ផ្ទះ៦៧ខ្នងត្រូវអគ្គិភ័យលេបត្របាក់នៅខណ្ឌឫស្សីកែវក្រុងភ្នំពេញ
យ៉ាងហោចណាស់ផ្ទះប្រជាពលរដ្ឋចំនួន ៦៧ ខ្នង ត្រូវបានអគ្គិភ័យលេបត្របាក់ទាំងស្រុង កាលពីរសៀលថ្ងៃទី១៨មករានេះ។ អគ្គិភ័យបានឆាបឆេះយ៉ាងសន្ធោសន្ធៅ កាលពីវេលាម៉ោងជាង ១ រសៀលថ្ងៃនេះ នៅជាប់ផ្លូវជាតិលេខ ៥ ជួរខាងមាត់ទន្លេ ក្នុងសង្កាត់ច្រាំងចំរេះ ២ ខាងក្រោយអធិការដ្ឋាននគរបាលខណ្ឌប្ញស្សីកែវ។ ផ្ទះឆេះធ្វើពីឈើ ថ្មនិងផ្ទះខ្លះប្រក់ស័ង្កសី នៅតំបន់ច្រាំងចំរេះទាំងនោះ ទើបតែត្រូវភ្លើងឆាបឆេះម្តងរួចមកហើយកាលពីឆ្នាំមុន។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់លី ម៉េងហួរ
ផ្ទះអ្នកភូមិនៅសង្កាត់ច្រាំងចំរេះទី២ ក្នុងទីក្រុងភ្នំពេញ ដែលជាតំបន់បងប្អូនខ្មែរអ៊ីស្លាមភាគច្រើនរស់នៅ ត្រូវបានភ្លើងឆេះបំផ្លាញ សល់តែផេះកាលពីរសៀលថ្ងៃអង្គារនេះ។ សោកនាដកម្មដ៏សោកសៅដែលកើតឡើងកាលពីម៉ោងជាង ១ រសៀលថ្ងៃនេះ បានបណ្តាលឲ្យផ្ទះប្រមាណ ៦៧ ខ្នង ត្រូវភ្លើងលេបត្របាក់រាបដល់ដី។
ឡានទឹកចំនួន ២០ គ្រឿង ត្រូវបានបញ្ជូនទៅអន្តរាគមន៍ ដោយបានប្រើប្រាស់ទឹកអស់ជិត ៥០ ឡាន។ ដោយហេតុថា ទីកន្លែងភ្លើងឆេះនោះ មានលក្ខណៈតូចចង្អៀតពេក នាំឲ្យឡានទឹកពិបាកចូលអន្តរាគមនិងត្រូវប្រើពេលប្រហែលជា ២ ម៉ោង ទើបភ្លើងត្រូវបានពន្លត់ ខណៈដែលផ្ទះទាំងនោះ ក៏ត្រូវឆេះអស់រលីង។
ចំណែកមូលហេតុ ដែលបណ្តាលឲ្យមានអគ្គិភ័យនេះ កើតឡើង ត្រូវបានលោកឧត្តមសេនីយ៍ត្រី ទូច ណារ៉ុថ ស្នងការនគរបាលរាជធានីភ្នំពេញ ដែលបានចុះដល់កន្លែងកើតហេតុ ប្រាប់វិទ្យុបារាំងអន្តរជាតិថា អាជ្ញាធរមិនទាន់ដឹងពីមូលហេតុផ្លូវការ ដែលបង្កអគ្គិភ័យនេះទេ។ ប៉ុន្តែការសន្និដ្ឋានជាជំហានដំបូង អគ្គិភ័យនោះ បណ្តាលមកពីផ្ទះលក់កាហ្វេ ដែលនៅជាប់នឹងអធិការដ្ឋាននគរបាលខណ្ឌប្ញស្សីកែវ។
យ៉ាងណាក៏ដោយ របាយការណ៍បឋមរបស់ប៉ូលិស បង្ហាញថា ហេតុការណ៍ឆេះផ្ទះនៅច្រាំងចំរេះ កាលពីរសៀលថ្ងៃមិញ កើតឡើង ដោយមានជនបង្ក ហើយប៉ូលិសកំពុងស្រាវជ្រាវករណីនេះ។ ជាការកត់សម្គាល់ កាលពីឆ្នាំមុន នៅច្រាំងចំរេះ ដែលជាកន្លែងរស់នៅប្រមូលផ្តុំរបស់បងប្អូនខ្មែរអ៊ីស្លាម នៅជួរមាត់ទន្លេសាប ជាប់ផ្លូវជាតិលេខ៥ ត្រូវបានភ្លើងឆេះម្តងរួចមកហើយ។ ភ្លើងឆេះកាលណោះ បណ្តាលឲ្យខូចខាតផ្ទះនិងទ្រព្យសម្បត្តិច្រើនជាងពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ