ទស្សនកិច្ចថេន សេន នៅអាមេរិកបង្ហាញថាអាមេរិកគាំទ្រកំណែទម្រង់ភូមា
នៅថ្ងៃចន្ទសប្តាហ៍ក្រោយនេះ ប្រធានាធិបតីភូមា ថេន សេន នឹងបំពេញទស្សនកិច្ចនៅសហរដ្ឋអាមេរិក។ ការឈានជើងជាន់ទឹកដីអាមេរិករបស់លោក ថេន សេន បង្ហាញច្បាស់ថា អាមេរិកគាំទ្រកំណែទម្រង់នានាដែលរដ្ឋាភិបាលភូមាធ្វើឡើង ដើម្បីកែប្រែមុខមាត់ប្រទេសឡើងវិញ។ នៅថ្ងៃសុក្រនេះដែរ ដើម្បីបង្ហាញពីកិច្ចប្រឹងប្រែងក្នុងការធ្វើកំណែទម្រង់ រដ្ឋាភិបាលភូមា បានធ្វើការលើកលែងទោស ដោយបានដោះលែងអ្នកទោសជាង២០នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
នៅថ្ងៃចន្ទសប្តាហ៍ក្រោយនេះ លោកថេន សេន នឹងក្លាយជាប្រធានាធិបតីភូមាទីមួយ ដែលបានឈានជើងទស្សនកិច្ច ក្រុងWashington។ នេះបើគិតចាប់តាំងពីលោក ណេ វិន ប្រមុខដឹកនាំរបបសឹកចាស់ភូមាបានទស្សនកិច្ចសហរដ្ឋអាមេរិក ជួបជាមួយប្រធានាធិបតីអាមេរិកចាស់ គឺលោក លីនដុន ចនសុន កាលពីឆ្នាំ ១៩៦៦ មក។ គេសង្កេតឃើញថា ទំនាក់ទំនងរវាងភូមានិងអាមេរិក ហាក់មានភាពកក់ក្តៅបន្តិចឡើងវិញហើយ ពិសេសនៅពេលដែលប្រធានាធិបតីអូបាម៉ាបានបំពេញទស្សនកិច្ចនៅភូមា កាលពីខែវិច្ឆិកា កន្លងទៅ។
លោក Zaw Htay ដែលជាប្រធានខទ្ទកាល័យប្រធានាធិបតីភូមា បានថ្លែងប្រាប់សារព័តម៌ានបារាំងAFP ថា ទំនាក់ទំនងទ្វើភាគីរវាងភូមានិងអាមេរិកបានចាប់ប្រសើរឡើងវិញហើយ ហើយតែក្នុងរយៈពេលខ្លីប៉ុណ្ណោះ ទំនាក់ទំនងប្រទេសទាំងពីរបានលូតឆាប់រហ័សទៅមុខទៀតផង។ លោក Zaw Htay បានបន្តថា ទស្សនកិច្ចរបស់លោក ថេន សេន នៅអាមេរិក ក្នុងសប្តាហ៍ក្រោយនេះ នឹងបង្ហាញដល់ពិភពលោកទាំងមូល ពីការគាំទ្ររបស់អាមេរិកចំពោះកំណែទម្រង់នានានៅភូមា។
គួររំលឹកថា ចាប់តាំងតែពីភូមាបានប្តូររបបគ្រប់គ្រងថ្មីក្នុងដើមឆ្នាំ ២០១១មក រដ្ឋាភិបាលភូមាថ្មីដឹកនាំដោយក្រុមឧត្តមសេនីយ៍ចាស់ៗ បានបង្កើនកំណែទំរង់ក្នុងប្រទេស ក្នុងលក្ខណៈមួយគួរដ៏អោយកត់សម្គាល់។ រដ្ឋាភិបាលភូមាបានអនុញ្ញាតអោយបក្សប្រឆាំងរបស់លោកស្រី អ៊ុងសាន ស៊ូជី បានចូលរួមក្នុងឆាកនយោបាយ ហើយបានដោះលែង អ្នកទោសមនសិការាប់រយនាក់ទៀតផង។ នៅថ្ងៃសុក្រនេះដែរ នៅមុនដំណើរទស្សនកិច្ចលោក ថេន សេន នៅសហរដ្ឋអាមេរិកនោះ រដ្ឋាភិបាលភូមាបានធ្វើការលើកលែងទោស ដោយបានដោះលែងអ្នកទោសជាង២០នាក់ផ្សេងទៀត។
លោក Zaw Htay ប្រធានខទ្ទកាល័យប្រធានាធិបតីភូមា បានអួតបន្ថែមថា កំណែទម្រង់នៅភូមាហាក់ដូចជាមានភាពច្បាស់លាស់ជាងកំណែទម្រង់នៅតាមបណ្តាប្រទេសអារ៉ាប់ទៅទៀត។ ទាក់ទងនឹងកំណែទម្រង់នេះ លោក Zaw Htay ចង់សំដៅន័យដល់វិបត្តិដែលប្រទេសអារ៉ាប់នានាបានជួបប្រទះ ចាប់តាំងពីមានការបះបោររបស់ប្រជាជន នៅឆ្នាំ ២០១០មក។
ទោះយ៉ាងនេះក្តី ដំណើរទស្សនកិច្ចរបស់ប្រធានាធិបតីភូមាអាចនឹងជួបភាពស្មុគស្មាញ ព្រោះថារដ្ឋាភិបាលភូមាកំពុងតែរងនូវការរិះគន់ទាក់ទងអំពើហិង្សាដែលបានកើតឡើង កាលពីឆ្នាំ២០១២ វាយប្រហារអ្នកកាន់សាសនាអ៊ីស្លាម ជាពិសេសជនជាតិភាគតិចរ៉ូហ៊ីងយ៉ាស។ អំពើហិង្សាបានសម្លាប់មនុស្ស ២០០នាក់។ សហរដ្ឋអាមេរិកសំដែងការព្រួយបារម្ភចំពោះដំណើរការឆ្ពោះទៅរកលទ្ធិប្រជាធិបតេយ្យនៅភូមា ដោយខ្លាចក្រែងភូមាបោះជំហានថយក្រោយវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ