យន្តហោះម៉ាឡេស៊ីដែលធ្លាក់នៅខាងកើតអ៊ុយក្រែនប្រហែលជាត្រូវគ្រាប់មីស៊ីល
នៅថ្ងៃព្រហស្បតិ៍ ទី១៧ កក្កដា យន្តហោះបូអ៊ីងម៉ាឡេស៊ីមួយគ្រឿងដែលមានដឹកមនុស្សចំនួន ២៩៨នាក់ បានធ្លាក់ឆេះនៅពីលើដែនអាកាសប៉ែកខាងកើតប្រទេសអ៊ុយក្រែន ត្រង់ផ្តុំតំបន់សង្រ្គាមរបស់ពួកអ្នកទាមទារផ្តាច់ទឹកដីគំាទ្ររុស្ស៊ី។ ព័ត៌មានបណ្តោះអាសន្នចុងក្រោយឲ្យដឹងថា យន្តហោះនោះបានរងការបាញ់គ្រាប់មីស៊ីល គឺមិនមែនរងគ្រោះថ្នាក់ដោយបញ្ហាបច្ចេកទេសទេ ព្រោះយន្តហោះនោះបានផ្ទុះនៅពេលកំពុងហោះហើរក្នុងកំពស់ ១០ ០០០ម៉ែត្រ និងមានល្បឿន ៩០០គីឡូម៉ែត្រក្នុងមួយម៉ោង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
តុល្យការចុងក្រោយឲ្យដឹងថា មនុស្សទំាង ២៩៨នាក់ដែលជិះនៅក្នុងយន្តហោះនោះបានស្លាប់ទំាងអស់គ្នា គ្មានសល់ម្នាក់។ យោងតាមប្រភពពីទីភ្នាក់ងារចារកិច្ចអាមេរិក ប្រព័ន្ធរ៉ាដាបង្ហាញថា យន្តហោះម៉ាឡេស៊ីនេះត្រូវគ្រាប់មីស៊ីលដែល បាញ់ចេញពីដី។ នៅពេលនេះ សំណួរមួយបានកំពុងចោទឡើងដើម្បីចង់ដឹងថា តើអ្នកណាដែលបានបាញ់ទម្លាក់យន្តហោះស៊ីវិលនោះ?
សហរដ្ឋអាមេរិក ក៏ដូចជាបណ្តាប្រទេសជាច្រើនផ្សេងទៀត បានធ្វើការ ទាមទារឲ្យបើកការស៊ើបអង្កេតឯករាជ្យមួយ ទៅលើហេតុការណ៍ធ្លាក់យន្តហោះ នេះ។ ក្រុមប្រឹក្សាសន្តិសុខអ.ស.បគ្រោងនឹងបើកកិច្ចប្រជុំជាបន្ទាន់ មួយ នៅថ្ងៃសុក្រនេះ ដើម្បីជជែកគ្នា អំពីបញ្ហានេះ។
លោកប្រធានាធិបតីអាមេរិក បារ៉ាក់ អូបាម៉ា នៅថ្ងៃព្រហស្បតិ៍ ទី១៧កក្កដា បានអំពាវនាវឲ្យបើកការស៊ើបអង្កេតបន្ទាន់មួយ ពាក់ព័ន្ធទៅនឹងការបាញ់ទម្លាក់យន្តហោះម៉ាឡេស៊ី។ យន្តហោះបូអ៊ីងម៉ាឡេស៊ី ដឹកមនុស្ស២៩៨នាក់ ដែលមន្ដ្រីអាមេរិកនិងមន្ដ្រីអ៊ុយក្រែន អះអាងថា បានរងការបាញ់ប្រហារមីស៊ីល នៅដែនអាកាស ភាគខាងកើតអ៊ុយក្រែន។ ជាតំបន់ដែលបច្ចុប្បន្ននេះ កាន់កាប់ដោយក្រុមឧទ្ទាមផ្ដាច់ទឹកដី គាំទ្ររុស្ស៊ី។ មីស៊ីលដែលបាញ់យន្តហោះម៉ាឡេស៊ី ជាមីស៊ីលប្រភេទ Buk ផលិតដោយរុស្ស៊ី ប៉ុន្តែគេមិនទាន់ដឹងថា នរណាជាអ្នកបាញ់ និងបាញ់ចេញពីកន្លែងណានៅឡើយទេ។
អ៊ុយក្រែន បានបដិសេដថា ខ្លួនគ្មានជាប់ពាក់ព័ន្ធនឹងរឿងនេះទេ។ អ៊ុយក្រែនចោទថា ក្រុមឧទ្ទាមផ្ដាច់ទឹកដីនិយមគាំទ្ររុស្ស៊ី ជាជនដៃដល់ ដោយមានរុស្ស៊ីនៅពីក្រោយខ្នង។ ប្រធានាធិបតីរុស្ស៊ី លោកពូទីនឯណេះវិញ និយាយថា ក្រុមយោធារបស់អ៊ុយក្រែន ដែលប្រឆាំងនឹងក្រុមឧទ្ទាមផ្ដាច់ទឹកដីនិយមគាំទ្ររុស្សីទៅវិញទេ ដែលត្រូវទទួលខុសត្រូវចំពោះមុខសោកនាដកម្មដ៏គួរឲ្យភ័យរន្ធត់នេះ។
យន្តហោះបូអ៊ីងម៉ាឡេស៊ី បានកំពុងធ្វើដំណើរតាមផ្លូវអាកាស ពីទីក្រុងអាមស្ទែដាម ទៅកាន់ទីក្រុងគូឡាឡាំពួរ មុននឹងត្រូវមីស៊ីលបាញ់ទម្លាក់ នៅរយៈកម្ពស់១ម៉ឺនម៉ែត្រ។ មនុស្ស២៩៨នាក់ ក្នុងនោះមានជនជាតិហូឡង់១៥៤នាក់ នៅក្នុងយន្តហោះនោះ បានស្លាប់ទាំងអស់ គ្មានសល់អ្នកណាម្នាក់ទេ។
ថ្លែងទៅកាន់លោកនាយករដ្ឋមន្ដ្រីហូឡង់ Mark Rutte តាមទូរសព្ទ លោកអូបាម៉ា បានសម្ដែងការសោកស្ដាយ និងចូលរួមរំលែកទុក្ខ ចំពោះការស្លាប់ជនជាតិហូឡង់។ ហើយថា អាមេរិកបានត្រៀមខ្លួន ដើម្បីផ្ដល់ជំនួយបន្ទាន់ដែលត្រូវការ សម្រាប់ការស៊ើបអង្កេតលក្ខណៈអន្ដរជាតិមួយ ដែលមានលក្ខណៈពេញលេញ គ្មានការរារាំង និងគួរឲ្យទុកចិត្តបាន។
ប្រមុខរដ្ឋាភិបាលអាមេរិក ក៏បានទូរស័ព្ទទៅព្រមានប្រធានាធិបតីអ៊ុយក្រែន លោកប៉េត្រូ ប៉ូរ៉ូឆេនកូ និងលោកនាយករដ្ឋមន្ដ្រីម៉ាឡេស៊ី ណាជីព រ៉ាហ្សាក់ថា មិនត្រូវយកភស្តុតាងនានាចេញពីប្រទេសឡើយ រហូតទាល់តែមានការស៊ើបអង្កេតដោយម៉ត់ចត់ និងមានតម្លាភាពមួយកើតឡើង។ ចង់បានការស៊ើបអង្កេតប្រកបដោយតម្លាភាពចំពោះករណីនេះ អ្នកជំនាញអាកាសចរណ៍ បានលើកឡើងថា គឺត្រូវធ្វើឡើងដោយភាគី ដែលមិនជាប់ពាក់ព័ន្ធជាមួយជម្លោះរវាងអ៊ុយក្រែន និងរុស្ស៊ី។
នៅអ៊ុយក្រែនឯណោះវិញ ក្រុមឧទ្ទាមផ្តាច់ទឹកដីបានប្រកាសថា ពួកគេនឹង បើកផ្លូវឲ្យក្រុមស៊ើបអង្កេតចូលទៅកាន់ទីតាំងដែលយន្តហោះ ធ្លាក់។ ប្រអប់ខ្មៅទាំង២របស់យន្តហោះក៏ត្រូវបានគេរកឃើញហើយដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ