមានការធានាថា អាចត្រូវ៨០ភាគរយ។ នៅថ្ងៃសៅរ៍នេះ មន្ត្រីក្រសួងអប់រំដែលរៀបចំការប្រឡងបដិសេធមិនធ្វើអត្ថាធិប្បាយទេ។ ប៉ុន្តែកាលពីពេលកន្លងមក មន្ត្រីអប់រំខ្លះធ្លាប់បានពន្យល់ថា វិញ្ញាសាព្រាងមិនត្រូវនឹងវិញ្ញាសាប្រឡងទេ ដូច្នេះ សូមបេក្ខជនប្រឡងកុំទិញអោយសោះ។
លោកស្រី អ៊ុក ឆាយយ៉ាវី អនុប្រធានសមាគមគ្រូបង្រៀនឯករាជកម្ពុជាបានអំពាវនាវនៅថ្ងៃសៅរ៍នេះសូមអោយក្រសួងអប់រំមេត្តាចាត់វិធានការទប់ស្កាត់ការបែកវិញ្ញាសាជាយថាហេតុនៅក្នុងសម័យប្រឡងឆ្នាំ២០១១នេះ។ ការបែកវិញ្ញាសាដែលនាំអោយមានការលួចចម្លងនោះនឹងប៉ះពាល់គុណភាពនៃការប្រឡង។ បទបញ្ជារបស់ក្រសួងអប់រំដែលបិទផ្សាយនៅតាមសាលាបានសរសេរថា រាល់ការលួចចម្លងឯកសារត្រូវហាមឃាត់។
លោកស្រី អ៊ុក ឆាយយ៉ាវី បានបន្តទៀតថា លោកគ្រូអ្នកគ្រូនៅក្នុងថ្នាក់ប្រឡងមិនគួរទទួលសំណូកពីសិស្សទេពីព្រោះថា ទង្វើនេះវាផ្ទុយនឹងក្រមសីលធម៌របស់គ្រូបង្រៀន។
សម័យប្រឡងបាក់ឌុបឆ្នាំ២០១១នេះនឹងប្រព្រឹត្តទៅចាប់ពីថ្ងៃទី២៥ខែកក្កដារហូតដល់ថ្ងៃទី២៧ខែកក្កដាដោយមានសិស្សចូលរួមប្រឡងជាង១០ម៉ឺននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ