ជនជាតិអ៊ីស្រាអែល៤នាក់ស្លាប់ក្នុងការវាយប្រហារទៅលើវិហារជ្វីហ្វនៅហ្ស៊េរុយសាឡិម
ជនជាតិអ៊ីស្រាអែល ៤នាក់ ត្រូវបាត់បង់ជីវិត នៅថ្ងៃអង្គារនេះ នៅក្នុងការវាយប្រហារទៅលើវិហារជ្វីហ្វនៅហ្ស៊េរុយសាឡិម ដែលគេសង្ស័យថា ជាស្នាដៃរបស់ពួកប៉ាឡេស្ទីន។ នេះគឺជាអំពើហិង្សាថ្មីមួយទៀត នៅក្នុងពេលដែលភាពតានតឹង រវាងអ៊ីស្រាអែល និងប៉ាឡេស្ទីនកំពុងតែកើនឡើងដល់កម្រិតកំពូល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
យោងតាមការអះអាងរបស់ប៉ូលិសអ៊ីស្រាអែល ការវាយប្រហារបានកើតឡើងនៅព្រឹកព្រលឹមថ្ងៃអង្គារ ដោយជនសង្ស័យប៉ាឡេស្ទីន ២រូប ប្រដាប់ដោយកាំបិត និងពូថៅ បានបើកការវាយប្រហារទៅលើវិហារជ្វីហ្វមួយកន្លែង នៅក្រុងហ្ស៊េរុយសាឡិមខាងលិច។ ការវាយប្រហារនេះបានបណ្តាលឲ្យជនជាតិជ្វីហ្វអ៊ីស្រាអែល ៤នាក់ត្រូវបាត់បង់ជីវិត និង ៦នាក់ផ្សេងទៀតត្រូវរងរបួស។ ចំណែកឯជនប៉ាឡេស្ទីនទាំងពីររូបក៏ត្រូវបានប៉ូលិសអ៊ីស្រាអែលបាញ់សម្លាប់ផងដែរ។ ប៉ូលិសអ៊ីស្រាអែលបានចាត់ទុកការវាយប្រហារនេះថា ជាអំពើភេរវកម្ម។
ក្រុមហាម៉ាស់ដែលកំពុងកាន់កាប់តំបន់ហ្កាហ្សា ហើយដែលតែងតែប្រកាន់នយោបាយហិង្សាលើអ៊ីស្រាអែល ថ្វីដ្បិតតែមិនបានប្រកាសទទួលខុសត្រូវ ក៏ប៉ុន្តែ បានចេញមុខលើកសរសើរជនប៉ាឡេស្ទីនទាំងពីររូប ចំពោះការវាយប្រហារនៅព្រឹកមិញនេះ។ ការវាយប្រហារដែលទទួលរងនូវការថ្កោលទោសពីសំណាក់លោកប្រមុខដឹកនាំប៉ាឡេស្ទីន ម៉ះមូដ អាបាស់ ក៏ដូចជា ពីសំណាក់លោកចន ឃែរី រដ្ឋមន្រ្តីការបរទេសអាមេរិក ដែលកំពុងបំពេញទស្សនកិច្ច នៅក្នុងប្រទេសអង់គ្លេស។
លោកនាយករដ្ឋមន្រ្តីអ៊ីស្រាអែល បេនយ៉ាមីន នេតាន់យ៉ាហ៊ូវិញ បានទម្លាក់ការទទួលខុសត្រូវទាំងទៅលើក្រុមហាម៉ាស់ និងក្រុមរបស់លោកម៉ះមូដ អាបាស់។ ប្រមុខរដ្ឋាភិបាលអ៊ីស្រាអែលបានកោះប្រជុំបន្ទាន់នូវមន្រ្តីប៉ូលិស និងយោធា ដើម្បីជជែកអំពីវិធានការតបតទៅនឹងការវាយប្រហារនេះ។ វិធានការតបត ដែលលោកនេតាន់យ៉ាហ៊ីបានប្រកាសថានឹងធ្វើឡើងយ៉ាងចាស់ដៃបំផុត។
គួរបញ្ជាក់ថា នៅក្នុងជម្លោះរវាងអ៊ីស្រាអែល និងប៉ាឡេស្ទីន ការវាយប្រហារទៅលើវិហារសាសនា គឺជារឿងមួយដ៏កម្រ ហើយការវាយប្រហារនៅថ្ងៃអង្គារនេះបានកើតឡើង នៅក្នុងពេលដែលភាពតានតឹង នៅហ្ស៊េរុយសាឡិមបានកើនឡើងខ្លាំងដល់កម្រិតកំពូល បង្កជាអំពើហិង្សាជាប់ជាប្រចាំ អស់រយៈពេលជាច្រើនសប្តាហ៍មកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ