ក្រសួង៥ដូររដ្ឋមន្ត្រីនៅថ្ងៃនេះ ៥ទៀតដូរនៅថ្ងៃស្អែក
មួយថ្ងៃក្រោយកិច្ចប្រជុំគណៈរដ្ឋមន្ត្រីខ្នាតវែង ក្រសួងចំនួន ៥ត្រូវបានប្រារព្ធពិធីផ្ទេរតំណែងដល់រដ្ឋមន្ត្រីថ្មី ដែលប្រព្រឹត្តិទៅនៅថ្ងៃប្រហស្បត្តិ៍នេះ ខណៈក្រសួង ៥ទៀត ត្រូវធ្វើពិធីនេះនៅថ្ងៃស្អែក។ លោកនាយករដ្ឋមន្ត្រី ហ៊ុន សែន បានធ្វើជាអធិបតីភាពនៃការផ្ទេរតំណែងរដ្ឋមន្ត្រីក្រសួងហិរញ្ញវត្ថុ ហើយឧបនាយករដ្ឋមន្ត្រី ៤រូបទៀតចែកគ្នាធ្វើជាអធិបតីតាមក្រសួងចំនួន ៤ផ្សេងទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៤
បន្ទាប់ពីកិច្ចប្រជុំគណៈរដ្ឋមន្ត្រីថ្មីជាលើកដំបូង កាលពីថ្ងៃពុធរយៈពេលជាង ៦ម៉ោង ការប្រកាសផ្ទេររដ្ឋមន្ត្រីត្រូវគេរៀបចំធ្វើឡើង យ៉ាងរួសរាន់នៅថ្ងៃព្រហស្បតិ៍ទី២៦ និងថ្ងៃសុក្រទី២៧ ខែកញ្ញា ឆ្នាំ២០១៣។
ក្រសួងចំនួន ១០ត្រូវបានប្រកាសផ្ទេរតំណែងដល់រដ្ឋមន្ត្រីថ្មីនោះរួមមាន ក្រសួងសេដ្ឋកិច្ចនិងហិរញ្ញវត្ថុ ក្រសួងអប់រំ យុវជន និងកីឡា ក្រសួងសង្គមកិច្ច អតីតយុទ្ធជននិង ក្រសួងពាណិជ្ជកម្ម ក្រសួងវប្បធម៌និងវិចិត្រសិល្បៈ ក្រសួងប្រៃសណីយ៍ និងទូរគមនាគមន៍ ក្រសួងឧស្សាហកម្ម និងថាមពល ក្រសួងបរិស្ថាន ក្រសួងកសិកម្មរុក្ខាប្រម៉ាញ់និងនេសាទ និងក្រសួងការងារនិងបណ្តុះបណ្តាលវិជ្ជាជីវៈ។ ការប្រកាសចៅក្រសួងថ្មីនេះ ក្រៅពីនាយករដ្ឋមន្ត្រីនៅក្រសួងហិរញ្ញវត្ថុ ឧបនាយករដ្ឋមន្ត្រីទាំង ៩រូបត្រូវចែកគ្នាធ្វើជាអធិបតីនៃការផ្ទេរតំណែងដែលមានរយៈពេលពីរថ្ងៃនេះ។
ការប្រកាសផ្ទេរតំណែងរដ្ឋមន្ត្រីយ៉ាងប្រញាប់ប្រញាល់នៅពេលនេះត្រូវគេមើលឃើញថាបានធ្វើឡើងដើម្បីឆ្លើយតបទៅនឹងការចង់បានរបស់ប្រមុខរដ្ឋាភិបាលដែលត្រូវការ ដើម្បីរូតរះបំពេញការងារកែទម្រង់គ្រប់បែបយ៉ាងឲ្យបានទាន់ដើមអាណត្តិ។ ការថ្លែងរបស់លោកនាយករដ្ឋមន្ត្រី រយៈពេលវែងកាលពីថ្ងៃពុធ ត្រូវអ្នកតាមដានសង្កេតសភាពការណ៍កម្ពុជាអបអរសាទរផងនិងមានការរិះគន់ផង។
ជាមួយគ្នានេះមេដឹកនាំគណបក្សសង្គ្រោះជាតិកាលពីថ្ងៃពុធ បានថ្លែងប្រាប់អ្នកការសែតថា គណបក្សប្រឆាំងដែលមានសម្លេងនៅក្នុងរដ្ឋសភាមួយនេះ មិនទទួលស្គាល់ទាំងរដ្ឋាភិបាល
និងរដ្ឋសភា ខណៈដែលការទាមទារឲ្យមានការស៊ើបអង្កេតឯករាជ្យមួយស្តីពីភាពមិនប្រក្រតីនៃការបោះឆ្នោតត្រូវនៅតែបន្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ