ក្រុមហ៊ុនខ្មែរចំនួន៣ទទួលបានពានរង្វាន់សហគ្រាសឆ្នើមអាស៊ាន
ក្រុមហ៊ុនខ្មែរចំនួន ៣ទទួលបានពានរង្វាន់សហគ្រាសឆ្នើមអាស៊ានឆ្នាំ២០១២ ក្នុងនោះមាន ធនាគារអេស៊ីលីដា ក្រុមហ៊ុន Agro-tec និងក្រុមហ៊ុនកសិកម្មខ្មែរមួយផ្សេងទៀត។ គឺជាលើកទីមួយហើយដែលក្រុមហ៊ុនខ្នាតតូច និងធំរបស់ខ្មែរទទួលបានពានរង្វាន់លំដាប់ថ្នាក់តំបន់។
ចុះផ្សាយនៅថ្ងៃ៖
ស្តាប់ - ០២:១៥
ក្រុមហ៊ុនចំនួន២៦មកពីប្រទេសចំនួន១០នៃសមាគមអាស៊ានទទួលបានពានរង្វាន់សហគ្រាសឆ្នើមអាស៊ានឆ្នាំ២០១២។ នេះគឺជាការប្រកាសជាផ្លូវការកាលពីយប់ម្សិលមិញរបស់ក្រុមប្រឹក្សាពិគ្រោះយោបល់ពាណិជ្ជកម្មអាស៊ាននៅក្នុងទីក្រុងភ្នំពេញ។ ក្នុងចំណោមក្រុមហ៊ុនឆ្នើមរបស់អាស៊ានទាំង២៦ដែលជ្រើសរើសចេញពីក្រុមហ៊ុនជាង១៦០របស់អាស៊ាន ក៏មានក្រុមហ៊ុនខ្មែរចំនួន៣ផងដែរ ក្នុងនោះមាន៖ធនាគារអេស៊ីលីដា ក្រុមហ៊ុន Agro-tec និងក្រុមហ៊ុនកសិកម្មមួយផ្សេងទៀត។ នេះគឺជាលើកទីមួយហើយ
ដែលក្រុមហ៊ុនខ្មែរទទួលបានពានរង្វាន់លំដាប់ថ្នាក់តំបន់យ៉ាងដូច្នេះ។
នាពេលកន្លងមក ក្រុមហ៊ុននៅក្នុងប្រទេសកម្ពុជាត្រូវបានគេស្តីបន្ទោសថា ភាគច្រើនជាក្រុមហ៊ុនដឹកនាំរបៀបគ្រួសារនិយមគ្មានគណនេយ្យត្រឹមត្រូវ ប៉ុន្តែសម្រាប់ពេលនេះ ក្រុមហ៊ុនរបស់ខ្មែរមួយចំនួនចាប់ផ្តើមកែប្រែអោយក្លាយទៅជាក្រុមហ៊ុនពហុភាគហ៊ុនជាបណ្តើរៗហើយ។ ដើម្បីទទួលបានពានរង្វាន់ឆ្នើមអាស៊ានឆ្នាំ២០១២នេះ ក្រុមហ៊ុនទាំង២៦ត្រូវគោរពលក្ខណៈវិនិច្ឆ័យលម្អិតមួយចំនួនរបស់ខ្លួន ដូចជាការរីកធំធាត់លឿនរហ័ស បង្កើតការងារបានច្រើន មានគំនិតច្នៃប្រឌិត និងការទទួលខុសត្រូវផ្នែកសង្គម។ល។ និយាយជារួមមានន័យថា ក្រុមហ៊ុនទាំងនោះបានចូលរួមធ្វើអោយតំបន់អាស៊ានទាំងមូលមានកំណើនសេដ្ឋកិច្ច និងមានវិបុលភាព។
លោក អ៊ិន ចាន់នី អគ្គនាយកប្រតិបត្តិនៃធនាគារអេស៊ីលីដាបាននិយាយនៅថ្ងៃអាទិត្យនេះក្រោយពីទទួលបានពានរង្វាន់សហគ្រាសឆ្នើមរបស់អាស៊ានថា លោកមានក្តីសប្បាយរីករាយយ៉ាងខ្លាំងចំពោះសមិទ្ធផលនេះ។ ធនាគារអេស៊ីលីដាមិនត្រឹមតែចូលរួមចំណែកអភិវឌ្ឍសេដ្ឋកិច្ចកម្ពុជាប៉ុណ្ណោះទេ។ ប៉ុន្តែធនាគារអេស៊ីលីដាបានចូលរួមចំណែកអភិវឌ្ឍសេដ្ឋកិច្ចអាស៊ានថែមទៀតផង។ អេស៊ីលីដាបច្ចុប្បន្នមានវត្តមាននៅក្នុងប្រទេសកម្ពុជា និងប្រទេសឡាវ។ ប៉ុន្តែនៅថ្ងៃអនាគត អេស៊ីលីដា មានគម្រោងពង្រីកទីផ្សាររបស់ខ្លួនទៅកាន់ប្រទេសចិន និងប្រទេសភូមាបន្ថែមទៀត។
សូមបញ្ជាក់ថា កាលពីថ្ងៃសៅរ៍ម្សិលមិញ លោកនាយករដ្ឋមន្រ្តី ហ៊ុន សែន ថ្លែងកោតសរសើរចំពោះក្រុមហ៊ុនទាំង២៦របស់អាស៊ានដែលទទួលបានពានរង្វាន់សហគ្រាសឆ្នើមអាស៊ានឆ្នាំ២០១២។ សម្រាប់ប្រមុខរាជរដ្ឋាភិបាលកម្ពុជា ក្រុមហ៊ុនឆ្នើមទាំងនេះបានចូលរួមចំណែកលើកស្ទួយសុខុមាលភាព និងជីវភាពរស់នៅរបស់ប្រជាជនអាស៊ានទាំងមូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ