បក្សជាប់ឆ្នោតទាំងពីរព្រមព្រៀងលើការថែរក្សាសន្តិភាព
គ្មានការវិវត្តន៍ថ្មីដែលត្រូវបានរកឃើញដោយគណបក្សជាប់ឆ្នោតទាំងពីរ ក្នុងដំណោះស្រាយនៃបញ្ហាការបោះឆ្នោតឡើយ នៅក្នុងជំនួបទ្វេភាគី នៅថ្ងៃរសៀលថ្ងៃអង្គារ ម្សិលមិញ។ ប៉ុន្តែ បើតាមការអះអាងរបស់លោកមន្ត្រីជាន់ខ្ពស់នៃគណបក្សប្រជាជនកម្ពុជា គណបក្សទាំងពីរបានឯកភាពគ្នាលើចំនុចសំខាន់មួយ គឺការថែរក្សាសន្តិភាព។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៥
អ្នកនយោបាយនៃគណបក្សប្រជាជនកម្ពុជា និងគណបក្សសង្គ្រោះជាតិដែលបានជួបគ្នាកាលពីរសៀលថ្ងៃអង្គារ ម្សិលមិញនោះ មិនបានថ្លែងប្រាប់អ្នកកាសែតច្បាស់លាស់ថា ពួកគេបាននិយាយអំពីប្រធានបទអ្វីពិតប្រាកដឡើយ។ ក្រោយជួបគ្នាលើកទី៣ តំណាងគណបក្សទាំងពីរបានត្រឹមតែបញ្ជាក់ឡើងវិញថា ពួកគេបានផ្តើមស្វែងយល់ជំហរពីគ្នាទៅវិញទៅមក។
ប៉ុន្តែ នៅព្រឹកថ្ងៃពុធនេះ មន្ត្រីជាន់ខ្ពស់គណបក្សប្រជាជនកម្ពុជា លោកជាម យៀប បានប្រាប់វិទ្យុបារាំងអោយដឹងថា ចំនុចរួមសំខាន់មួយដែលគណបក្សទាំងពីរបានឯកភាពជាមួយគ្នា គឺការថែរក្សាសន្តិភាពរបស់កម្ពុជា។ លោកជាម យៀប មិនបានមានវត្តមាននៅក្នុងកិច្ចប្រជុំទ្វេភាគីដែលគណបក្សប្រជាជនកម្ពុជា បានដឹកនាំដោយលោក ព្រុំ សុខានោះឡើយ។ ប៉ុន្តែ ប្រសិនបើគេជឿប្រសាសន៍របស់ ជាម យៀបនោះ គណបក្សទាំងពីរបាននិយាយអំពីបញ្ហាសន្តិសុខសង្គម ខណៈដែលគណបក្សសង្គ្រោះជាតិនៅប្រកាន់ជំហរចុងក្រោយដោយការដឹកនាំមហាបាតុកម្មអហិង្សា ហើយអាជ្ញាធរនៃរដ្ឋាភិបាលចាំផ្ទះរបស់គណបក្សប្រជាជនកម្ពុជាក៏បានត្រៀមកំលាំងបង្ក្រាប ក្នុងករណីហិង្សាដែរ។
រហូតដល់ថ្ងៃពុធនេះ នៅមិនទាន់មានការបោះដៃរកគ្នាដើម្បីកំណត់អំពីការជួបគ្នាលើកក្រោយទៀតនៅឡើយទេ បន្ទាប់ពីតំណាងគណបក្សទាំងពីរ ដែលបានជួបគ្នាកាលពីរសៀលថ្ងៃអង្គារម្សិលមិញនោះ បានអះអាងថា ពួកគេត្រូវនាំយកលទ្ធផលនៃការស្វែងយល់ជំហរគ្នា ទៅប្រាប់ថ្នាក់ដឹកនាំរៀងៗខ្លួននោះ។ លោកជាម យៀប អះអាងថា អាចមានជំនួបនៅពេលក្រោយទៀត ប៉ុន្តែ គេនៅមិនទាន់អាចដឹងអំពីពេលវេលាច្បាស់នោះទេ។ វិទ្យុយើងមិនអាចទាក់ទងមន្ត្រីគណបក្សសង្គ្រោះជាតិដើម្បីអត្ថាធិប្បាយអំពីបញ្ហាទាំងនេះបានឡើយ នៅព្រឹកថ្ងៃពុធនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ