ខ្មែរ និងបរទេសរង់ចាំចូលរួមពិធីថ្វាយព្រះភ្លើងនៅថ្ងៃចន្ទស្អែក
ប្រជាជាតិខ្មែរ មិនថា នៅក្នុងប្រទេសនិងក្រៅប្រទេសទេបាននិងកំពុងរង់ចាំចូលរួមពិធីថ្វាយព្រះភ្លើងព្រះបរមសពសម្តេចព្រះបាទ នរោត្តម សីហនុ អតីតព្រះមហាក្សត្រនៃព្រះរាជាណាចក្រកម្ពុជានៅថ្ងៃចន្ទស្អែក។ ក្រៅពីប្រជារាស្ត្រខ្មែរ ឥស្សរជនបរទេសសំខាន់ៗជិត២០ប្រទេសបានអញ្ជើញមកដល់ទីក្រុងភ្នំពេញជាបណ្តើរៗហើយ ដើម្បីចូលរួមពិធីថ្វាយព្រះភ្លើងព្រះបរមសពសម្តេចឪ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១០
នៅថ្ងៃអាទិត្យនេះ ប្រជារាស្ត្រខ្មែររាប់ម៉ឺននាក់មកពីគ្រប់ទិសទីបន្តចូលរួមគោរពព្រះបរមសពសម្តេចព្រះបាទ នរោត្តម សីហនុ អតីតព្រះមហាក្សត្រនៃព្រះរាជាណាចក្រកម្ពុជានៅវាលព្រះមេរុក្បែរព្រះបរមរាជវាំង។ ការអនុញ្ញាតអោយប្រជាពលរដ្ឋខ្មែរចូលគោរពព្រះបរមសពអាចត្រូវបានគេពន្យារហូតដល់ព្រឹកថ្ងៃចន្ទស្អែកពីម៉ោង៧ដល់ម៉ោង៩ព្រឹកបន្ថែមទៀត។
សម្រាប់ថ្ងៃអាទិត្យនេះ មនុស្សក្នុងខ្ទង់ម៉ឺននាក់បានមកគោរពព្រះបរមសពចុងក្រោយ នៅវាលព្រះមេរុ។ ប៉ុន្តែសម្រាប់ថ្ងៃចន្ទស្អែក ជាថ្ងៃថ្វាយព្រះភ្លើង គេនៅមិនទាន់អាចទស្សន៍ទាយពីចំនួនអ្នកចូលរួមបាននៅឡើយទេ។ លោក ជួន សុវណ្ណ ស្នងការនគបាលរាជធានីភ្នំពេញបានថ្លែងប្រាប់នៅថ្ងៃអាទិត្យនេះថា លោកពិបាកនឹងប៉ាន់ស្មានចំនួនអ្នកចូលរួមនៅថ្ងៃស្អែកណាស់ ពីព្រោះអ្វីៗវាអាស្រ័យទៅលើការសម្រេចចិត្តចុងក្រោយរបស់បងប្អូនដោយខ្លួនឯង។
ចំពោះលោក ឡុង ឌីម៉ង់ អ្នកនាំពាក្យសាលារាជធានីភ្នំពេញវិញ លោកក៏ពិបាកប៉ាន់ស្មានចំនួនមនុស្សដែលគ្រោងនឹងមកចូលរួមដែរ។ លោកបានពន្យល់ថា អ្នកខ្លះអាចសម្រេចចិត្តតាមដានពិធីថ្វាយព្រះភ្លើងតាមរយៈទូរទស្សន៍នៅគេហដ្ឋានប៉ុន្តែអ្នកខ្លះទៀតក៏អាចសម្រេចចិត្តឡើងមកទីក្រុងភ្នំពេញដើម្បីចូលរួមពិធីផ្ទាល់តែម្តងក៏មានដែរ។
បើទោះបីជាអាជ្ញាធរមិនទាន់ហ៊ានប៉ាន់ស្មានពីចំនួនអ្នកចូលក៏ដោយ ក្តីក៏តួលេខកន្លងមកបានបង្ហាញថា ក្នុងអំឡុងការយាងព្រះរាជសពពីទីក្រុងប៉េងកាំងមកទីក្រុងភ្នំពេញ មានប្រជាពលរដ្ឋចូលរួមជាង១លាននាក់។ ក្នុងអំឡុងពិធីដង្ហែរព្រះបរមសពចេញពីព្រះបរមរាជវាំងចូលទៅក្នុងវាលព្រះមេរុ ប្រជារាស្រ្តប្រមាណជា២០ម៉ឺននាក់ត្រូវបានគេប៉ាន់ស្មានថា បានចូលរួម។ ប៉ុន្តែសម្រាប់ពិធីថ្វាយព្រះភ្លើងនៅថ្ងៃស្អែកនេះ គេនៅមិនទាន់ហ៊ានប៉ាន់ស្មាននៅឡើយទេ។
ក្រៅពីប្រជារាស្ត្រខ្មែរ ឥស្សរជនសំខាន់ៗមកពីជិត២០ប្រទេសដែលនឹងត្រូវចូលរួមពិធីថ្វាយព្រះភ្លើងនៅថ្ងៃស្អែកនេះ បានមកដល់ទីក្រុងភ្នំពេញជាបណ្ដើរហើយ។ បើយោងតាមកម្មវិធីដែលបានគ្រោងទុក ព្រះករុណាសម្តេចព្រះបាទនរោត្តម សីហមុនី និងសម្តេចព្រះមហាក្សត្រី នរោត្តម មុនីនាថ ស្តេចនឹងយាងថ្វាយព្រះភ្លើងផ្ទាល់ព្រះអង្គនៅវេលាម៉ោងប្រមាណជា៦ល្ងាចនៅថ្ងៃទី៤ខែកុម្ភៈខាងមុខនេះ។
ទាក់ទងទៅនឹងការរៀបចំព្រះបរមមេន ព្រះករុណាព្រះមហាក្សត្រ នរោត្តម សីហមុនី និងសម្តេចព្រះវររាជមាតា នរោត្តម មុនិនាថ សីហនុ ទ្រង់បានសម្តែងនូវការកោតសរសើរចំពោះសម្តេចចៅហ្វាវាំង គង់ សំអុល រដ្ឋមន្ត្រីក្រសួងព្រះបរមរាជវាំងដែលបានដឹកនាំការសាងសង់ព្រះបរមមេន ទាំងយប់ទាំងថ្ងៃអស់រយៈពេល១១សប្តាហ៍រហូតសម្រេចបានជាស្ថាពរ។
ព្រះមហាក្សត្រ និងសម្តេចព្រះវររាជមាតា ទ្រង់បានកត់សម្គាល់នៅក្នុងព្រះរាជសារថា ព្រះបរមមេនប្រកបដោយក្បូរក្បាច់រចនាល្អឥតខ្ចោះនៃកូនខ្មែរសម័យបុរាណ រួម និងសម័យបច្ចេកវិជ្ជាទំនើប បានបង្ហាញនូវស្នាដៃដ៏ប៉ិនប្រសព្វ និងមានសោភណភាពយ៉ាងប្រណីតតាមរចនាបទប្រពៃណីរបស់ស្ថាបត្យករ វិស្វករនារី បុរស គួរជាទីមោទនភាពនៃប្រជាជាតិ និងប្រជារាស្ត្រកម្ពុជា ហើយសក្តិសមបំផុតនឹងព្រះកិត្តិយសព្រះកិត្តិនាម ព្រះករុណា ព្រះមហាវីរក្សត្រ ព្រះវររាជបិតាជាតិខ្មែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ