កម្ពុជា -

អត្ថបទចុះផ្សាយនៅថ្ងៃ ពុធ 03 តុលា 2012 - ព័ត៌មានទើបកែប្រើលើកចុងក្រោយ ថ្ងៃ ពុធ 03 តុលា 2012

តុលាការតម្កល់រឿង មិនចាត់ការ ករណីឃាតកម្មលើសកម្មជនព្រៃឈើ លោក ឈុត វុទ្ធី

សកម្មជនការពារព្រៃឈើបានចេញពីទីរួមខេត្តកោះកុងទៅដល់ចំណុចវាលបីក្នុងស្រុកមណ្ឌលសីមា

ដោយ លី ម៉េងហួរ

តុលាការខេត្តកោះកុង បានសម្រេចតម្កល់រឿង មិនចាត់ការលើករណីឃាតកម្ម បាញ់សម្លាប់សកម្មជនការពារព្រៃឈើ លោក ឈុត វុទ្ធី។ មូលហេតុ ត្រូវបានព្រះរាជអាជ្ញា អះអាងថា មកពីសំណុំរឿងក្តីនោះ ឃាតកត្រូវបានសម្លាប់ ដូច្នេះបណ្តឹងអាជ្ញា ក៏រលត់ផងដែរ។ យ៉ាងណាក៏ដោយ នៅព្រឹកថ្ងៃទី៤តុលាស្អែកនេះ តុលាការ ខេត្តកោះកុង នឹងបើកសវនាការ កាត់ទោសលើបុរសជាប់ចោទ រ៉ាន់ បូរ័ត្ន ដែលបានសម្លាប់ប៉េអឹម ឈ្មោះ អ៊ិន រតនា ក្នុងព្រឹត្តិការណ៍ផ្ទុះអាវុធ កាលពីថ្ងៃទី២៦មេសា។ ក្នុងហេតុការណ៍នោះ លោក ឈុត វុទ្ធី ត្រូវបានអាជ្ញាធរ អះអាងថា បានស្លាប់ ដោយសារតែប៉េអឹម អ៊ិន រតនា បាញ់។

សេចក្តីរាយការណ៍របស់ លី ម៉េងហួរ ពីទីក្រុងភ្នំពេញ

ស្តាប់ (03:32)

03/10/2012

សវនាការ នៅព្រឹកថ្ងៃព្រហស្បតិ៍ ទី៤ ខែតុលា ឆ្នាំ២០១២ ដែលតុលាការខេត្តកោះកុង គ្រោងនឹងធ្វើនោះ គឺមិនមែនកាត់ទោសលើរឿងឃាតក បាញ់សម្លាប់លោក ឈុត វុទ្ធី សកម្មជនព្រៃឈើទេ តែជាការកាត់ទោសបុរសឈ្មោះ រ៉ាន់ បូរ័ត្ន ដែលបានបាញ់សម្លាប់ដោយអចេតនា លើប៉េអឹម ឈ្មោះ អ៊ិន រតនា។ ប៉េអឹម ឈ្មោះ អ៊ិន រតនា ត្រូវបានអាជ្ញាធរអះអាងថា ជាឃាតក បាញ់សម្លាប់លោក ឈុត វុទ្ធី។

ក្រោយព្រឹត្តិការណ៍ផ្ទុះអាវុធ កាលពីថ្ងៃទី២៦ ខែមេសា ឆ្នាំ២០១២ តុលាការខេត្តកោះកុង បានបំបែកសំណុំរឿងក្តីឃាតកម្មលើសកម្មជនការពារព្រៃឈើ លោក ឈុត វុទ្ធី ជាពីរសំណុំរឿង។ ទី១-សំណុំរឿង ប៉េអឹម អ៊ិន រតនា បាញ់សម្លាប់លោក ឈុត វុទ្ធី និងសំណុំរឿងទី២-ឈ្មោះ រ៉ាន់ បូរ័ត្ន បាញ់សម្លាប់ដោយអចេតនា លើប៉េអឹម អ៊ិន រតនា។

លោក ស្រី ម៉ាក់នី ព្រះរាជអាជ្ញារង របស់តុលាការសាលាដំបូង ខេត្តកោះកុង ដែលបានកាន់សំណុំរឿងក្តីពាក់ព័ន្ធនឹងឃាតកម្មលើលោក ឈុត វុទ្ធី បានឲ្យដឹងនៅព្រឹកថ្ងៃទី៣ ខែតុលា ឆ្នាំ២០១២ ថា "សវនាការ នៅព្រឹកថ្ងៃទី៤ ខែតុលា ឆ្នាំ២០១២ នៅតុលាការខេត្តកោះកុង ធ្វើឡើងលើករណីជនជាប់ចោទ រ៉ាន់ បូរ័ត្ន ដែលធ្វើឲ្យ អ៊ិន រតនា ស្លាប់ ដោយការរាកៃកាំភ្លើង។ ចំណែកករណីលោក ឈុត វុទ្ធី តុលាការតម្កល់រឿងឥតចាត់ការ ដោយសារ អ៊ិន រតនា ក៏ស្លាប់ដែរ"។

ក្រុមគ្រួសារលោក ឈុត វុទ្ធី បានសម្តែងការខកចិត្ត ខណៈដែលតុលាការខេត្តកោះកុង បានសម្រេចតម្កល់សំណុំរឿងរបស់លោក ឈុត វុទ្ធី មិនចាត់ការ។ ផ្ទុយទៅវិញ តុលាការបែរជារកយុត្តិធម៌ តែលើឃាតក បាញ់សម្លាប់លោកឈុត វុទ្ធី ទៅវិញ។ នេះបើតាមអ្នកស្រី សំ ចាន់ធី ភរិយាសពលោកឈុតវុទ្ធី ដែលមិនត្រូវបានតុលាការកោះហៅ ឲ្យចូលរួមសវនាការនៅថ្ងៃព្រហស្បតិ៍នោះឡើយ។

អ្នកស្រី សំចាន់ធី បានបន្ថែមថា "គេកាត់តែរឿង រ៉ាន់ បូរ័ត្ន ជាមួយនឹង អ៊ិន រតនា ទេ។ ចំណែកករណីប្តីរបស់ខ្ញុំ គេតម្កល់រឿង មិនចាត់ការ។ ដូច្នេះ ខ្ញុំអត់សប្បាយចិត្ត ព្រោះថា គេបញ្ចប់រឿងប្តីខ្ញុំ និងអ៊ិនរតនា។ ខ្ញុំជាភរិយា និងកូន ៣ នាក់ មិនសប្បាយចិត្តទេ។ ខ្ញុំមានភស្តុតាងថ្មីៗ ( ក្នុងរឿងក្តីឃាតកម្មនោះ ) ប៉ុន្តែខ្ញុំអត់មានឱកាសបង្ហាញតុលាការ ព្រោះខ្ញុំអត់បានចូលតុលាការ"។

យុវជន រ៉ាន់ បូរ័ត្ន ជាសន្តិសុខក្រុមហ៊ុន Timber Green ត្រូវបានតុលាការ ចោទប្រកាន់ ពីបទ មនុស្សឃាតដោយអចេតនា ហើយត្រូវបានចាប់ឃុំខ្លួនភ្លាមៗ ក្រោយពីកើតហេតុ។ យ៉ាងណាក៏ដោយ លោកព្រះរាជអាជ្ញារង ស្រី ម៉ាក់នី មិនបានបញ្ជាក់ថា សំណុំរឿងក្តីនោះ មានសាក្សីប៉ុន្មាននាក់ទេ តែលោកអះអាងថា លោកបានចេញដីកាកោះហៅសាក្សីទាំងអស់រួចហើយ ដើម្បីចូលរួមសវនាការ នៅតុលាការខេត្តកោះកុង នាថ្ងៃស្អែកនេះ។

លោក អ៊ិន គង់ជិត សកម្មជនអង្គការសិទ្ធិមនុស្ស លីកាដូ ប្រចាំខេត្តកោះកុង បានឲ្យដឹងថា ក្នុងសំណុំរឿងក្តីនោះ មានសាក្សីសរុបចំនួន ៧ នាក់ ដែលតុលាការបានធ្វើការសាកសួរកន្លងមក។ ក្នុងនោះ ក៏មានស្ត្រីអ្នកកាសែតភាសាអង់គ្លេស-ខ្មែរ The Cambodia Daily ពីរនាក់ផងដែរ។ ស្ត្រីអ្នកកាសែត បានរួមដំណើរជាមួយលោក ឈុត វុទ្ធី ប្រធានអង្គការការពារធនធានធម្មជាតិ ចុះទៅកាន់តំបន់កើតហេតុ មុនពេលមានព្រឹត្តិការណ៍ផ្ទុះអាវុធ បណ្តាលឲ្យលោក ឈុត វុទ្ធី និងប៉េអឹម អ៊ិន រតនា បានសម្លាប់ កាលពីថ្ងៃទី២៦មេសា ឆ្នាំ២០១២ នៅតំបន់ព្រៃភ្នំ ក្នុងខេត្តកោះកុង៕