សាលារាជធានីភ្នំពេញអនុញ្ញាតឲ្យគណបក្សសង្គ្រោះជាតិ ធ្វើមហាបាតុកម្ម
បន្ទាប់ពីកិច្ចប្រជុំជាង៣ម៉ោង នៅរសៀលថ្ងៃទី៣ខែកញ្ញា អាជ្ញាធររាជធានីភ្នំពេញបានសម្រេចអនុញ្ញាតឲ្យបក្សប្រឆាំងធ្វើបាតុកម្មអហិង្សា នៅទីលានប្រជាធិបតេយ្យ នៅថ្ងៃទី៧កញ្ញាខាងមុខនេះហើយ។ ការសម្រេចនេះធ្វើឡើងក្រោមលក្ខខណ្ឌមួយចំនួន ក្រោមកិច្ចព្រមព្រៀងរវាងភាគីទាំងសងខាង ទាំងខាងអាជ្ញាធររាជធានីភ្នំពេញ និងខាងគណបក្សសង្គ្រោះជាតិដែលជាម្ចាស់សំណើ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
លោកឡុង ឌីម៉ង់ អ្នកនាំពាក្យសាលារាជធានីភ្នំពេញ មានប្រសាសន៍ប្រាប់វិទ្យុបារាំងអន្ដរជាតិ កាលពីយប់ថ្ងៃទី៣ខែកញ្ញាថា ការសម្រេចនេះ ធ្វើឡើងបន្ទាប់ពីមានការប្រជុំពិភាក្សាយ៉ាងល្អិតល្អន់ រវាងភាគីពាក់ព័ន្ធនានា ក្នុងនោះរួមមានតំណាងគណបក្សសង្គ្រោះជាតិជាម្ចាស់សំណើ តំណាងសាលារាជធានីភ្នំពេញ និងលោកជួន សុវណ្ណ ស្នងការនគរបាលរាជធានីភ្នំពេញ ផងដែរ។
លោកឡុង ឌីម៉ង់ ឲ្យដឹងបន្តថា តំណាងគណបក្សសង្គ្រោះជាតិ គឺលោក ហូរ វ៉ាន់ បានជម្រាបជូនអង្គប្រជុំពីគោលបំណងនៃការធ្វើបាតុកម្ម។ ជាបាតុកម្មអហិង្សាដែលគណបក្សសង្គ្រោះជាតិអះអាងថា ធ្វើឡើងដើម្បីទាមទារឲ្យបង្កើតគណៈកម្មការពិសេសឯករាជ្យ ដើម្បីស៊ើបអង្កេតរកការពិត និងយុត្តិធម៌នៃលទ្ធផលបោះឆ្នោត។ ជាចុងក្រោយ អង្គប្រជុំបានឯកភាពគ្នាថា មហាបាតុកម្មនឹងចាប់ផ្ដើមនៅម៉ោង៧ព្រឹក ហើយបញ្ចប់ទៅវិញយ៉ាងយូរនៅម៉ោង១២ថ្ងៃត្រង់ និងគ្មានការដង្ហែក្បួនចល័ត ក្រោយការធ្វើបាតុកម្មឡើយ។
លោកឡុង ឌីម៉ង់ បន្ថែមថា តំណាងស្របច្បាប់របស់គណបក្សសង្គ្រោះជាតិចំនួន៣នាក់ គឺលោកហូរ វ៉ាន់, លោកម៉ៅ មុនីវណ្ណ, និងលោកគួយ ប៊ុនរឿន ដែលបានចុះហត្ថលេខាលើសំណើសុំធ្វើបាតុកម្ម ត្រូវទទួលខុសត្រូវទាំងស្រុងចំពោះការរៀបចំមហាបាតុកម្មនេះ។ ហើយគណបក្សសង្គ្រោះជាតិ ត្រូវធានាកិច្ចការពារសន្តិសុខសុវត្ថិភាពផ្ទៃក្នុងមហាបាតុកម្មឲ្យបានល្អ ពិសេសគឺការសម្រួលចរាចរណ៍ជូនប្រជាពលរដ្ឋ។ ដោយចំពោះ កិច្ចការពារសន្តិសុខ សុវត្ថិភាពនៅខាងក្រៅ ជាការទទួលខុសត្រូវរបស់សមត្ថកិច្ច។ ជាងនេះទៅទៀត ដើម្បីងាយស្រួលក្នុងការដោះស្រាយនូវបញ្ហាបន្ទាន់ផ្សេងៗ គណបក្សសង្គ្រោះជាតិត្រូវរៀបចំក្រុមការងារដើម្បីទាក់ទងជាមួយសមត្ថកិច្ច។
ដោយឡែក ចំពោះចំនួនអ្នកចូលរួមដែលគណបក្សសង្គ្រោះជាតិស្នើសុំឲ្យបាន២ម៉ឺននាក់ សាលារាជធានីភ្នំពេញមិនអាចសម្រេចបានទេ គឺត្រូវស្នើសុំទៅក្រសួងមហាផ្ទៃជាមុនសិន។ នេះបើតាមអ្នកនាំពាក្យសាលារាជធានីភ្នំពេញ លោកឡុង ឌីម៉ង់។
លោកសម រង្ស៊ី ប្រធានគណបក្សសង្គ្រោះជាតិ បានប្រកាសពីទម្រង់មហាបាតុកម្មអហិង្សា និងសន្តិវិធីថា ជាពិធីស្មឹងស្មាធ បួងសួង ដើម្បីសន្តិភាព ទាំងផ្លូវកាយនិងផ្លូវចិត្ត។ ជាពិធីស្មឹងស្មាធ បួងសួងក៏ពិតមែន តែលោកកឹម សុខា អនុប្រធានគណបក្សសង្គ្រោះជាតិ បានបញ្ជាក់ថា វានៅតែជាមហាបាតុកម្ម។ គ្រាន់តែមហាបាតុកម្មនេះធ្វើឡើងក្នុងរូបភាពអហិង្សា ដោយសន្តិវិធី ដែលនឹងប្រព្រឹត្តទៅនៅថ្ងៃទី៧ ខែកញ្ញាខាងមុខ។ ប្រមុខបក្សប្រឆាំងបានបញ្ជាក់ថា សកម្មជនគណបក្សសង្គ្រោះជាតិនឹងកាន់តែធូប ទៀន និងផ្កាប៉ុណ្ណោះ នៅក្នុងមហាបាតុកម្មនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ