មួរ សុខហួរ៖រឹបអូសប្រាក់ខែបានតែខ្ញុំមិនផ្លាស់ប្តូរជំហរទេ
ដោយសារតែលោកស្រីមួរ សុខហួរតំណាងរាស្ត្រគណបក្សសម រង្ស៊ីមិនព្រមបង់ប្រាក់សងជំងឺចិត្តទៅអោយលោកនាយករដ្ឋមន្ត្រីហ៊ុន សែនតាមការសម្រេចរបស់តុលាការ ចៅក្រមសាលាដំបូងរាជធានីភ្នំពេញបានចេញដីការរឹបអូសកាត់ប្រាក់បំណាច់រដ្ឋសភារបស់លោកស្រីមួរ សុខហួរ។លោកស្រីមួរ សុខហួរអត្ថាធិប្បាយថាតុលាការអាចបង្ខំកាត់យកប្រាក់បំណាច់របស់លោកស្រីបាន តែមិនអាចអោយលោកស្រីផ្លាស់ប្តូរជំហររបស់លោកស្រីបានឡើយ។
ចុះផ្សាយនៅថ្ងៃ៖
សេចក្តីរាយការណ៍របស់ លាងដឺលុច
ចៅក្រមតុលាការដំបូងរាជធានីភ្នំពេញបានចេញដីកាមួយកាលពីថ្ងៃទី២០ខែកក្ដដា សម្រេចកាត់យកប្រាក់បំណាច់រដ្ឋសភារបស់លោកស្រីមួរ ហុខហួរដើម្បីផ្តល់ទៅអោយដើមបណ្តឹងគឺលោកនាយករដ្ឋមន្ត្រីហ៊ុន សែន បន្ទាប់ពីលោកស្រីមួរ សុខហួរចាញ់ក្តី ហើយមិនព្រមបង់ប្រាក់សំណងជំងឺចិត្តនោះ។ លោកចៅក្រមជា សុខហៀងនៃសាលាដំបូងរាជធានីភ្នំពេញបានសម្រេចរឹបអូសប្រាក់របស់លោកស្រីមួរ សុខហួរនៅនាយកដ្ឋានហិរញ្ញវត្ថុរបស់រដ្ឋសភាក្នុងមួយខែចំនួន៤លាន២សែនរៀល ដែលមានតំលៃប្រហាក់ប្រហែល១០០០ដុល្លារ។ យោងតាមការបង្ហាញរបស់ចៅក្រមជា សុខហៀង តារាងប្រាក់បំណាច់សរុបរបស់លោកស្រីមួរ សុខហួរចុះថ្ងៃទី១៥កក្កដាឆ្នាំ២០១០ មានចំនួន៧លាន៣សែនរៀលដែលមានតម្លៃប្រហាក់ប្រហែល១៨០០ដុល្លារ។
យោងតាមការសម្រេចរបស់ចៅក្រម ការកាត់រឹបអូសយកចំណែកនៃប្រាក់បំណាច់សភារបស់លោកស្រីមួរ សុខហួរនឹងត្រូវអនុវត្តរហូតដល់គ្រប់ចំនួនប្រាក់សំណងជំងឺចិត្ត។ តុលាការបានសម្រេចអោយលោកស្រីមួរ សុខហួរបង់ប្រាក់សំណងជំងឺចិត្តនេះចំនួន៨លានរៀលទៅអោយលោកនាយករដ្ឋមន្ត្រី។ យោងតាមដីកាសម្រេចរឹបអូសកាត់ប្រាក់ខែរបស់លោកស្រីមួរ សុខហួរដដែល ចៅក្រមបានបញ្ជាក់មិនអោយលោកស្រីមួរ សុខហួររារាំងឬហាមឃាត់មន្ត្រីទទួលបន្ទុកបើកប្រាក់បៀវត្សនៅរដ្ឋសភាចំពោះសិទ្ធិលើបំណុលដែលត្រូវរឹបអូសនោះឡើយ។
ចំពោះបញ្ហានេះ លោកស្រីមួរ សុខហួរបានអត្ថាធិប្បាយថា នេះជាការអនុវត្តដោយបង្ខំរបស់តុលាការដែលលោកស្រីមិនអាចជំទាស់បាន។ លោកស្រីបានបញ្ជាក់ថា តុលាការអាចរឹបអូសប្រាក់បំណាច់របស់លោកស្រីបាន។ ក៏ប៉ុន្តែមិនមែនមានន័យថាលោកស្រីយល់ព្រមចាញ់ក្តីមួយនេះនោះទេ។ លោកស្រីមួរ សុខហួរបន្តថាជំហរលោកស្រីនៅដដែល ដោយចាត់ទុកថាការកាត់ក្តីនេះមិនយុត្តិធម៌ ហើយលោកស្រីអំពាវនាវអោយតុលាការត្រូវសឯករាជ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ