វិបត្តិសេដ្ឋកិច្ច -

អត្ថបទចុះផ្សាយនៅថ្ងៃ ពុធ 25 មករា 2012 - ព័ត៌មានទើបកែប្រើលើកចុងក្រោយ ថ្ងៃ ពុធ 25 មករា 2012

មូលនិធិរូបិយវត្ថុអន្តរជាតិ FMI ស្នើកុំឲ្យអនុវត្តនយោបាយថវិកាត្បិតត្បៀតខ្លាំងពេក

លោកស្រី Christine Lagarde អគ្គនាយកនៃមូលនិធិរូបិយវត្ថុអន្តរជាតិ FMI

REUTERS/Petar Kujundzic

ដោយ សៀក សារិន

នៅខណៈពេលដែលកំណើនសេដ្ឋកិច្ចពិភពលោកនៃឆ្នាំ២០១២អាចស្គាល់ការធ្លាក់ស្រុតចុះ ហើយនិងតំបន់អឺរ៉ូអាចជួបនឹងដំណើរសេដ្ឋកិច្ចដើរថយក្រោយ នៅថ្ងៃអង្គារទី២៤មករាម្សិលមិញ មូលនិធិរូបិយវត្ថុអន្តរជាតិ FMI បានស្នើរដ្ឋាភិបាលកុំឲ្យអនុវត្តនយោបាយថវិកាត្បិតត្បៀតខ្លាំងពេក។ ពីព្រោះវាអាចក្លាយជាកត្តាអវិជ្ជមានធ្វើឲ្យប៉ះពាល់ដល់ដំណើរអភិវឌ្ឍន៍សេដ្ឋកិច្ច។

សេចក្តីរាយការណ៍របស់ សៀក សារិន

ស្តាប់ (01:59)

25/01/2012 by សៀក សារិន

នៅពេលថ្មីៗនេះ មូលនិធិរូបិយវត្ថុអន្តរជាតិ FMI បានប៉ាន់ប្រមាណថា អត្រានៃកំណើនសេដ្ឋកិច្ចពិភពលោកនៅឆ្នាំ២០១២នេះអាចស្រុតធ្លាក់មកនៅត្រឹម៣,៣%ទល់នឹង៤%ដែលធ្លាប់បានគ្រោងទុកកាលពី៤ខែមុន។ ដូច្នេះ ឃើញថាអត្រានៃសន្ទុះកំណើនសេដ្ឋកិច្ចពិភពលោកនៅឆ្នាំ២០១២មានកម្រិតទាបជាងកាលពីឆ្នាំ២០១១ដែលមាន៣,៨%។ តួលេខនេះសម្រេចបានក៏ដោយសារតែមានសន្ទុះកំណើនសេដ្ឋកិច្ចនៅក្នុងមហាប្រទេសអាស៊ីទាំងពីរពោលគឺប្រទេសចិនដែលអាចមាន៨,២%នៅឆ្នាំ២០១២ ហើយនិងប្រទេសឥណ្ឌាដែលអាចមាន៧%។

មូលនិធិរូបិយវត្ថុអន្តរជាតិ FMI ប្រមើលឃើញថា សេដ្ឋកិច្ចនៃតំបន់អឺរ៉ូអាចធ្លាក់ទៅក្នុងវិបត្តិធ្ងន់ធ្ងរ។ ជាពិសេសនៅខណៈពេលដែលប្រទេសក្បាលម៉ាស៊ីនសេដ្ឋកិច្ចអឺរ៉ុបសំខាន់ៗទាំងពីរពោលគឺប្រទេសអាល្លឺម៉ង់ដែលអាចមានអត្រាកំណើនសេដ្ឋកិច្ចតែ០,៣%នៅឆ្នាំ២០១២និងប្រទេសបារាំងតែ០,២%ប៉ុណ្ណោះ។

រីឯផលិតផលដុលសរុបនៃប្រទេសអ៊ីតាលីវិញអាចធ្លាក់បាត់បង់អស់២,២% និងអាចធ្លាក់បាត់បង់អស់១,៧%សម្រាប់ប្រទេសអេស្ប៉ាញ។ ដូច្នេះ សម្រាប់ប្រទេសក្នុងតំបន់អឺរ៉ូទាំងមូល ផលិតផលដុលសរុបអាចស្រុតបាត់បង់អស់០,៥% ឬអាចមានច្រើនជាងនេះទៅទៀត នេះបើយោងតាមមូលនិធិរូបិយវត្ថុអន្តរជាតិ FMI ។

មូលហេតុដែលជំរុញឲ្យ មូលនិធិរូបិយវត្ថុអន្តរជាតិ FMI ស្នើកុំឲ្យរដ្ឋាភិបាលអនុវត្តនយោបាយថវិកាត្បិតត្បៀតខ្លាំងពេក ដោយហេតុថា កង្វះហិរញ្ញប្បទានរបស់រដ្ឋនិងកង្វះឥណទាណធនាគារអាចជាកត្តាដ៏សែនអវិជ្ជមានធ្វើឲ្យប៉ះពាល់ដល់ការអភិវឌ្ឍន៍សេដ្ឋកិច្ច។ ហើយការស្វែងរកសមតាថវិកាទៀតសោតក៏ត្រូវប្រព្រឹត្តទៅដោយអនុលោមតាមស្ថានភាពនៃប្រទេសនីមួយៗ ពុំត្រូវអនុវត្តនយោបាយថវិកាត្បិតត្បៀតតឹងរ៉ឹងជ្រុលពេកឡើយ៕