អង្គការសុខភាពពិភពលោកចេញរបាយការណ៍ហាមឃាត់ការប្រើប្រាស់បារីអេឡិចត្រូនិច
អង្គការសុខភាពពិភពលោក បានចេញផ្សាយរបាយការណ៍មួយ នៅថ្ងៃអង្គារទី២៦ សីហា ដែលនៅក្នុងនោះ គេបានស្នើឲ្យមានការហាមឃាត់លក់បារីអេឡិចត្រូនិកដល់យុវជន និងហាមការជក់បារីប្រភេទនេះ នៅទីកន្លែងសាធារណៈដែលបិទជិត។ តាមអង្គការសុខភាពពិភពលោក ផ្សែងបារីអេឡិចត្រូនិចអាចបង្កគ្រោះថ្នាក់ដល់សុខភាពរបស់យុវជន និងទារកក្នុងផ្ទៃ។
ចុះផ្សាយនៅថ្ងៃ៖
ស្តាប់ - ០២:០១
របាយការណ៍របស់អង្គការសុខភាពពិភពលោកចេញផ្សាយនៅថ្ងៃអង្គារអាចទាញចំណាប់អារម្មណ៍ក្រុមមនុស្សដែលបានងាកមកប្រើបារីអេឡិចត្រូនិក បន្ទាប់ពីបោះបង់ចោលបារីថ្នាំជក់។ តាមការសិក្សារបស់អ្នកជំនាញអង្គការសុខភាពពិភពលោក ផ្សែងបារីអេឡេត្រូនិកមិនមែនត្រឹមជាចំហាយទឹកធម្មតា ដូចការផ្សព្វផ្សាយរបស់អ្នកលក់ប៉ុណ្ណោះទេ ប៉ុន្តែ វាមានលាយឡំដោយជាតិនីកូទីន និងជាតិពុលផ្សំផ្សេងទៀត ដែលអាចប៉ះពាល់ដល់សុខភាពរបស់យុវជន និងការរីកលូតលាស់ផ្នែកខួរក្បាលរបស់ទារកក្នុងផ្ទៃ។
អ្នកជំនាញរបស់អង្គការសុខភាពពិភពលោកចង់ឲ្យគេហាមឃាត់ការជក់បារីអេឡិចត្រូនិចនៅទីកន្លែងសាធារណៈដែលបិទជិត ដូចជានៅក្នុងភោជនីយដ្ឋាន ឬការិយាល័យ ដែលគេហាមមិនឲ្យមានការជក់បារីធម្មតា ពោលគឺរហូតដល់ពេលដែលអ្នកផលិតអាចរកភស្តុតាងមកបញ្ជាក់ថា ផ្សែងចេញពីបារីអេឡិចត្រូនិចនឹងមិនប៉ះពាល់ដល់សុខភាពរបស់អ្នកដែលនៅជិតអ្នកជក់បារីអេឡិតត្រូនិច។ អង្គការសុខភាពពិភពលោកធ្វើអនុសាសន៍ផងដែរ ស្នើសុំឲ្យគេឈប់លក់បារីអេឡិចត្រូនិចដល់យុវជន និងការលុបបំបាត់ចោលម៉ាស៊ីនលក់បារីអេឡិចត្រូនិច។ លើសពីនោះទៀត អ្នកជំនាញសុខភាពរបស់អង្គការសហប្រជាជាតិបានស្នើសុំឲ្យអ្នកផលិត ឈប់ផ្សព្វផ្សាយតទៅទៀតថា បារីអេឡិចត្រូនិចនឹងអាចជួយកាត់បន្ថយការញៀនបារីថ្នាំជក់ ដរាបណាគេនៅមិនទាន់មានភស្តុតាងមកអះអាងបញ្ជាក់។
ដោយសារគ្រោះថ្នាក់សុខភាពដែលបង្កដោយថ្នាំជក់ មនុស្សជាច្រើនបានបែរមកជក់បារីអេឡិចត្រូនិច ដែលអង្គការសុខភាពពិភពលោកបានកត់សំគាល់ឃើញមានការកើនឡើងទ្វេរដង ក្នុងចំណោមយុវជន និងមនុស្សចាស់ (ពីឆ្នាំ ២០០៨ ដល់ឆ្នាំ ២០១២)។ បារីអេឡិចត្រូនិក ដែលកើតចេញដំបូងពីប្រទេសចិន នៅឆ្នាំ ២០០៥បានរីកដុះដូចផ្សិត រហូតមានដល់៤៦៦ម៉ាក នៅឆ្នាំ ២០១៣។ គេបានប៉ាន់ប្រមាណថា ទឹកប្រាក់៣ពាន់លានដុល្លារត្រូវគេចំណាយទៅលើបារីអេឡិចត្រូនិកក្នុងមួយឆ្នាំៗ។
យ៉ាងណាក៏ដោយ អង្គការសុខភាពពិភពលោកនៅ តែមិនទាន់រកឃើញពីទំហំគ្រោះថ្នាក់សុខភាពរបស់អ្នកដែលមិនបានជក់ ប៉ុន្តែ បានត្រឹមស្រូបផ្សែងបារីអេឡិចត្រូនិច។ មួយវិញទៀត គេនៅតែមិនទាន់ដឹងថា តើបារីអេឡិចត្រូនិចអាចជួយកាត់បន្ថយគ្រោះថ្នាក់សុខភាពដែរឬទេ បើប្រៀបធៀបនឹងថ្នាំជក់ធម្មតានោះ។
របាយការណ៍បង្ហាញពីការប្រឈមនឹងគ្រោះថ្នាក់ ដោយសារបារីអេឡិចត្រូនិចត្រូវអង្គការសុខភាពពិភពលោកផ្សព្វផ្សាយនៅមុន សន្និសីទអន្តរជាតិដើម្បីប្រយុទ្ធប្រឆាំងនឹងការជក់បារី ដែលនឹងត្រូវរៀបចំឡើង ពីថ្ងៃទី ១៣ ដល់ថ្ងៃទី ១៨តុលា នៅទីក្រុង ម៉ូស្គូ ប្រទេសរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ