រដ្ឋាភិបាលតួកគីចង់រឹតបន្តឹងច្បាប់ ដើម្បីបង្ក្រាបការតវ៉ារបស់ជនជាតិគួដ
មិនដល់ពេលមួយសប្តាហ៍ បន្ទាប់ពីមានបាតុកម្មហិង្សា បង្កឡើងដោយក្រុមជនជាតិគួដផង រដ្ឋាភិបាលប្រទេសតួកគី បានប្រកាសឲ្យដឹងថា ខ្លួននឹងធ្វើសេចក្តីព្រៀងច្បាប់ថ្មីមួយ ដើម្បីរឹតបន្តឹង និងបង្ក្រាបរាល់អំពើហិង្សា ទាំងឡាយណា ដែលប្រឆាំងនិងនយោបាយរបស់រដ្ឋាភិបាល។ លោកប្រធានាធិបតីតួកគីបានបន្ថែមថា ក្នុងនាមជាប្រទេសមានច្បាប់ រដ្ឋាភិបាល មិនអាចអនុញ្ញាតឲ្យក្រុមអ្នកលេង ធ្វើអ្វីតាមតែចិត្តបានឡើយ។
ចុះផ្សាយនៅថ្ងៃ៖
ស្តាប់ - ០១:៤៨
លោកប្រធានាធិបតីតួកគី Recep Tayyip Erdogan បានថ្លែងឲ្យដឹងនៅថ្ងៃអាទិត្យ ទី១២ តុលាថា រដ្ឋាភិបាលលោក និងដាក់ស្នើសេចក្តីព្រៀងច្បាប់ថ្មីមួយ ទៅរដ្ឋសភា។ ច្បាប់ថ្មីនេះ មានគោលដៅ រឹតបន្តឹងការជួបជុំគ្នា និងដើម្បីបង្ក្រាបរាល់ការប្រមូលផ្តុំ ដែលមានលក្ខណៈហិង្សា។ ប្រតិកម្មរបស់រដ្ឋាភិបាលតួកគីនៅពេលនេះ គឺឆ្លើយតបទៅនឹងបាតុកម្មហិង្សា ដែលបានកើតមានឡើងប៉ុន្មានថ្ងៃមុននេះ។
សូមរំលឹកថា បាតុកម្មដែលដើមឡើយ ធ្វើឡើងដោយក្រុមជនជាតិគួដរស់នៅក្នុងប្រទេសតួកគី ភាគខាងកើត។ ពួកគេ មានការខឹងសម្បារទៅលើរដ្ឋាភិបាលតួកគី ថាបានឈរឱបដៃមើល មិនជួយរំដោះក្រុងកូបាណេ ទុកឲ្យពួកជីហាតអ៊ីស្លាម វាយដណ្តើមបាន ហើយធ្វើបាបជនជាតិគួដដែលរស់នៅតំបន់នោះ។ បាតុកម្មបានក្លាយទៅជាអំពើហិង្សា ដោយមានការប្រឈមមុខជាមួយនគរបាល ដែលទីបំផុត មានមនុស្ស ៣៤នាក់បានស្លាប់ ហើយ៣៥០នាក់រងរបួស។
ក្រោយហេតុការណ៍នេះ លោកប្រធានាធិបតីតួកគី បានអំពាវនាវឲ្យអាណាព្យាបាលរបស់ក្មេងៗស្ទាវៗ ត្រូវតែចេះហាមឃាត់កូនចៅ មិនឲ្យមកធ្វើបាតុកម្មហិង្សា។ លោកបន្តថា ក្នុងនាមតួកគីជាប្រទេសមានច្បាប់ លោកនឹងចាត់វិធានការផ្លូវច្បាប់ ដើម្បីចាប់ក្រុមជនពាលដែលបានបង្កអំពើហិង្សា មកទទួលទោសតាមច្បាប់។ ពាក្យថាក្រុមជនពាល លោកប្រធានាធិបតី បានសំដៅទៅដល់ជនជាតិគួដនៅតួកគី និងគណៈបក្សនយោបាយពីរដែលមាននិន្នាការ ការពារជនជាតិគួដ ហើយដែលរដ្ឋាភិបាលចាត់ទុកថា ជាមេញុះញង់ ឲ្យមានការប្រមូលផ្តុំគ្នាធ្វើបាតុកម្មហិង្សា។
ទោះបីជាយ៉ាងណា គ្រប់គ្នាបានដឹងយ៉ាងច្បាស់ អំពីគោលជំហររបស់រដ្ឋាភិបាលលោក ប្រធានាធិបតីតួកគីបច្ចុប្បន្ន ដែលមាននិន្នាការអភិរក្ស ប្រកាន់សាសនាអ៊ីស្លាម។ កន្លងមក មានភស្តុតាងជាច្រើន បានបង្ហាញឲ្យដឹងថា រដ្ឋាភិបាលតួកគី បានបើកផ្លូវឲ្យពួកអ៊ីស្លាមជីហាតចេញចូល ឆ្លងកាត់ប្រទេសខ្លួនដោយសេរី។ នរណាក៏ដឹងដែរ ថាតួកគី មិនចង់ឃើញ ពួកជនជាតិគួក មានកម្លាំងគ្រប់គ្រាន់ក្នុងការបង្កើតរដ្ឋឯករាជ្យនោះឡើយ ព្រោះថាបើដូច្នេះ តួកគីអាចនឹងបាត់បង់ទឹកដី ភាគខាងកើត ដោយសាពួកជនជាតិគួដនៅតំបន់នោះរើបំរាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ