កូនប្រុសលោកហ៊ុន សែន និងលោក ស ខេង ជាប់ជាសមាជិកសភាក្មេងជាងគេ
គណៈកម្មាធិការជាតិរៀបចំការបោះឆ្នោតបានធ្វើបញ្ជីឈ្មោះលំដាប់អាយុនៃតំណាងរាស្ត្រជាប់ឆ្នោតទាំង១២៣រូប ហើយដែលគេឃើញថា លោកហ៊ុន ម៉ានី កូនប្រុសលោកនាយករដ្ឋមន្ត្រី ហ៊ុន សែន និងលោកស សុខា កូនប្រុសលោកឧបនាយករដ្ឋមន្ត្រី ស ខេង គឺជាសមាជិកសភាដែលមានវ័យក្មេងជាងគេ។ យោងតាមបញ្ជីលំដាប់អាយុតំណាងរាស្ត្រនីតិកាលទី៥ ដែលមានវ័យចំណាស់ជាងគេ ក៏មកពីគណបក្សប្រជាជនកម្ពុជាដែរ គឺលោកហេង សំរិន អាយុ៧៩ឆ្នាំ និងលោកគាត ឈន់ ដែលមានអាយុ៧៨ឆ្នាំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៩
នៅក្នុងនីតិកាលទី៥នេះ បេក្ខជនជាប់ឆ្នោតជាតំណាងរាស្ត្រដែលមានវ័យក្មេងជាងគេ និងចាស់ជាងគេ សុទ្ធតែមកពីគណបក្សប្រជាជនកម្ពុជា។ នេះបើយោងតាមបញ្ជីឈ្មោះសមាជិករដ្ឋសភា គិតតាមលំដាប់អាយុពីខ្ពស់ទៅទាប ដែលត្រូវបានផ្សព្វផ្សាយដោយគណៈកម្មាធិការជាតិរៀបចំការបោះឆ្នោត។ បញ្ជីឈ្មោះនេះបង្ហាញថា លោក ហ៊ុន ម៉ានី ដែលជាកូនប្រុសរបស់លោកនាយករដ្ឋមន្ត្រីហ៊ុន សែន ហើយដែលបានជាប់ឆ្នោតជាតំណាងរាស្ត្រមណ្ឌលកំពង់ស្ពឺ និងលោកស សុខា កូនប្រុសរបស់លោកឧបនាយករដ្ឋមន្ត្រី ស ខេង ដែលជាប់ឆ្នោតក្នុងមណ្ឌលព្រៃវែង មានអាយុ៣២ឆ្នាំ។
ចំណែកឯសមាជិកសភាដែលមានអាយុច្រើនបន្ទាប់ពីលោក ហ៊ុន ម៉ានី និងលោក ស សុខា គឺជាតំណាងរាស្ត្ររបស់គណបក្សសង្គ្រោះជាតិ នោះគឺលោក កង គឹមហាក់ អាយុ៣៣ឆ្នាំ តំណាងរាស្ត្រមណ្ឌលខេត្តកំពង់ចាម និងលោក អ៊ុំ សំអាន អាយុ៣៧ឆ្នាំ តំណាងរាស្ត្រមណ្ឌលខេត្តសៀមរាប។
តំណាងរាស្ត្រដែលមានអាយុច្រើនជាងគេក្នុងនីតិកាលទី៥នេះ គឺលោកហេង សំរិន អាយុ៧៩ឆ្នាំ តំណាងរាស្ត្រមណ្ឌលកំពង់ចាម បន្ទាប់មកគឺ លោកគាត ឈន់ អាយុ៧៨ឆ្នាំ តំណាងរាស្ត្រមណ្ឌលភ្នំពេញ ដែលមកពីគណបក្សប្រជាជនកម្ពុជា។ គណបក្សសង្គ្រោះជាតិក៏មានសមាជិកសភាវ័យចំណាស់ជាងគេដែរ គឺលោកប៉ែន សុវណ្ណ ដែលមានអាយុ៧៧ឆ្នាំតំណាងរាស្ត្រមណ្ឌលកំពង់ស្ពឺ បន្ទាប់មកគឺលោក កែវ សម្បត្តិ អាយុ៧១ឆ្នាំ តំណាងរាស្ត្រមណ្ឌលភ្នំពេញ។
គួរបញ្ជាក់អោយដឹងថា នៅក្នុងបញ្ជីឈ្មោះតំណាងរាស្ត្រជាប់ឆ្នោតនេះ គេនៅមិនទាន់ឃើញឈ្មោះលោកសម រង្ស៊ី ប្រធានគណបក្សសង្គ្រោះជាតិនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ