សង្គមស៊ីវិលប្រឆាំងនឹងការប៉ុនប៉ងដកបង្គោលព្រំដែនកម្ពុជា-ថៃ
ក្រុមអង្គការសង្គមស៊ីវិល និងសហជីពនៅកម្ពុជា ចំនួន ៥៨ ស្ថាប័ន បានចេញ សេចក្តីថ្លែងការណ៍រួម ដើម្បីថ្កោលទោស និងប្រឆាំងក្រុមបាតុករអាវលឿង ដែលគាំទ្ររដ្ឋាភិបាលថៃ ចំពោះការប៉ុនប៉ងដកបង្គោលព្រំដែននៅជិតប្រាសាទតាមាន់របស់ កម្ពុជា នាដើមខែឧសភាខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីថ្លែងការណ៍រួមរបស់ក្រុមសមាគមអង្គការក្រៅរដ្ឋាភិបាល និងសហជីពកម្ពុជា ដែលមានជំហរគាំទ្ររដ្ឋាភិបាលកម្ពុជា បានថ្កោលទោសយ៉ាងខ្លាំងចំពោះការប្រកាសរបស់ប្រធានគណៈកម្មការបណ្តាញប្រជាជនថៃប្រឆាំងអំពើពុករលួយ លោក វីរៈ សុមខ្វាមឃិត ដែលថ្លែងកាលពីថ្ងៃទី១៥ ខែមេសា ឆ្នាំ២០១០ ចុះផ្សាយតាមរយៈបណ្តាញព័ត៌មានថៃថា នឹងធ្វើដំណើរទៅប្រមូលផ្តុំនៅប្រាសាទតាមាន់តូច នៅថ្ងៃទី១ ខែឧសភា ក្នុងគោលបំណងដកបង្គោលព្រំដែនកម្ពុជា-ថៃ នៅថ្ងៃទី២ និងទី៣ ខែឧសភា ឆ្នាំ២០១០ ខាងមុខ។
ការលើកឡើងនេះ ត្រូវបានក្រុមសមាគមអង្គការក្រៅរដ្ឋាភិបាល និងសហជីពកម្ពុជា បានចាត់ទុកថា ជាការលើកឡើងយ៉ាងងងឹតងងុល របស់ពួកវង្វេងប្រវត្តិសាស្ត្រថៃមួយក្តាប់តូច និងជាទង្វើបំពានច្បាប់ ក្នុងគោលបំណងឈ្លានពានទឹកដីកម្ពុជា។
ក្រុមអង្គការសង្គមស៊ីវិល និងសហជីពកម្ពុជា ក៏បានកត់សម្គាល់ថា ទង្វើរបស់មេដឹកនាំអង្គការសង្គមស៊ីវិលថៃនេះ បានរំលោភបំពានដល់សាលដីកាតុលាការយុត្តិធម៌អន្តរជាតិ ទីក្រុងឡាអេ ឆ្នាំ១៩៦២ ដែលព្រះមហាក្សត្រថៃ ក៏បានទទួលស្គាល់ និងគោរពកន្លងមក។ ម្យ៉ាងវិញទៀត ទង្វើរបស់មេដឹកនាំសង្គមស៊ីវិលថៃនេះ ជាឧបករណ៍បង្កភាពតានតឹងផ្នែកនយោបាយបន្ថែមទៀតរវាងកម្ពុជា-ថៃ ហើយក៏ដើម្បីបិទបាំងនូវវិបត្តិនយោបាយផ្ទៃក្នុងយ៉ាងធ្ងន់ធ្ងររបស់ប្រទេសថៃ ដោយបង្វែរសភាពការណ៍វិបត្តិផ្ទៃក្នុងថៃ មកជាបញ្ហាព្រំដែនជាមួយកម្ពុជាវិញ។
សេចក្តីថ្លែងការណ៍រួម ដែលធ្លាក់ដល់ដៃអ្នកកាសែត នៅថ្ងៃទី២៣ ខែមេសា ឆ្នាំ២០១០ បានគូសបញ្ជាក់ថា យោងតាមកំណត់ហេតុនៃការបោះបង្គោលសីមាលេខ ២៣ លើតំបន់ ៤ នៃគណៈកម្មការខណ្ឌសីមាព្រំដែនរវាងឥណ្ឌូចិន និងសៀម ឆ្នាំ១៩០៨ បានបញ្ជាក់យ៉ាងច្បាស់ថា ប្រជុំប្រាសាទតាមាន់ ស្ថិតនៅក្នុងដែនដីប្រទេសកម្ពុជា។
ក្រុមអង្គការសង្គមស៊ីវិល និងសហជីពនៅកម្ពុជា ក៏បានបញ្ជាក់នូវការគាំទ្រជំហរម៉ឹងម៉ាត់របស់លោកនាយករដ្ឋមន្ត្រី ហ៊ុន សែន ក្នុងការអនុវត្តន៍សិទ្ធិស្វ័យការពារបូរណភាពទឹកដី នៅចំពោះមុខសត្រូវឈ្លានពានបរទេស ដែលតែងតែប៉ុនប៉ងលេបត្របាក់ទឹកដីកម្ពុជា។ នោះគឺកងទាហានកម្ពុជា ត្រូវប្រើប្រាស់នូវគ្រាប់កាំភ្លើង ទប់ទល់នឹងបាតុករថៃ ប្រសិនបើបង្កបញ្ហានៅព្រំដែនកម្ពុជា-ថៃ ដែលកំពុងមានជម្លោះ។
ជម្លោះព្រំដែនកម្ពុជា-ថៃ ក៏ត្រូវបានលោក រ៉ុង ឈុន ប្រធានសមាគមគ្រូបង្រៀនកម្ពុជា ប្រកាសយកថ្ងៃ១៥កក្កដា ជាថ្ងៃចងកំហឹង ចំពោះព្រឹត្តិការណ៍កងទាហានថៃ ដែលបានចូលឈ្លានពាន រំលោភលើបូរណភាពទឹកដីកម្ពុជា ចាប់តាំងពីថ្ងៃទី១៥ កក្កដា ឆ្នាំ២០០៨៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ