គណបក្សកុម្មុយនិស្តចិនបានបើកសម័យប្រជុំពេញអង្គប្រចំាឆ្នំាក្រោមប្រធានបទ « នីតិរដ្ឋ »
នៅថ្ងៃចន្ទ ទី២០ តុលានេះ គណបក្សកុម្មុយនិស្តចិនបានបើកសម័យប្រជុំពេញអង្គប្រចំាឆ្នំា។ កិច្ចប្រជុំនេះបានចូលរួមដោយកម្មាភិបាលជាន់ខ្ពស់ដែលជាសមាជិកពេញសិទ្ធិរបស់គណៈកម្មាធិការមជ្ឈិមបក្សប្រមាណជា ២០០នាក់ ក្នុងនោះក៏មានរូបលោកប្រធានាធិបតីស៊ី ជីនពីង និងលោកនាយករដ្ឋមន្រ្តីលី ខឺជំាង។ ក៏ដូចជាសព្វមួយដង កិច្ចប្រជុំពេញអង្គប្រចំាឆ្នំាត្រូវបានធ្វើឡើងជាសម្ងាត់ដោយមិនអនុញ្ញាតឲ្យមានអ្នកកាសែតចូលរួមទេ។ កិច្ចប្រជុំលើកនេះត្រូវបានធ្វើឡើងក្រោមប្រធានបទ « នីតិរដ្ឋ » ដែលមានគោលដៅពង្រឹងប្រព័ន្ធតុលាការដូចការចង់បានរបស់លោកប្រធានាធិបតីស៊ី ជីនពីង។
ចុះផ្សាយនៅថ្ងៃ៖
ស្តាប់ - ០២:០៦
តំាងពីលោកស៊ី ជីនពីងបានឡើងកាន់តំណែងប្រធានាធិបតីចិនក្នុងខែមីនា ឆ្នំា ២០១៣ មក នេះជាលើកទី៤ ហើយដែលគណៈកម្មាធិការមជ្ឈិមបក្សកុម្មុយនិស្តបានបើកសម័យប្រជុំពេញអង្គរបស់ខ្លួន។ ជាផ្លូវការ កិច្ចប្រជុំរយៈពេល ៤ថ្ងៃចាប់ពីថ្ងៃចន្ទនេះនឹងផ្តោតសំខាន់លើការពង្រឹងអំណាចនៃច្បាប់។ នៅពេលដែលគេនិយាយពីការពង្រឹងអំណាចនៃច្បាប់នៅក្នុងប្រទេសចិន គឺគេចង់និយាយលើការពង្រឹងវិន័យនៅផ្ទៃក្នុងគណបក្ស ឬអាចនិយាយបែបសាមញ្ញថា បង្កើនការត្រួតពិនិត្យលើថ្នាក់ដឹកនំា។ ក្រៅពីការពង្រឹងប្រព័ន្ធច្បាប់ដើម្បីរក្សាស្ថិរភាពរបស់ប្រទេស កិច្ចប្រជុំក៏នឹងត្រូវគិតគូររឿងរ៉ាវរបស់លោកហ្ស៊ូ យ៉ុងកងផងដែរ។ លោកយ៉ុងកងដែលជាអតីតរដ្ឋមន្រ្តីក្រសួងសន្តិសុខសាធារណៈ និងដែលត្រូវបានគេដកតំណែងដោយសាររឿងអាស្រូវពុករលួយ។ អ្វីដែលកិច្ចប្រជុំត្រូវសម្រេចនោះគឺថា តើបក្សត្រូវបណ្តេញលោកយ៉ុងកងចេញសមាជិកបក្ស ឬក៏អត់។ គួររម្លឹកជូនថា លោកយ៉ុងកង គឺជាឥស្សរជនជាន់ខ្ពស់លើកដំបូងម្នាក់ដែលត្រូវបានគេបញ្ឈប់ពីតំណែងដោយរឿងពុករលួយ តំាងពីការបង្កើតគណបក្សកុម្មុយនិស្តចិនក្នុងឆ្នំា ១៩៤៩ មក។
សម្រាប់លោកប្រធានាធិបតីស៊ី ជីនពីង កិច្ចប្រជុំលើកនេះនឹងអនុញ្ញាតជាពិសេសឲ្យមានការបញ្ជាក់ឡើងវិញអំពីឧត្តមភាពនៃអំណាចរបស់គណបក្សដែលស្ថិតក្រោមច្បាប់ មានន័យថា គ្មានអ្នកណាម្នាក់ អង្គការ ឬមួយក៏ទីភ្នាក់ងាររដ្ឋាភិបាលណាមួយដែលស្ថិតពីលើច្បាប់ ឬអង្គុយលើច្បាប់នោះទេ។ សូមជម្រាបជូនថា តំាងពីឡើងកាន់អំណាចមក លោកស៊ី ជីនពីងបានបើកយុទ្ធនាការបោសសំអាតជនពុករលួយគ្រប់ជាន់ថ្នាក់ដូចដែលលោកបានបញ្ជាក់ថា កំចាត់តំាងពីសត្វខ្លាដល់សត្វរុយ។ មកដល់ពេលនេះ មានថ្នាក់ដឹកនំាជាន់ខ្ពស់យ៉ាងតិច ៥១នាក់ហើយដែលត្រូវបានដកតំណែងដោយរឿងពុករលួយ។ ការរំលោភអំណាច និងការប្រព្រឹត្តិអំពើពុករលួយដែលជាឧបសគ្គចម្បងនៅក្នុងដំណើរអភិវឌ្ឍន៍ប្រទេសជាតិ។
ដូច្នេះតាមរយៈកិច្ចប្រជុំក្រោមប្រធានបទ « នីតិរដ្ឋ » លើកនេះ ក៏នឹងអាចជួយរំងាប់ភាពក្តៅក្រហាយរបស់ប្រជាពលរដ្ឋចិនដែលបានទទួលអយុត្តិធម៌ក្នុងសង្គម និងកំពុងបាត់បង់ជំនឿលើប្រព័ន្ធតុលាការ ពិសេសអ្នករងគ្រោះក្នុងបញ្ហាដីធ្លី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ