កម្ពុជាចុះកិច្ចព្រមព្រៀងទទួលយកជនភៀសខ្លួនពីអូស្ត្រាលីជាផ្លូវការ
ដូចការគ្រោងទុកនៅរសៀលថ្ងៃសុក្រនេះ លោក ស ខេង រដ្ឋមន្ត្រីក្រសួងមហាផ្ទៃកម្ពុជា និង លោក ស្កូត ម៉ូរីសុន(Scott Morrison) រដ្ឋមន្ត្រីក្រសួងអន្តោប្រវេសន៍និងការពារព្រំដែនអូស្ត្រាលីបានចុះអនុស្សរណៈនៃការយោគយល់គ្នាស្តីពីការតាំងទីលំនៅជនភៀសខ្លួននៅកម្ពុជា។ ក្រោយបញ្ចប់ការចុះហត្ថលេខា ភាគីទាំងពីរមិនបានអត្ថាធិប្បាយអ្វីនោះទេចំពោះការផ្ទេរជនភៀសខ្លួនពីអូស្ត្រាលីមកកាន់កម្ពុជានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
ក្រោយពីចុះហត្ថលេខាលើកិច្ចព្រមព្រៀង លោក ស ខេង និង លោកស្កូត ម៉ូរីសុន(Scott Morrison) មិនបានថ្លែងអ្វីនោះទេ ទៅកាន់អ្នកកាសែតជាតិ និងអន្តរជាតិប្រមាណ៥០ នាក់ដែលកំពុងរង់ចាំយ៉ាងអន្ទះសារនោះ។ មិនតែប៉ុណ្ណោះ តំណាងរដ្ឋាភិបាលទាំងពីរ បានចាកចេញយ៉ាងរហ័សដោយមិនខ្វល់នឹងសំណួរអ្នកកាសែតដែលបានចោទសួរអំពីកិច្ចព្រមព្រៀងដ៏រសើបនេះ។
ចំពោះការបកស្រាយទាំងឡាយគឺស្ថិតនៅលើសេចក្តីប្រកាសព័ត៌មានរួមមួយដែលមានកម្រាសតែពីរទំព័រប៉ុណ្ណោះ។ បើតាមសេចក្តីប្រកាសព័ត៌មានរួមនោះ ការបញ្ជូនជនភៀសខ្លួនពីអូស្ត្រាលីមកកាន់កម្ពុជានេះ គឺផ្អែកលើគោលការណ៍នៃការស្ម័គ្រចិត្តរបស់ជនភៀសខ្លួន និងស្របតាមអនុសញ្ញាស្តីពីជនភៀសខ្លួនដែលកម្ពុជាជាប្រទេសហត្ថលេខីមួយផងដែរ។ សេចក្តីប្រកាសព័ត៌មានដដែលបានស្រង់ប្រសាសន៍របស់លោក ស ខេង ថា ការអនុញ្ញាតឲ្យជនភៀសខ្លួននេះមកតាំងទីលំនៅនៅកម្ពុជា គឺជាសកម្មភាពមនុស្សធម៌ដែលនឹងជួយពួកគេឲ្យចាប់ផ្តើមកសាងជីវិតថ្មីស្របតាមច្បាប់របស់កម្ពុជា។
សេចក្តីប្រកាសព័ត៌មានរួមនេះក៏បានដកស្រង់សម្តីរបស់លោកស្កូត ម៉ូរីសុន(Scott Morrison) ថា ក្នុងនាមជាភាគីនៃអនុសញ្ញាជនភៀសខ្លួននៅពេលកំពុងខិតខំប្រឹងប្រែងអភិវឌ្ឈប្រទេសក្រោយសង្គ្រាមស៊ីវិល កម្ពុជាកំពុងបង្ហាញលទ្ធភាព និង ឆន្ទៈរបស់ខ្លួនដើម្បីរួមចំណែកជាវិជ្ជមានដល់បញ្ហាមនុស្សធម៌។
ដោយឡែក នៅក្នុងអនុស្សរណៈយោគយល់គ្នារវាងកម្ពុជា និងអូស្ត្រាលីនេះ រដ្ឋាភិបាលអូស្ត្រាលីនឹងទទួលរ៉ាប់រងផ្ទាល់លើថ្លៃចំណាយក្នុងការបញ្ជូនជនភៀសខ្លួន រួមទាំងការគាំទ្រចាំបាច់ដល់ជនភៀសខ្លួន និង ការកសាងសមត្ថភាពរបស់ប្រទេសកម្ពុជា ដើម្បីធានាថា កម្ពុជាមានធនធានគ្រប់គ្រាន់ក្នុងការទទួល និងសមាហរ័ណកម្មជនភៀសខ្លួនដោយជោគជ័យ។ជាមួយគ្នានេះ ភាគីកម្ពុជា និង អូស្ត្រាលីបានឯកភាពគ្នាចាប់ផ្តើមដំណើរការកម្មវិធីសាកល្បងនៃការតាំងទីលំនៅនៃជនភៀសខ្លួនទាំងនេះមួយក្រុមតូចសិន ហើយនឹងបន្តបន្ថែមទៀតតាមគោលការណ៍ស្ម័គ្រចិត្ត និង លទ្ធភាពកម្ពុជា។
សេចក្តីប្រកាសព័ត៌មាននោះ ក៏បានបញ្ជាក់ផងដែរថា ចំនួន និងពេលវេលានៃការតាំងទីលំនៅរបស់ជនភៀសខ្លួនទាំងនោះនឹងត្រូវកំណត់ដោយភាគីកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ