គណបក្សសម រង្ស៊ី តែងតំាងតំណាងរាស្រ្តថ្មីជំនួសលោកម៉ៅ មុនីវណ្ណ
ភ្លាមៗបន្ទាប់ពីលោក ម៉ៅ មុនីវណ្ណ តំណាងរាស្រ្តមណ្ឌលកំពង់ចាម ចុះចូលជាមួយគណបក្សសិទ្ធិមនុស្ស គណបក្ស សម រង្ស៊ីបានសម្រេចតែងតំាងបេក្ខភាពតំណាងរាស្រ្ត ថ្មីអោយទៅអង្គុយកៅអី លោក ម៉ៅ នុមីវណ្ណក្នុងសភានៅព្រឹកថ្ងៃសុក្រនេះ។ លោកម៉ៅ មុនីវណ្ណដែលអស់តួនាទីជាអ្នកតំណាងរាស្រ្ត ចាប់ពីពេលនេះតទៅ បានបង្ហើបថា ចលនាចាកចេញពីបក្សសម រង្ស៊ីនឹងមានបន្តបន្ទាប់ទៀត។ តែមន្រ្តីជាន់ខ្ពស់គណបក្ស សម រង្ស៊ី មិនព្រួយបារម្ភជាមួយចលនាចាកចេញពីគណបក្ស ម្នាក់ ពីរនាក់នោះទេ ពីព្រោះគណបក្សទទួលត្រលប់មកវិញ នូវសកម្មជនរាប់រយនាក់ឯណោះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់អ៊ឹម ណាវិនពីទីក្រុងភ្នំពេញ
គណបក្សសម រង្ស៊ី បានដាក់សំណើភ្លាមៗទៅរដ្ឋសភាឲ្យធ្វើការផ្លាស់ប្តូរតំណាងរាស្រ្តមណ្ឌលកំពង់ចាម បន្ទាប់ពី លោកម៉ៅ មុនីវណ្ណដើរចេញពីគណបក្ស។ គេបានស្នើឲ្យដកលោក ម៉ៅ មុនីវណ្ណចេញ និងដាក់លោកនូ ពិសាខា ចូលជំនួសវិញ។
សំណើរបស់គណបក្សសម រង្ស៊ី ក្នុងការផ្លាស់ប្តូរបេក្ខភាពតំណាងរាស្រ្តនេះ ត្រូវបានគណៈកម្មាធិការអចិន្រ្តៃយ៏រដ្ឋសភាយល់ព្រមភ្លាមៗ កាលពីព្រឹកថ្ងៃសុក្រទី ២៥ មីនានេះ។ លោកជាម យៀប សមាជិកគណៈកម្មាធិការអចិន្រ្តៃយ៏រដ្ឋសភា បាននិយាយថា តំណាងរាស្រ្តថ្មី របស់គណបក្សសម រង្ស៊ី លោក នូ ពិសាខា នឹងត្រូវប្រកាសពេញសិទ្ធិជាអ្នកតំណាងរាស្រ្ត នៅព្រឹកថ្ងៃទី១ ខែមេសាខាងមុខនេះ។ លោកជាម យៀបបន្តថា នីតិវិធីផ្លាស់ប្តូរតំណាង នៅក្នុងសភា គ្មានអ្វីស្មុគស្មាញនោះទេ សំខាន់អាស្រ័យលើការសម្រេចរបស់គណបក្សនីមួយៗតែប៉ុណ្ណោះ។
ចេញមុខគាំទ្រគណបក្សសិទ្ធិមនុស្ស លោក ម៉ៅ មុនីវណ្ណ អ្នកតំណាងរាស្រ្តវ័យក្មេង របស់គណបក្ស សម រង្ស៊ី បានរិះគន់ការដឹកនាំគណបក្សប្រឆំាងថា ស្ថិតនៅក្រោមគំនាបបក្សពួកនិយម គ្រួសារនិយម និងគ្មានប្រជាធិបតេយ្យ។ ពីខេត្តកណ្តាលក្នុងពេលចុះមូលដ្ឋានបម្រើសកម្មភាពនយោបាយ គណបក្សថ្មីរបស់លោក គឺ គណបក្សសិទ្ធិមនុស្ស នៅព្រឹកនេះ លោក ម៉ៅ មុនីវណ្ណ ថ្លែងថា លោកមិនសោកស្តាយចំពោះការបាត់បង់តួនាទីជាអ្នកតំណាងរាស្រ្ត ក្នុងគណបក្សសម រង្ស៊ីនោះទេ។
លោក ម៉ៅ មុនីវណ្ណបានបង្ហើបអោយដឹងផងដែរថា សមាជិកគណបក្សសម រង្ស៊ី ក្នុងមូលដ្ឋានខេត្តកំពង់ចាម ជាច្រើននាក់ទៀតនឹងដើរចេញពីគណបក្សសម រង្ស៊ី តាមលោក។ សកម្មជនគណបក្សសម រង្ស៊ីចុះចូលជាមួយគណបក្សសិទ្ធិមនុស្ស នឹងមានចំនួនប៉ុន្មាន នោះ លោក ម៉ៅ មុនីវណ្ណ នឹងប្រកាសឲ្យដឹង នៅសប្តាហ៍ក្រោយនេះ។
ការបែកបាក់សមាជិកគណបក្សសម រង្ស៊ីក្នុងពេលនេះ ត្រូវបានលោកនាយករដ្ឋមន្រ្តី ហ៊ុន សែន ហៅថា ជាការបែកបាក់ក្នុងទ្រង់ទ្រាយធំមួយ។ កាលពីល្ងាចថ្ងៃព្រហស្បតិ៍ម្សិលមិញលោកនាយករដ្ឋមន្រ្តីបានព្យាករថា គណបក្សប្រឆំាងនឹងបន្តបែកបាក់ទៅមុខទៀត។
“មិនមែនដូចការលើកឡើងរបស់លោកនាយករដ្ឋមន្រ្តីនោះទេ គណបក្ស សម រង្ស៊ី គ្មានការបែកបាក់ទ្រង់ទ្រាយធំឡើយ” នេះជាការឆ្លើយតបរបស់មន្រ្តីជាន់ខ្ពស់គណបក្សសម រង្ស៊ី។ លោក យឹម សុវណ្ណ អ្នកនាំពាក្យ គណបក្សសមរង្ស៊ី អះអាងថា គណបក្ស សម រង្ស៊ី មិនខ្វល់ពីការចាកចេញបុគ្គលមួយចំនួនតូច ដែលស្វែងរកផលប្រយោជន៍ផ្ទាល់ខ្លួននោះទេ។ មានមនុស្សម្នាក់ ឬពីរនាក់ដើរចេញ តែនឹងមានអ្នកចូលវិញរាប់រយនាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ