ប្រាសាទតាក្របីស្ថិតក្នុងដីខ្មែរ
ក្រសួងការបរទេសកម្ពុជាទើបបានឆ្លើយតបកំណត់ទូតរបស់ក្រសួងការបរទេសថៃកាលពីចុងខែមេសាកន្លងទៅនេះ ច្រានចោលការអះអាងរបស់រដ្ឋាភិបាលថៃដែលថា កម្ពុជាបានសង់កន្ត្រកយោងឡើងភ្នំក្បែរប្រសាទតាក្របីនៅក្នុងទឹកដីថៃ។ កម្ពុជាបានប្រតិកម្មថា រដ្ឋាភិបាលថៃចេះតែចោទប្រកាន់គ្មានមូលដ្ឋាន។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លាងដឺលុច ពីទីក្រុងភ្នំពេញ
ក្រសួងការបរទេសថៃបានធ្វើកំណត់ទូតផ្ញើមកស្ថានទូតកម្ពុជាប្រចាំទីក្រុងបាងកកតាំងពីថ្ងៃ៩ខែមេសាមកម្លេះ។ ខ្លឹមសារនៃកំណត់ទូតរបស់ក្រសួងការបរទេសថៃបានសរសេរចោទប្រកាន់ថា កងទ័ពកម្ពុជាបានសាងសង់កន្ត្រកយោងឡើងភ្នំក្នុងតំបន់ប្រាសាទតាក្របីនៅក្នុងទឹកដីថៃរបស់គេ។
គួររបញ្ជាក់ថាតំបន់ខ្សែព្រំដែនកម្ពុជាថៃភាគច្រើនគឺជាតំបន់ជួរភ្នំដងរែក។ហើយជាលក្ខណៈភូមិសាស្ត្រនោះ គឺប៉ែកខាងកម្ពុជាមានលក្ខណៈចោទខ្លាំង។អីចឹងហើយក្នុងរយៈពេលនៃការតស៊ូប្រឆាំងការឈ្លានពានរបស់កងទ័ពថៃកន្លងមកហើយដែលកងទ័ពខ្មែរត្រូវនៅតាំងទីប្រចាំការតាមតំបន់លើភ្នំទាំងនោះ កងទ័ពកម្ពុជានៅតាមកន្លែងមួយចំនួន ដូចជានៅតំបន់ភ្នំទ្រព្យ នៅតាមាន់ ក៏ដូចនៅខាងប្រាសាទតាក្របីនោះកងទ័ពបានធ្វើជាកន្ត្រកយោងពីក្រោមឡើងទៅលើដើម្បីដឹកជញ្ជូនសម្ភារៈប្រើប្រាស់នៅទីប្រចាំការនៅលើជួរភ្នំ។
សេចក្តីពន្យល់របស់កម្ពុជាដូចរាល់ដងដែរ គឺយោងតែទៅលើឯកសារផ្លូវច្បាប់តែប៉ុណ្ណោះ។ កម្ពុជាបានច្រានចោលយ៉ាងដាច់អហង្ការការចោទប្រកាន់របស់រដ្ឋាភិបាលថៃ ដែលថាប្រាសាទតាក្របី និងការសាងសង់ខ្សែរ៉កយោងកន្ត្រកឡើងលើភ្នំនោះ ស្ថិតនៅក្នុងបូរណភាពដែនដីថៃ។
នៅក្នុងកំណត់ទូតរបស់ខ្លួនដែលបានសរសេរផ្ញើទៅរដ្ឋាភិបាលថៃវិញកាលពីថ្ងៃទី៣០មេសា ក្រសួងការបរទេសកម្ពុជាបានប្រាប់ទៅភាគីថៃថា ប្រាសាទតាក្របីពិតជាស្ថិតនៅក្នុងបូរណភាពដែនដីខ្មែរ នេះដោយយោងទៅលើទី១ សន្ធិសញ្ញាបារាំងសៀមឆ្នាំ១៩០៧ ទី២ គឺផែនទីខ្នាត១លើ៥០ពាន់ ដែលព្រមព្រៀងគ្នាដោយក្រុមបច្ចេកទេសស្វែងរកបង្គោលព្រំដែនកម្ពុជាថៃ និងទី៣ សូម្បីតែផែនទីឯកតោភាគីរបស់ថៃ ដែលជាផែនទីមិនផ្លូវការ មិនត្រូវបានទទួលស្គាល់ជាអន្តរជាតិនោះ ក៏បង្ហាញថា ប្រាសាទតាក្របីស្ថិតនៅក្នុងទឹកដីកម្ពុជាដែរ។ នេះនិយាយពីប្រាសាទតាក្របី។ បើនិយាយពីកន្ត្រកយោងឡើងលើដែលថៃជំទាស់នោះវិញ ក្រសួងការបរទេសកម្ពុជាបានសរសេរឆ្លើយប្រាប់ថៃវិញថា ខ្សែរ៉កយោងកន្ត្រកឡើងលើភ្នំនោះ ត្រូវបានសាងសង់ជ្រៅក្នុងដីខ្មែរចំងាយ៥០០ម៉ែត្រពីប្រាសាទតាក្របីមកទៀត។ ដូច្នេះសរុបមកវិញ ទាំងប្រាសាទតាក្របី និងកន្ត្រកយោង គឺស្ថិតនៅក្នុងទឹកដីខ្មែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ