បារាំងឈានទៅទប់ស្កាត់មេរោគអេបូឡាតាមផ្លូវទឹក
ឆ្លៀតក្នុងឱកាសជំនួបកំពូលរបស់សហភាពអឺរ៉ុប ស្តីពីការរីករាលដាលនៃមេរោគអេបូឡា លោកប្រធានាធីបតីបារាំងបានប្រកាសថា បារាំងនឹងដាក់វិធានការបន្ថែមដើម្បីទប់ស្កាត់ការឆ្លងមេរោគអេបូឡា តាមរយៈអ្នកដំណើរដែលចូលមកបារាំងតាមផ្លូវទឹក។ វិធានការនេះ វានឹងបន្ថែមពីលើវិធានការដែលបានដាក់ចេញ ទៅតាមច្រកព្រលានយន្តហោះធំៗរបស់បារំាំង ដែលមានអ្នកដំណើរមកពីប្រទេសតំបន់អាហ្រ្វិក ដែលកំពុងតែមានជំងឺនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
លោកប្រធានាធិបតីបារាំងបានថ្លែងថា បារាំងនឹងបន្ថែមការត្រួតពិនិត្យលើ អ្នកដំណើរតាមផ្លូវទឹក ដែលចូលមកប្រទេសបារាំង ពីបណ្តាប្រទេសមួយចំនួននៅអាហ្វ្រិក ដែលកំពុងតែមានជំងឺអេបូឡា។ លោកបន្ថែមថា ការនេះមិនមែនមានន័យថា បារាំងធ្វើឲ្យភ័យជ្រួលច្របល់ខ្លាចមេរោគនេះទេ ប៉ុន្តែវាមានន័យថា យើងមិនត្រូវឈរអោបដៃ មិនព្រមចាត់វិធានការទប់ស្កាត់ឡើយ។ បើយោងតាមប្រសាសន៍របស់លោក ប្រធានាធិបតីបារាំង បារាំងនឹងបន្ត ធ្វើការត្រួតពិនិត្យ គ្រប់មធ្យោបាយធ្វើដំណើរទាំងអស់។
លោកស្រី ម៉ារីសុល ទូរ៉ែន រដ្ឋមន្ត្រីក្រសួងសុខាភិបាលបារាំង បានមានប្រសាសន៍បន្ថែមថា វិធានការថ្មីនេះ តំរូវឲ្យអ្នកធ្វើដំណើរតាមកប៉ាល់ ក៏ដូចជាបុគ្គលិកធ្វើការលើកប៉ាល់ទាំងអស់ ដែលបានចេញដំណើរពីប្រទេសបី នៅអាហ្រ្វិក គឺ ហ្គីណេ សេរ៉ាឡេអូន និងលីបេរីយ៉ា ក្នុងរយៈពេល៣អាទិត្យ ត្រូវធ្វើតេស្ត៍ពិនិត្យសីតុណ្ហភាពក្នុងខ្លួន មុននឹងត្រូវអនុញ្ញាតឲ្យឡើងគោក ចូលប្រទេសបារាំង។
សូមរំលឹកថា កាលពីថ្ងៃទី១៨ តុលា បារាំងបានចាប់ផ្តើម រាយកម្លាំងពិសេស ដើម្បីត្រួតពិនិត្យ តាមព្រលានយន្តហោះនៅក្នុងក្រុងប៉ារីស។ អ្នកដំណើរដែលចេញមកពី ប្រទេសទាំងបីខាងលើ នឹងត្រូវឆ្លងកាត់ម៉ាស៊ីនស្ទង់កំដៅក្នុងខ្លួន។ ទន្ទឹមនឹងការទប់ស្កាត់មិនឲ្យអ្នកជំងឺអេបូឡា របូតចូលទៅឆ្លងមនុស្សផ្សេងទៀតនៅក្នុងប្រទេសបារាំង បារាំងក៏បានចូលរួមយ៉ាងសកម្មដើម្បីព្យាបាលអ្នកជំងឺអេបូឡានៅក្នុងប្រទេសហ្គីណេ។ យ៉ាងណាមិញ បារាំង នឹងបើកបន្ថែមមណ្ឌលសុខភាពទីបីមួយទៀត នៅប្រទេសហ្គីណេ និងមណ្ឌលមួយទៀតដែលពិសេសសម្រាប់ទទួលព្យាបាលតែបុគ្គលិកពេទ្យ ដែលអានអាការៈឆ្លងមេរោគអេបូឡា។
សូមបញ្ជាក់ផងដែរថា នៅថ្ងែសុក្រ ម្សិលមិញនេះ មានករណី អ្នកជំងឺម្នាក់នៅក្រុងញូយ៉ក ដែលបានឆ្លងមេរោគអេបូឡា ក្នុងពេលដែលគាត់បានទៅបំពេញការងារជាមួយក្រុមគ្រូពេទ្យគ្មានព្រំដែននៅប្រទេសហ្គីណេ។ បន្ថែមពីនេះ នៅប្រទេសម៉ាលីក៏ចាប់ផ្តើមមានអ្នកជំងឺអេបូឡាម្នាក់ផងដែរ។ រហូតមកដល់ពេលនេះ មានអ្នកឆ្លងមេរោគអេបូឡាសរុបទាំងអស់ ១ម៉ឺនករណី ហើយចំនួនអ្នកស្លាប់បានកើនឡើងដល់ ៤៩០០នាក់ហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ