ILO ៖ នៅកម្ពុជា កម្មករជាង ១៥០០នាក់ ស្លាប់រៀងរាល់ឆ្នាំ ដោយសារគ្រោះថ្នាក់ការងារ
អង្គការពលកម្មអន្តរជាតិ ហៅ កាត់ជាភាសាអង់គ្លេសថា ILO បានប្រកាសថា នៅក្នុងប្រទេសកម្ពុជា មនុស្សជាង ១៥០០ នាក់ ត្រូវបានគេប៉ាន់ប្រមាណថា បាន ស្លាប់ជារៀងរាល់ឆ្នាំ ដោយសារគ្រោះថ្នាក់ ដែលពាក់ព័ន្ធនឹងការងារ។ មានន័យ ថា មានមនុស្ស ៤ នាក់ បានស្លាប់ក្នុងថ្ងៃ នៅកន្លែងធ្វើការ នៅកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ លី ម៉េងហួរ
ជារៀងរាល់ឆ្នាំ មានមនុស្សជាង ១៥០០ នាក់ បានស្លាប់ ដោយសារតែគ្រោះថ្នាក់ការងារ។ ពោលគឺមនុស្ស ៤ នាក់ បានស្លាប់ ក្នុងមួយថ្ងៃ ដោយសារតែគ្រោះថ្នាក់នៅកន្លែងធ្វើការ នៅក្នុងប្រទេសកម្ពុជា។ នេះបើយោងតាមសេចក្តីប្រកាសរបស់អង្គការពលកម្មអន្តរជាតិ ILO ដែលបានចេញផ្សាយនៅថ្ងៃព្រហស្បតិ៍ ទី២៩ ខែមេសា ឆ្នាំ២០១០។
គ្រោះថ្នាក់នៅកន្លែងធ្វើការ ដែល ILO បានលើកឡើងខាងលើ ត្រូវបានមន្ត្រីជំនាញរបស់រដ្ឋាភិបាល និងសហជីពកម្មករ សម្តែងការយល់ស្រប។
ប្រធាននាយកដ្ឋានពេទ្យការងាររបស់ក្រសួងការងារ និងបណ្តុះបណ្តាលវិជ្ជាជីវៈ លោក ឡេង តុង បានលើកឡើងថា គ្រាន់តែនៅក្នុងឆ្នាំ២០០៩ មានកម្មករប្រមាណ ៣០០០ នាក់ បានទទួលរងគ្រោះថ្នាក់ដ៏ធ្ងន់ធ្ងរ ពាក់ព័ន្ធនឹងការងារនៅកម្ពុជា។
ចំណែកឯ លោក អាត់ ធន់ ប្រធានសហភាពសហជីពការងារ ដែលធ្វើការលើវិស័យកាត់ដេរ ទេសចរណ៍ និងវិស័យសំណង់ ក៏បានលើកឡើងថា ជាទូទៅ អ្នកនិយោគដែលមកបណ្តាក់ទុននៅកម្ពុជា មិនសូវជាគិតគូរ អំពីបញ្ហាសុខភាពរបស់កម្មករប៉ុន្មានទេ។ ចំណែករដ្ឋាភិបាលវិញ ក៏មានការយកចិត្តទុកដាក់តិចតួចបំផុតលើសុខភាពរបស់កម្មករ។
លោក អាត់ ធន់ បានបន្ថែមថា វិស័យសំណង់ អគារខ្ពស់ៗ ដែលបានរីកដុះដាលយ៉ាងលឿនក្នុងរយៈពេលប៉ុន្មានឆ្នាំចុងក្រោយនេះ បាននាំមុខគេ លើផ្នែកគ្រោះថ្នាក់នៅកន្លែងធ្វើការងារ។ គ្រោះថ្នាក់ពេលបំពេញការងារ ដោយសារតែកន្លែងធ្វើសំណង់ទាំងនោះ គ្មានប្រព័ន្ធការពារសុវត្ថិភាព។ ជាងនេះទៅទៀត នៅពេលកម្មករ ជួបគ្រោះថ្នាក់ រហូតដល់ស្លាប់ ក៏មិនមានការបង់ប្រាក់ទូទាត់ ឲ្យបានត្រឹមត្រូវដែរ។
ក្រៅពីវិស័យសំណង់ គ្រោះថ្នាក់នៅកន្លែងការងារ ក៏កើតនៅខាងការងារក្នុងឡឥដ្ឋ នេសាទ និងកាត់ដេរ ព្រមទាំងតាមបណ្តាក្រុមហ៊ុន គ្រឹះស្ថាន សហគ្រាសតូចៗ ដែលមិនមានការរៀបចំប្រព័ន្ធសុវត្ថិភាពនៅកន្លែងធ្វើការឲ្យបានត្រឹមត្រូវល្អ។
នៅក្នុងវិស័យកាត់ដេរ ត្រូវបានលោក អាត់ ធន់ អត្ថាធិប្បាយថា ជារឿយៗ តែងតែមានកម្មករត្រូវដាច់ដៃ និងគ្រោះថ្នាក់ដោយសារជាតិគីមី ធ្វើឲ្យប៉ះពាល់ដល់សុខភាពកម្មករ ហើយកម្មករខ្លះទៀត ត្រូវជួបនឹងគ្រោះថ្នាក់ចរាចរណ៍ នៅពេលចេញ-ចូលធ្វើការក្នុងរោងចក្រ ជាដើម។
ចំពោះមុខហានីភ័យគ្រោះថ្នាក់ការងារ ដែលកំពុងកើតមាននាពេលបច្ចុប្បន្ន រដ្ឋាភិបាល និងអង្គការពលកម្មអន្តរជាតិ បានធ្វើការផ្សព្វផ្សាយ និងអប់រំដល់កម្មករ ព្រមទាំងថៅកែ អំពីវិធានការនានា។
យុទ្ធនាការមួយ នឹងត្រូវរដ្ឋាភិបាល និងអង្គការពលកម្មអន្តរជាតិ រៀបចំឡើង ដោយការជួបជុំ និងការដើរដង្ហែក្បួន នៅទីរួមខេត្តកំពត នាព្រឹកថ្ងៃទី៣០ ខែមេសា ឆ្នាំ២០១០។ ការជួបជុំ ដែលមានមនុស្សចូលរួមប្រមាណ ៣៥០ នាក់ ធ្វើឡើងចំថ្ងៃ នៃការប្រារព្ធទិវាពិភពលោក ដើម្បីសុខភាព និងសុវត្ថិភាព នៅកន្លែងធ្វើការ។ នៅកម្ពុជា ទិវានេះ នឹងធ្វើឡើង ក្រោមប្រធានបទ “យល់ដឹងពីហានីភ័យនៃសុខភាព និងសុវត្ថិភាពរបស់អ្នក និងការពារកុំឲ្យមានគ្រោះថ្នាក់នៅកន្លែងធ្វើការ”។
សេចក្តីប្រកាសរបស់អង្គការពលកម្មអន្តរជាតិ ចេញផ្សាយបន្ទាន់ នៅថ្ងៃទី២៩មេសានេះ បានបង្ហាញថា ការជួបជុំហែក្បួន នៅទីរួមខេត្តកំពត នាព្រឹកស្អែក ជាការពង្រីកយុទ្ធនាការផ្សព្វផ្សាយ ស្តីពី ហានីភ័យ និងសុវត្ថិភាពការងារ ទៅដល់ថ្នាក់ខេត្ត ដោយមានការជួបជុំថ្លែងការណ៍ បដាពាក្យស្លោក និងបិទផ្សាយនូវប័ណ្ណព័ត៌មាន ក្នុងគោលដៅលើកកម្ពស់ការយល់ដឹងជាសាធារណៈអំពីសារៈសំខាន់នៃសុខភាព និងសុវត្ថិភាពការងារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ