ក្រសួងព័ត៌មានប្រកាសចាប់ផ្តើមធ្វើសេចក្តីព្រាងច្បាប់ស្តីពីសិទ្ធិទទួលបានព័ត៌មាន
លោក ខៀវ កាញារីទ្ធ រដ្ឋមន្ត្រីក្រសួងព័ត៌មានបានប្រកាសចាប់ផ្តើមធ្វើសេចក្តីព្រាងច្បាប់ស្តីពីសិទ្ធិទទួលបានព័ត៌មានហើយ បន្ទាប់ពីគម្រោងរៀបចំច្បាប់នេះត្រូវបានសិក្សា និងចូលរួមពិភាក្សាពីស្ថាប័នពាក់ព័ន្ធនានារួចមក។ លោក រដ្ឋមន្ត្រីបានប្រកាសដូច្នេះ នៅក្នុងពិធីចុះហត្ថលេខាលើអនុស្សរណៈនៃការយោគយល់គ្នា រវាងក្រសួងព័ត៌មាន និងអង្គការយូណេស្កូ ស្តីពីគម្រោងរៀបចំច្បាប់សិទ្ធិទទួលបានព័ត៌មាន នៅទីស្តីការក្រសួងព័ត៌មាន នៅរសៀលថ្ងៃសុក្រ ទី ៣០ ឧសភានេះ។ អង្គការយូណេស្កូ និងប្រទេសស៊ុយអែត ក៏នឹងចូលរួមជួយដល់ការធ្វើសេចក្តីព្រាងច្បាប់ថ្មីនេះផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៥
បន្ទាប់ពីបានសិក្សាស្រាវជ្រាវ និង ពិភាក្សាជាមួយស្ថាប័នពាក់ព័ន្ធជាច្រើនរួចមក ទីបំផុតទៅច្បាប់ស្តីពីសិទ្ធិទទួលបានព័ត៌មានត្រូវបានប្រកាសចាប់ផ្តើមធ្វើសេចក្តីព្រាងជាផ្លូវការហើយ។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មានបានមានប្រសាសន៍ឲ្យដឹងថា ក្រសួងព័ត៌មានបានចាប់ផ្តើមដំណើរការរៀបចំធ្វើសេចក្តីព្រាងច្បាប់នេះចាប់ពីថ្ងៃនេះតទៅ ហើយក្រសួងក៏បានធ្វើកិច្ចការមួយចំនួនរួចហើយដែរសម្រាប់ជំហានឆ្ពោះទៅធ្វើសេចក្តីព្រាងនេះ។ ជាមួយការចាប់ផ្តើមធ្វើសេចក្តីព្រាងនេះ រដ្ឋាភិបាលស៊ុយអ៊ែតបានឧបត្ថម្តថវិកាមួយលានដុល្លារដើម្បីទិញសម្ភារៈ និងឯកសារផ្សេងៗដើម្បីជួយដល់ដំណើរការធ្វើសេចក្តីព្រាងច្បាប់។
លោករដ្ឋមន្ត្រីបានលើកឡើងថា ដើម្បីធ្វើសេចក្តីព្រាងច្បាប់នេះ ក្រសួងនឹងបង្កើតក្រុមការងារមួយដើម្បីរៀបចំចងក្រងឯកសារនានា ហើយក្រសួងនឹងជួបប្រជុំជាមួយតំណាងអង្គការយូណេស្កូ ប្រទេសស៊ុយអ៊ែត តំណាងការិយាល័យអង្គការសហប្រជាជាតិទទួលបន្ទុកសិទ្ធិមនុស្ស នៅកម្ពុជា សមាគមអ្នកកាសែត និងអង្គការសង្គមស៊ីវិលមួយចំនួនទៀតដើម្បីរៀបចំច្បាប់នេះ។
លោក ស្រី អាន់ណា ម៉ៃហ៊ុលហ្គាដ ឯកអគ្គរាជទូតស៊ុយអ៊ែតប្រចាំនៅកម្ពុជា បានសម្តែងការគាំទ្រចំពោះការរៀបចំធ្វើសេចក្តីព្រាងច្បាប់ស្តីពីសិទ្ធិទទួលបានព័ត៌មាននេះ។ លោកស្រី លើកឡើងថា ច្បាប់នេះមានសារៈសំខាន់ណាស់ក្នុងការអនុវត្តន៍លទ្ធិប្រជាធិបតេយ្យនៅក្នុងប្រទេសកម្ពុជា។
ជាមួយគ្នានេះដែរ លោកស្រី ឡឺម៉ែត្រ អាន នាយិកាអង្គការយូណេស្កូប្រចាំនៅកម្ពុជា បានមានប្រសាសន៍ថា អង្គការយូណេស្កូក៏នឹងចូលរួមចំណែកក្នុងការធ្វើសេចក្តីព្រាងច្បាប់នេះផងដែរ។ លោកស្រីបន្តថា អង្គការយូណេស្កូមានវិធីសាស្ត្រ និងធ្វើការជិតស្និទ្ធជាមួយក្រសួងព័ត៌មានដើម្បីដំណើរការសេចក្តីព្រាងច្បាប់ថ្មីនេះ។
យ៉ាងណាមិញ លោក ខៀវ កាញារីទ្ធ បានបញ្ជាក់ថា ការធ្វើសេចក្តីព្រាងច្បាប់នេះអាចនឹងត្រូវការពេលវេលាប្រមាណបីឆ្នាំ ហើយការចំណាយមិនអាចកំណត់បាននោះទេ។យ៉ាងណាក៏ដោយ លោករដ្ឋមន្ត្រីបានអះអាងថា ច្បាប់ថ្មីនេះនឹងតម្រូវឲ្យមន្ត្រីផ្តល់ព័ត៌មានត្រូវតែផ្តល់ព័ត៌មានដល់អ្នកកាសែត និងប្រជាពលរដ្ឋ ហើយបើមិនផ្តល់នោះទេ នឹងត្រូវរងការស្តីបន្ទោសពីថ្នាក់លើ ទទួលរងវិន័យរដ្ឋបាល និងវិន័យព្រហ្មទណ្ឌផងដែរ។
លោក មឿន ឈានណារិទ្ធ នាយកវិទ្យាស្ថានកម្ពុជាសម្រាប់ការសិក្សាផ្នែកសារព័ត៌មាន បានស្វាគមន៍ការចាប់ផ្តើមធ្វើសេចក្តីព្រាងច្បាប់ទទួលបានព័ត៌មាននេះ។ ក៏ប៉ុន្តែ លោកបានលើកឡើងថា ច្បាប់នេះគួរចែងឲ្យច្បាស់ពីការចាត់ចំណាត់ថ្នាក់ព័ត៌មាន ដែលជាការសំងាត់ពិតប្រាកដ និងមិនសំងាត់ អាចឲ្យអ្នកកាសែត និងប្រជាពលរដ្ឋអាចទទួលយកបាន។
យ៉ាងណាក៏ដោយ លោក មឿន ឈានណារិទ្ធ សង្ឃឹមថា នៅពេលដែលច្បាប់នេះត្រូវបានអនុម័ត និងយកមកប្រើប្រាស់នេះ វាមិនត្រឹមតែលើកស្ទួយសិទ្ធិទទួលបានព័ត៌មានប៉ុណ្ណោះទេ តែវាក៏អាចចូលរួមលើកតម្តើងលទ្ធិប្រជាធិបតេយ្យនៅក្នុងប្រទេសកម្ពុជាផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ