គ.ជ.ប.ព្រមានម្ចាស់ស្ថានីយវិទ្យុអេប៊ីស៊ី ឲ្យកែតម្រូវពាក្យទាក់ទងបដិវត្តន៍ក្រុមយោធារដ្ឋាភិបាល
គណៈកម្មាធិការជាតិរៀបចំការបោះឆ្នោត (គ.ជ.ប.) បានព្រមានដល់ម្ចាស់ស្ថានីយវិទ្យុ អេ ប៊ី ស៊ី ឲ្យឈប់និយាយអំពីលទ្ធភាពនៃរដ្ឋប្រហារយោធា ប្រសិនបើបក្សប្រឆាំងឈ្នះឆ្នោត។ ការព្រមាននេះបានធ្វើឡើង បន្ទាប់ពីម្ចាស់ស្ថានីយវិទ្យុអេប៊ីស៊ី គឺលោក អាចារ្យអេ បាននិយាយថា ប្រសិនបើគណបក្សប្រឆាំងឈ្នះឆ្នោត ក្រុមយោធាដែលគាំទ្រគណបក្សកាន់អំណាច នឹងងើបឡើងបះបោរជាមិនខាន។ ការនិយាយបែបនេះត្រូវបានគ.ជ.ប.ចាត់ទុកថា ធ្វើឲ្យប៉ះពាល់ដល់ដំណើរការបោះឆ្នោត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
គណៈកម្មាធិការជាតិរៀបចំការបោះឆ្នោត(គ.ជ.ប.) បានព្រមានដល់ម្ចាស់វិទ្យុABCក្នុងស្រុកថាគជប អាចនឹងឈានដល់បិទវិទ្យុអេប៊ីស៊ី ផ្ទាល់តែម្តង ប្រសិនស្ថានីយ៍វិទ្យុនេះនៅតែបន្តនិយាយពីការកើតមានការបះបោរយោធារបស់កងទ័ពកម្ពុជា ប្រសិនបើគណបក្សប្រឆាំងឡើងកាន់អំណាចនោះ។
អគ្គលេខាធិការគ.ជ.ប. លោកទេពនីថា បានប្រាប់វិទ្យុបារាំងអន្តរជាតិRFI ថា គ.ជ.ប.នៅល្ងាចថ្ងៃពុធនេះ ធ្វើលិខិតអញ្ជើញប្រធានវិទ្យុអេប៊ីស៊ី លោកសេង ប៊ុនវ៉េង ហៅអាចារ្យអេ មកកាន់គណៈកម្មាធិកាជាតិរៀបចំការបោះឆ្នោតផ្ទាល់តែម្តង។ បន្ទាប់ពីការទំនាក់ទងរបស់គ.ជ.ប.ទៅកាន់ស្ថានីយ៍វិទ្យុនេះ បរាជ័យជាច្រើនលើក។
ហើយបើតាមលោកអគ្គលេខាធិការដដែល ក្នុងករណីចាំបាច់ គ.ជ.ប.នឹងអាចឈានដល់ការបិទវិទ្យុនេះទៀតផង។ ប្រធាននាយកដ្ឋានសេវាកម្មច្បាប់ និងវិវាទកម្មរបស់គណៈកម្មាធិការជាតិរៀបចំការបោះឆ្នោត លោក កែវ ផល្លា បានពន្យល់ថា ការអត្ថាធិប្បាយបែបនេះ គឺប៉ះពាល់យ៉ាងធ្ងន់ធ្ងរដែលមានស្ថានទំងន់ទោសតាមរយៈត្រាទី១២៤ថ្មី ស្តីពីការជ្រើសរើសតំណាងរាស្ត្របោះឆ្នោត។ ព្រោះវាធ្វើឱ្យមានការភិតភ័យដល់ប្រជាពលរដ្ឋ និងរំខានដល់របៀបរៀបរយចំពោះដំណើរការបោះឆ្នោតទាំងមូល ដែលត្រូវពិន័យជាប្រាក់ ដោយទាន់គិតពីបទព្រហ្មទណ្ឌនៅឡើយ។
គួរបញ្ជាក់ថា លោកសេង ប៊ុនវ៉េង ហៅអាចារ្យអេ ក្នុងកម្មវិធីវិទ្យុរបស់ខ្លួនកាលពីពេលកន្លងទៅ បាននិយាយថា កងទ័ពកម្ពុជាដែលស្មោះត្រង់នឹងគណបក្សកាន់អំណាច នឹងងើបបះបោរប្រសិនបើគណបក្សសង្គ្រោះជាតិរបស់លោកសម រង្ស៊ី និងលោក កឹម សុខា ឈ្នះឆ្នោតថ្ងៃទី២៨ កក្កដាខាងមុខនេះ។
ទាក់ទិននឹងការអត្ថាធិប្បាយរបស់លោក ប្រធានវិទ្យុអេប៊ីស៊ី ខាងលើ លោក ណឹម សុវត្ថិ ប្រធានខុទ្ធកាល័យក្រសួងការពារជាតិ បានប្រាប់វិទ្យុបារាំងនៅថ្ងៃពុធនេះថា នេះគឺគ្រាន់តែជាទស្សនៈរបស់មនុស្សម្នាក់តែប៉ុណ្ណោះ ហើយលោកថា សូម្បីពាក្យថា ប្រសិនបើគណបក្សសង្គ្រោះជាតិឈ្នះឆ្នោតក៏មិនអាចទៅរួចដែរ។ ប្រធានស្ថានីយ៍វិទ្យុអេប៊ីស៊ី មិនទាន់អត្ថាធិប្បាយទាក់ទងបញ្ហានេះនៅឡើយ រហូតមកដល់ពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ