សង្គមស៊ីវិល សាទរចំពោះពង្រាងច្បាប់អង្គការ ដែលបញ្ជូនត្រឡប់ពីគណៈរដ្ឋមន្ត្រី
ក្រុមអង្គការសង្គមស៊ីវិល បានសម្តែងការសាទរចំពោះរដ្ឋាភិបាល ដែលបានបញ្ជូនសេចក្តីព្រាងច្បាប់ ស្តីពីសមាគមអង្គការមិនមែនរដ្ឋាភិបាល ទៅឲ្យក្រសួងមហាផ្ទៃ ពិនិត្យកែសម្រួលឡើងវិញ បន្ទាប់ពីសេចក្តីព្រាងច្បាប់ដ៏ចម្រូងចម្រាស់នោះ បានបញ្ជួនទៅដល់ទីស្តីការគណៈរដ្ឋមន្ត្រី កាលពីខែសីហា។ ក្រុមអង្គការសង្គមស៊ីវិល ក៏បានទទូចសុំឲ្យក្រសួងមហាផ្ទៃកែប្រែ និងលុបចោលនូវមាត្រាមួយចំនួន ដែលមានការប្រឈមខ្លាំងដល់អង្គការសង្គមស៊ីវិល ដូចជា ការកំណត់ពន្ធអាករក្នុងការចុះបញ្ជី និងការធ្វើរបាយការណ៍ប្រចាំឆ្នាំ ជាដើម។
ចុះផ្សាយនៅថ្ងៃ៖
ស្តាប់ - ០២:២៥
សេចក្តីព្រាងច្បាប់ ស្តីពី សមាគម-អង្គការមិនមែនរដ្ឋាភិបាល មានចំនួន ១១ជំពូក និង ៥៨មាត្រា ត្រូវបានអង្គការ-សមាគមជាតិ និងអន្តរជាតិជាច្រើន បានថ្លែងការណ៍ជំទាស់ និងស្នើឲ្យមានការកែប្រែ។ ក្រុមសង្គមស៊ីវិល បានចាត់ទុកថា ពង្រាងច្បាប់អង្គការ ជាឧបករណ៍គំរាមកំហែងដល់អង្គការសង្គមស៊ីវិលនៅកម្ពុជា។
ដោយសារតែប្រតិកម្មរិះគន់ដូច្នេះហើយ បានជាក្រសួងមហាផ្ទៃ ដែលជាស្ថាប័នតាក់តែងពង្រាងច្បាប់អង្គការ ដកយកសេចក្តីព្រាងច្បាប់ដ៏ចម្រូងចម្រាស់នោះ ពីទីស្តីការគណៈរដ្ឋមន្ត្រី ដើម្បីកែសម្រួលចំណុចមួយចំនួន។
ក្នុងកិច្ចប្រជុំ កាលពីថ្ងៃទី៧កញ្ញា ឆ្នាំ២០១១ លោក នុត សាអាន រដ្ឋលេខាធិការក្រសួងមហាផ្ទៃ និងជាប្រធានគណៈកម្មការរៀបចំសេចក្តីព្រាងច្បាប់អង្គការ បានលើកឡើងថា ការដែលរដ្ឋាភិបាល ត្រូវដកថយបន្តិចដូច្នេះ ព្រោះត្រូវយកពង្រាងច្បាប់នោះ មកពិនិត្យពិចារណាឡើងវិញ ទោះបីជាកន្លងមក ពង្រាងច្បាប់អង្គការ បានទៅដល់ទីស្តីការគណៈរដ្ឋមន្ត្រី ហើយបានពិចារណាក្នុងក្រុមអ្នកច្បាប់បានបីលើកមកហើយក៏ដោយ។
តាមតំណាងរដ្ឋាភិបាល ដោយសារតែមានប្រតិកម្មពីខាងក្រៅ រដ្ឋាភិបាលបានសម្រេចអោយដកយកពង្រាងច្បាប់អង្គការ មកពិចារណាលើចំណុចខ្លះឡើងវិញ។
ការសម្រេចរបស់រដ្ឋាភិបាលដូច្នេះ ត្រូវបានក្រុមសង្គមស៊ីវិលនៅកម្ពុជា បានបង្ហាញការសាទរ ជាពិសេសសហព័ន្ធសិទ្ធិមនុស្ស និងអភិវឌ្ឍន៍កម្ពុជា ដែលមានអង្គការ-សមាគមចំនួន ៣១ អង្គការ ជាសមាជិក បានថ្លែងការណ៍គាំទ្រនៅថ្ងៃទី៩កញ្ញានេះ។
ការបញ្ជូនត្រឡប់នូវសេចក្តីព្រាងច្បាប់អង្គការ ទៅកាន់ក្រសួងមហាផ្ទៃវិញ នៅពេលនេះ ត្រូវបានអង្គការសមាគម ដែលមាននិន្នាការគាំទ្ររដ្ឋាភិបាល ចាត់ទុកថា ជាជំហានវិជ្ជមានមួយ ដែលឆ្លុះបញ្ចាំងឲ្យឃើញនូវសុឆន្ទ:របស់រដ្ឋាភិបាល ក្នុងការប្រកាន់យកការសម្របសម្រួលជាមួយស្ថាប័នអង្គការមិនមែនរដ្ឋាភិបាល ដើម្បីធ្វើសុខដុមនីយកម្មជាមួយគ្នា។
ក៏ប៉ុន្តែក្រុមអង្គការសង្គមស៊ីវិលនេះ បានទទូចឲ្យក្រសួងមហាផ្ទៃ លុបចោលនូវមាត្រាខ្លះ ដែលមានការប្រឈមខ្លាំងពេកជាមួយអង្គការសង្គមស៊ីវិល ពិសេសមាត្រា១៣ នៃសេចក្តីព្រាងច្បាប់ ដែលបានចែងពីការកំណត់ពន្ធអាករក្នុងការចុះបញ្ជី និងកែសម្រួលនូវការកំណត់ទិន្ន័យ ដើម្បីរាយការណ៍ប្រចាំឆ្នាំទៅក្រសួងមហាផ្ទៃ និងទៅក្រសួងការបរទេស ជាដើម។
ម្យ៉ាងទៀត តាមក្រុមសង្គមស៊ីវិល ដែលស្និទនឹងរដ្ឋាភិបាល សេចក្តីព្រាងច្បាប់អង្គការ គួរតែមានការជួបពិភាក្សា និងស្តាប់យោបល់ពីអង្គការសង្គមស៊ីវិលម្តងទៀត ដើម្បីឲ្យសេចក្តីព្រាងច្បាប់នេះ អាចទទួលយក និងយល់ព្រមឯកភាពទាំងអស់គ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ