ប្រទេសម្ចាស់ជំនួយអំពាវនាវវៀតណាមឲ្យធ្វើកំណែទម្រង់ប្រព័ន្ធធនាគារ និងសហគ្រាសរដ្ឋ
នៅថ្ងៃអង្គារ ទី១១ ធ្នូ ក្រុមប្រទេសម្ចាស់ជំនួយបានអំពាវនាវរដ្ឋាភិបាលវៀតណាមឲ្យផ្តើមគិតគូរធ្វើកំណែទម្រង់លើប្រព័ន្ធធនាគារ និងសហគ្រាសរដ្ឋជាបន្ទាន់។ សេចក្តីអំពាវនាវនេះបានធ្វើឡើង ចំពេលដែលកំណើនសេដ្ឋកិច្ចក្នុងឆ្នំា ២០១២ មានអត្រាទាបខ្លំាង បើគិតក្នុងរយៈពេល ១៣ឆ្នំាចុងក្រោយនេះ។
ចុះផ្សាយនៅថ្ងៃ៖
ស្តាប់ - ០២:៤៨
នៅក្នុងកិច្ចប្រជុំប្រចំាឆ្នំាក្នុងទីក្រុងហាណូយ លោកស្រីនាយកធនាគារពិភពលោកប្រចំាប្រទេសវៀតណាមបានវាយតម្លៃថា កំណើនសេដ្ឋកិច្ចវៀតណាមសម្រាប់ឆ្នំា ២០១២ នឹងមានកម្រិតទាបខ្លំាង បើគិតតំាងពីឆ្នំា ១៩៩៩ មក។ តាមរយៈសេចក្តីជូនដំណឹងមួយចេញផ្សាយនៅយប់មិញ លោកស្រីនាយកធនាគារពិភពលោកប្រចំាប្រទេសវៀតណាម Victoria Kwakwa បានបញ្ជាក់ថា សក្តានុពលនៃសេដ្ឋកិច្ចវៀតណាមបានថយចុះយ៉ាងច្រើន និងដែលចំាបាច់ធ្វើកំណែទម្រង់លើវិស័យមួយចំនួនដោយចៀសមិនរួច ពិសេសលើប្រព័ន្ធធនាគារ និងរោងចក្រ សហគ្រាសរបស់រដ្ឋ។ សម្រាប់លោកស្រី Victoria Kwakwa សក្តានុពលសេដ្ឋកិច្ចថយចុះនំាឲ្យមានកំណើនសេដ្ឋកិច្ច និងការប្រកួតប្រជែងធ្លាក់ចុះ។ យោងតាមក្រុមអ្នកសេដ្ឋកិច្ច សូម្បីតែរដ្ឋាភិបាលវៀតណាមខ្លួនឯងក៏បានទទួលស្គាល់ពីកំណើនសេដ្ឋកិច្ចធ្លាក់ចុះក្នុងឆ្នំា ២០១២ ពោលគឺមានអត្រាប្រមាណតែ ៥,២% ប៉ុណ្ណោះ។ គឺជាអត្រាមួយដ៏ទាបដែលមិនធ្លាប់មានទេ ក្នងរយៈពេល ១៣ឆ្នំាចុងក្រោយនេះ។
សូមជម្រាបជូនថា ជារៀងរាល់ឆ្នំា វៀតណាមតែងតែបានទទួលជំនួយអន្តរជាតិសម្រាប់ការអភិវឌ្ឍន៍ប្រទេសរបស់ខ្លួន។ សម្រាប់ឆ្នំា ២០១៣ ខាងមុខ ក្រុមប្រទេសផ្តល់ជំនួយបានសន្យាផ្តល់ឲ្យចំនួន ៦ ៥០០លានដុល្លារ។ ដូចជាសព្វមួយដង ជប៉ុនជាប្រទេសដែលបានសន្យាផ្តល់ជំនួយច្រើនជាងគេ គឺមានទឹកប្រាក់ ២ ៦០០លានដុល្លារ បន្ទាប់មកសហភាពអឺរ៉ុបបានសន្យាផ្តល់ជំនួយចំនួនក្នុងទឹកប្រាក់ ៩៦០លានដុល្លារ។ អ្វីជាការកត់សម្គាល់ ទំហំប្រាក់ជំនួយបរទេសចំពោះរដ្ឋាភិបាលវៀតណាមបានធ្លាក់ចុះជាបន្តបន្ទាប់ក្នុងរយៈពេល ៣ឆ្នំាជាប់ៗគ្នា បន្ទាប់ពីទទួលបានយ៉ាងច្រើនសម្បើមម្តងក្នុងឆ្នំា ២០១០ មានទឹកប្រាក់ចំនួន ៨ ០០០លានដុល្លារ។ យ៉ាងណាក៏ដោយ លោក Bui Quang Vinh រដ្ឋមន្រ្តីក្រសួងផែនការ និងវិនិយោគវៀតណាមបានអះអាងថា ទោះបីជាទំហំប្រាក់ជំនួយសម្រាប់ឆ្នំា ២០១៣ មានតែ ៦ ៥០០លានដុល្លារក៏ដោយ ក៏វានៅតែសារៈសំខាន់ និងមានអត្ថន័យធំធេងណាស់សម្រាប់ប្រទេសកំពុងអភិវឌ្ឍដូចវៀតណាម។
ទន្ទឹមគ្នានេះ ក្រុមប្រទេសម្ចាស់ជំនួយក៏បានដាស់តឿនរដ្ឋាភិបាលទីក្រុងហាណូយឲ្យធ្វើកំណែទម្រង់លើវិស័យមួយចំនួនដោយចៀសមិនរួច ក្នុងនោះមាន ការធ្វើឲ្យប្រសើរឡើងនូវអភិបាលកិច្ចនៅតាមរោងចក្រ សហគ្រាសរបស់រដ្ឋ ការធ្វើកំណែទម្រង់លើប្រព័ន្ធធនាគារ និងពង្រឹងតម្លាភាពនៅតាមវិស័យសាធារណៈ។
គួររំលឹកជូនថា នៅដើមទសវត្សទី ៩០ វៀតណាមត្រូវបានគេរំពឹងទុកថា ជាប្រទេសដែលនឹងមានសេដ្ឋកិច្ចរីកលូតលាស់ខ្លំាង រហូតដល់ធ្វើឲ្យអ្នកខ្លះចាត់ទុកជានាគអាស៊ីនៅថ្ងៃអនាគតទៀតផង។ តែបញ្ហានៅត្រង់ថា របបកុម្មុយនិស្តក្រុងហាណូយនៅតែមិនទាន់អាចធ្វើកំណែទម្រង់លើក្បាលម៉ាស៊ីនសេដ្ឋកិច្ចរបស់ខ្លួន មានន័យថា រដ្ឋាភិបាលនៅតែពិបាកបោះបង់ចោលទំាងស្រុងនូវរបៀបគ្រប់គ្រងសេដ្ឋកិច្ចដែលគេហៅថា « សេដ្ឋកិច្ចផែនការ »។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ