ក្រុមប្រឹក្សាអាជ្ញាកណ្តាលទទួលសំណុំរឿងពាក់ព័ន្ធវិវាទការងារជាង១៥០០ករណី ក្នុងរយៈពេល១០ឆ្នាំ
ចាប់តាំងពីបង្កើតអស់រយៈពេល ១០ឆ្នាំ គិតចាប់ពីឆ្នាំ២០០៣ ក្រុមប្រឹក្សាអាជ្ញាកណ្តាលបានទទួលសំណុំរឿងវិវាទការងារចំនួនជាង ១.៥០០ ករណី មកពីវិស័យផ្សេងៗ រួមមាន វិស័យផលិត បដិសណ្ឋារកិច្ច និងវិវាទការងារពីអង្គការក្រៅរដ្ឋាភិបាល។ ប៉ុន្តែសំណុំរឿងភាគច្រើន មកពីវិស័យកាត់ដេរសំលៀកបំពាក់ ដែលតំណាងឲ្យ៩០ភាគរយនៃសំណុំរឿងទាំងអស់។ ក្នុងសំណុំរឿងពាក់ព័ន្ធនឹងវិវាទការងារទាំងនោះ ក្រុមប្រឹក្សាអាជ្ញាកណ្តាលដោះស្រាយបានជាង ១៤០០ ករណី។
ចុះផ្សាយនៅថ្ងៃ៖
ស្តាប់ - ០៣:០៨
ក្នុងរយៈពេល ១០ ឆ្នាំ ចាប់តាំងពីឆ្នាំ២០០៣ ក្រុមប្រឹក្សាអាជ្ញាកណ្តាលទទួលបានសំណុំរឿងជាង ១.៥០០ករណី។ ក្នុងនោះ ក្រុមប្រឹក្សាអាជ្ញាកណ្តាលដោះស្រាយបានជាង ១.៤០០ ករណី។ វិវាទការងារទាំងនោះទាក់ទងនឹងប្រាក់ឈ្នួល និងអត្ថប្រយោជន៍ ការសម្រាកលំហែមាតុភាព ការរើសអើងសហជីព និងការបញ្ឈប់កម្មករពីការងារផ្សេងៗ។
លោក សុខ ឡោ នាយកប្រតិបត្តិនៃមូលនិធិក្រុមប្រឹក្សាអាជ្ញាកណ្តាល បានថ្លែងក្នុងសន្និសីទកាសែត នាព្រឹកថ្ងៃទី១០ឧសភាថា ក្រុមប្រឹក្សាអាជ្ញាកណ្តាលត្រូវដោះស្រាយលើវិវាទការងារ ហើយចេញសេចក្តីសម្រេចត្រឹមតែ ១៥ ទៅ ៣០ ថ្ងៃប៉ុណ្ណោះ។ លោក សុខ ឡោ បានបន្តថា ជាទូទៅ សេចក្តីសម្រេចរបស់ក្រុមប្រឹក្សាអាជ្ញាកណ្តាលលើវិវាទការងារ មិនមែនជាសេចក្តីសម្រេចចងកាតព្វកិច្ចទេ។ ប៉ុន្តែនៅឆ្នាំ២០១០ និងឆ្នាំ២០១២ សហជីពតំណាងកម្មករ និងភាគីថៅកែរោងចក្រកាត់ដេរ បានចុះអនុស្សារណៈយោគយល់គ្នា ផ្តល់អំណាចបន្ថែមដល់ក្រុមប្រឹក្សាអាជ្ញាកណ្តាល ដើម្បីចេញសេចក្តីសម្រេចមានលក្ខណៈជាការចងកាតព្វកិច្ច និងជាស្ថាពរបិទផ្លូវតវ៉ា។ នោះគឺពាក់ព័ន្ធនឹងជម្លោះវិវាទសិទ្ធិការងារ និងមួយចំណុចទៀតបានកំណត់ថា កូដកម្មមិនត្រូវធ្វើមុននីតិវិធីដោះស្រាយ នៅក្រុមប្រឹក្សាអាជ្ញាកណ្តាលទេ។
ក៏ប៉ុន្តែលោក សុខ ឡោ បានបន្តថា ពាក់ព័ន្ធនឹងវិវាទការងារលើផ្នែកទាមទារប្រាក់អត្ថប្រយោជន៍ការងារ និងការទាមទារលើប្រាក់ឈ្នួល គឺសេចក្តីសម្រេចរបស់ក្រុមប្រឹក្សាអាជ្ញាកណ្តាល មិនមែនជាការចាប់បង្ខំឲ្យភាគីសហជីពតំណាងកម្មករ និងថៅកែរោងចក្រ គោរពតាមនោះឡើយ។
លោក សុខ ឡោ បានបន្តថា នៅពេលទំហំនៃការនាំចេញផលិតផលសម្លៀកបំពាក់ និងផលិតស្បែកជើង បានកើនឡើងនៅកម្ពុជា ពេលនោះវិវាទការងារក៏បានកើនឡើងដែរ។ នោះគឺនៅឆ្នាំ២០១១ ការនាំចេញវិស័យកាត់ដេរមាន ៤,០៤ ពាន់លានដុល្លារ និងមានវិវាទការងារ ១៩១ករណី។ នៅឆ្នាំ២០១២ ការនាំចេញវិស័យកាត់ដេរកើនដល់ ៤,៤៤ ពាន់លានដុល្លារ ហើយវិវាទការងារឡើងដល់ ២៥៥ករណី។
តាមក្រុមប្រឹក្សាអាជ្ញាកណ្តាល ឧស្សាហកម្មកាត់ដេរសំលៀកបំពាក់នៅកម្ពុជាពេលនេះ មានកម្មករជាងកន្លះលាននាក់ ដែលភាគច្រើនជាស្ត្រីមានជីវភាពក្រីក្រនៅតាមទីជនបទ ដែលជាអ្នកមានសមាជិកច្រើន។ ចាប់តាំងពីឆ្នាំ២០០៣ តម្លៃនៃការនាំចេញសំលៀកបំពាក់និងវាយនភ័ណ្ឌ សរុបចំនួន ១,៦ ពាន់លានដុល្លារអាមេរិក។ មកត្រឹមឆ្នាំ២០១២ តម្លៃនេះ បានកើនឡើងដល់ចំនួន ៤,៤ ពាន់លានដុល្លារអាមេរិក។
ខួបគម្រប់១០ ឆ្នាំនៃការបង្កើតក្រុមប្រឹក្សាអាជ្ញាកណ្តាលនឹងធ្វើឡើងនៅថ្ងៃទី២១ឧសភា ដោយមានការចូលរួមពីរដ្ឋមន្ត្រីការងារ តំណាងថៅកែរោងចក្រកាត់ដេរ និងសហជីពតំណាងកម្មករ។ សកម្មភាព និងដំណោះស្រាយវិវាទការងាររយៈពេល ១០ ឆ្នាំ របស់ក្រុមប្រឹក្សាអាជ្ញាកណ្តាល ក៏នឹងត្រូវលើកបង្ហាញផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ