លោក កឹម សុខា បញ្ជាក់ពីជំហររួបរួមក្នុងសម្ព័ន្ធភាពនយោបាយថ្មី
នៅថ្ងៃច័ន្ទនេះ លោក កឹម សុខា ប្រធានគណបក្សសិទ្ធិមនុស្ស បញ្ជាក់ជំហរនយោបាយរបស់ខ្លួន ជូនសាធារណមតិ ដោយការបដិសេធនូវដំណឹងពីការរួបរួមជាមួយព្រះអង្គម្ចាស់ នរោត្តម រណឫទ្ធិ។ ក៏ប៉ុន្តែលោក កឹម សុខា ដែលជាសកម្មជនសិទ្ធិមនុស្ស បានប្រកាសបន្តផែនការចងសម្ព័ន្ធភាពជាមួយគណបក្ស សម រង្ស៊ី។ សម្ព័ន្ធភាពគណបក្សប្រឆាំង ដែលមានអាយុជិត ២ ឆ្នាំហើយ ប៉ុន្តែហាក់ដូចជា មានតែឈ្មោះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លី ម៉េងហួរ ពីទីក្រុងភ្នំពេញ
ក្នុងសន្និសីទកាសែត នៅព្រឹកថ្ងៃចន្ទ ទី១៣ធ្នូនេះ លោក កឹម សុខា បានប្រកាសបដិសេធ ចំពោះដំណឹងដែលថា រូបលោកសន្យារួបរួមជាមួយគណបក្សព្រះអង្គម្ចាស់ នរោត្តម រណឫទ្ធិ។ ក៏ប៉ុន្តែលោក កឹមសុខា ដែលធ្លាប់ជាអតីតសមាជិកគណបក្សហ្វ៊ុនស៊ិនប៉ិច ក្រោមការគ្រប់គ្រងរបស់ព្រះអង្គម្ចាស់ រណឫទ្ធិ ក៏មិនបដិសេធទាំងស្រុងនឹងចងសម្ព័ន្ធមេត្រីភាពជាមួយព្រះអង្គម្ចាស់ឡើយ។ ពោលគឺលោក កឹមសុខា រង់ចាំមើលជំហររបស់ព្រះអង្គម្ចាស់នរោត្តម រណឫទ្ធិ ក្នុងឆាកនយោបាយថ្មីរបស់ព្រះអង្គនាពេលនេះ។
តាមលោក កឹម សុខា បើសិនព្រះអង្គម្ចាស់ មិនធ្វើជាឈ្នាន់របស់គណបក្សប្រជាជនកម្ពុជា ដូចមុន នោះគណបក្សសិទ្ធិមនុស្សរបស់លោក នឹងពិចារណា ចរចាជាមួយព្រះអង្គម្ចាស់។
ចំណែកសម្ព័ន្ធភាពរវាងគណបក្សសិទ្ធិមនុស្ស ជាមួយគណបក្សសមរង្ស៊ីវិញ ត្រូវបានលោក កឹម សុខា លើកឡើងថា គណបក្សប្រឆាំងទាំងពីរ នៅតែបន្តក្នុងការជជែក ដើម្បីបង្រួបបង្រួមគ្នា។ ក៏ប៉ុន្តែសម្ព័ន្ធភាពរយៈពេលជិតពីរឆ្នាំ គិតចាប់ពីថ្ងៃ១៥មករា ឆ្នាំ២០០៩ មានត្រឹមតែគោលការណ៍ប៉ុណ្ណោះ។
ការមិនទាន់ចូលដល់សម្ព័ន្ធភាពពេញលេញរវាងគណបក្សប្រឆាំងសមរង្ស៊ី និងសិទ្ធិមនុស្ស ត្រូវបានលោក កឹម សុខា បន្ទោសលើគណបក្សសមរង្ស៊ី។ គណបក្សសមរង្ស៊ី ដែលមានបញ្ហាផ្ទៃក្នុង រួមទាំងអវត្តមានរបស់លោកប្រធាន សម រង្ស៊ី ពីក្នុងប្រទេស ជាដើម។
យ៉ាងណាក៏ដោយ នៅថ្ងៃនេះ លោក សុន ឆ័យ ប្រធានក្រុមអ្នកតំណាងរាស្ត្រគណបក្សសមរង្ស៊ី បានអះអាងថា អវត្តមានរបស់លោកប្រធានសមរង្ស៊ី មិននៅក្នុងស្រុកពេលនេះ មិនមែនជាឧបសគ្គអ្វីធ្ងន់ធ្ងរ ដែលរារាំងដល់ការជជែកបន្តសម្ព័ន្ធភាពរវាងគណបក្សសមរង្ស៊ី និងគណបក្សសិទ្ធិមនុស្សឡើយ។ ម្យ៉ាងវិញទៀត តាមលោក សុន ឆ័យ ទោះបីជាសម្ព័ន្ធភាពគណបក្សប្រឆាំង មិនទាន់រកវិធីសមស្របណាមួយ ដើម្បីសហការគ្នាបានល្អ ក៏ប៉ុន្តែគណបក្សទាំងពីរ មានជំហរនយោបាយល្អប្រហាក់ប្រហែលគ្នា ដើម្បីរៀបចំខ្លួនចូលរួម ក្នុងការបោះឆ្នោត នៅឆ្នាំ២០១២ និងឆ្នាំ២០១៣ ខាងមុខ។
ទាក់ទងនឹងចរន្តរួបរួមសម្ព័ន្ធភាពនេះ កាលពីថ្ងៃ១២ធ្នូម្សិលមិញ គណបក្សហ្វ៊ុនស៊ិនប៉ិច ច្រានចោលសំណើបង្រួបបង្រួមជាមួយគណបក្សនរោត្តម រណឫទ្ធិ ដើម្បីបង្កើតគណបក្ស ហ្វ៊ុនស៊ិនប៉ិច ៨១ តាមការផ្តួចផ្តើមរបស់ព្រះអង្គម្ចាស់ នរោត្តម រណឫទ្ធិ។
នៅថ្ងៃនេះ គណបក្ស នរោត្តម រណឫទ្ធិ បានចេញសេចក្តីថ្លែងការណ៍ ដោយសម្តែងការសោកស្តាយ និងចាត់ទុកការច្រានចោលសំណើបង្រួបបង្រួមគណបក្សរាជានិយមថ្មី របស់ បងប្អូនគូសត្រូវទាំងពីរ ថាគ្រាន់តែជាលេសរបស់គណបក្សហ្វ៊ុនស៊ិនប៉ិចប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ