គជប រំឭកគណបក្សមិនឃោសនានយោបាយដែលនាំដល់ជម្លោះសាសនា ឬពូជសាសន៍
ខណៈដែលការឃោសនាបោះឆ្នោតកាន់តែខិតជិតចូលមកដល់ គណៈកម្មាធិការជាតិរៀបចំការបោះឆ្នោត ហៅកាត់ថា គជប បានប្រកាសប្រាប់ដល់គណបក្សនយោបាយទាំងអស់ថា ត្រូវបញ្ចៀសឲ្យបាននូវការឃោសនាទាំងឡាយណាដែលនាំដល់ជម្លោះសាសនា និងពូជសាសន៍។ ការឃោសនាបោះឆ្នោតត្រូវតែធ្វើឡើងនៅក្រោមផ្លូវច្បាប់ ហើយមិនត្រូវនាំទៅដល់អំពើហឹង្សាឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣២
នៅថ្ងៃនេះ គណៈកម្មាធិការជាតិរៀបចំការបោះឆ្នោត ហៅកាត់ថា គជប បានរំឭកដល់ គណបក្សនយោបាយទាំងអស់ថា ត្រូវបញ្ចៀសឲ្យបាននូវការឃោសនានយោបាយណាដែលនាំឲ្យមានជម្លោះពូជសាសន៍ ឬសាសនា។
លោក ទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោត បានប្រាប់វិទ្យុបារាំង RFI ថា នេះមិនមែនជារឿងថ្មីអ្វីនោះទេ។ បម្រាមទាំងនេះសុទ្ធតែមានចែងយ៉ាងច្បាស់នៅក្នុងច្បាប់ស្ដីពីការបោះឆ្នោតជ្រើសតាំងតំណាងរាស្ត្រ។ សេចក្ដីក្រើនរំឭករបស់ គជប គ្រាន់តែធ្វើឡើងខណៈការឃោសនាបោះឆ្នោតកាន់តែខិតជិតចូលមកដល់។
លោកបានបន្តទៀតថា ឥឡូវនេះ គជប គ្មានសិទ្ធិគ្រប់គ្រងលើសារនយោបាយផ្សេងៗរបស់គណបក្សឡើយ។ ប៉ុន្តែ ចាប់ពីថ្ងៃទី២៧ ខែមិថុនា ដែលជារដូវកាលឃោសនាបោះឆ្នោត គជប នឹងឃ្លាំមើលគ្រប់ការឃោសនារបស់គណបក្សនយោបាយ និងអ្នកនយោបាយទាំងអស់។ ប្រសិនបើមានការឃោសនាណាមិនត្រឹមត្រូវតាមច្បាប់ គជប នឹងមានវិធានការក្រើនរំឭក រួចព្រមាន។ បើនៅតែមិនស្ដាប់ គជប នឹងផាកពិន័យ ឬធ្ងន់ធ្ងរជាងនេះទៅទៀតនោះគឺ បញ្ឈប់ការឃោសនាតែម្ដង។
ពាក់ព័ន្ធនឹងការឃោសនានយោបាយដែលនាំដល់ជម្លោះពូជសាសន៍នេះដែរ លោកយឹម សុវណ្ណ មន្ដ្រីនាំពាក្យគណបក្សសង្គ្រោះជាតិ គណបក្សសង្គ្រោះជាតិដែលតែងតែឃោសនាប្រឆាំងនឹងវត្តមានកុះកររបស់ជនជាតិវៀតណាមលើទឹកដីកម្ពុជា បានបញ្ជាក់ប្រាប់វិទ្យុបារាំង RFI ថា គណបក្សលោកមិនបាន «ប្រឆាំង» នឹងវត្តមានរបស់ជនជាតិវៀតណាមនៅលើទឹកដីកម្ពុជាទេ។ ប៉ុន្តែគណបក្សលោកកំពុង «ទាមទារ» ឲ្យមានការធ្វើអន្តោប្រវេសន៍ស្របច្បាប់ពីសំណាក់ជនជាតិវៀតណាមទាំងនោះ។ លោកបានឲ្យដឹងជាចុងក្រោយថា ប្រសិនបើ ច្បាប់ហាមឃាត់មិនឲ្យមានការឃោសនាដែលនាំឲ្យមានជម្លោះពូជសាសន៍ គណបក្សលោកនឹងគោរពតាមច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ