ភាពចំរូងចំរាស់ជុំវិញការបង្កើតតំបន់ការពារពិសេសនៅភាគខាងជើងស៊ីរី
ប្រទេសតួកគីបានធ្វើការស្នើសុំទៅអង្គការអូតង់ ដើម្បីបង្កើតតំបន់ការពារពិសេសមួយ នៅភាគខាងជើងប្រទេសស៊ីរី តាមបណ្តោយព្រំដែនជាមួយទួរគី។ ទំបន់នោះនឹងជាតំបន់សុវត្ថិភាពពិសេស ហាមមិនឲ្យមានអន្តរាគមន៍យោធា និងមិនឲ្យមានយន្តហោះហោះកាត់ ដើម្បីទទួលការពារជនភៀសខ្លួនស៊ីវិល និងកងកម្លាំងប្រយុទ្ធប្រឆាំងនឹងរបបរបស់លោក បាឆា អាល់ អាសាដ។ ប៉ុន្តែអង្គការអូតង់ និងសហរដ្ឋអាមេរិក ហាក់រារែកមិនចង់ពិភាក្សាអំពីបញ្ហានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
លោកប្រធានាធិបតី តួកគី បានស្នើសុំទៅអង្គការអូតង់ ឲ្យរៀបចំបង្កើតតំបន់ការពារពិសេសមួយ នៅភាគខាងជើងស៊ីរី ជាប់បណ្តោយព្រំដែនទួរគី ដើម្បីការពារប្រជាជនដែលភៀសខ្លួនពីការវាយប្រហារ របស់ពួកអ៊ីស្លាមជីហាត។ មួយវិញទៀត តួកគីថា ការបង្កើតតំបន់នេះ នឹងអនុញ្ញាតឲ្យមានការការពារ ដល់តំបន់ដែលគ្រប់គ្រងដោយកងកម្លាំងឧទ្ទាម ដែលប្រឆាំងនឹងរបបផ្តាច់ការស៊ីរីរបស់លោក បាឆា អាល់ អាសាដ។
ភ្លាមៗក្រោយការប្រកាសរបស់តួកគី លោកប្រធានាធិបតីបារាំង បានប្រកាសគាំទ្រគម្រោងនេះ ដោយចាត់ទុកថា នេះជាឱកាសដ៏ល្អ ក្នុងការការពារអាយុជីវិតប្រជាជនស្លូតត្រង់ ឲ្យផុតពីការសម្លាប់រង្គាល។ ទោះបីជាយ៉ាងណា អ្នកនាំពាក្យអង្គការអូតង់បានថ្លែងឲ្យដឹងថា អង្គការអូតង់ នៅមិនទាន់លើកបញ្ហានេះមកពិភាក្សានៅឡើយទេ។ ទន្ទឹមនឹងនេះដែរ សហរដ្ឋអាមេរិក មានបង្ហើបឲ្យដឹងអំពីការជំទាស់របស់ខ្លួន ក្នុងការបង្កើតតំបន់ការពារពិសេសដែលតួកគីស្នើសុំ។
លោកចនឃែរី បាននិយាយថា ការបង្កើតតំបន់នេះ អាចនឹងជួបឧបសគ្គមួយចំនួន។ ទីមួយ ការបង្កើតតំបន់ពិសេសប្រភេទនេះ មានន័យថា គឺហាមមិនឲ្យយន្តហោះចម្បាំងហោះកាត់។ ដូច្នេះ វានឹងបង្កការលំបាកដល់យុទ្ធនាការទ័ពអាកាសរបស់អាមេរិក ដែលត្រូវហោះកាត់តំបន់នេះ ព្រមទាំងត្រូវបង្វែរប្រព័ន្ធរ៉ាដាទាំងអស់ គេចចេញពីតំបន់នេះ។ ធ្វើដូចនេះ អាចនឹងធ្វើឲ្យការវាយប្រហារទៅលើទីតាំងពួកជីហាត ជួបបរាជ័យ។ ទីពីរ តំបន់ពិសេសនេះ នឹងរាំងស្ទះ មិនឲ្យទាហានជើងគោកឆ្លងកាត់ទៅស៊ីរី បើសិនជាប្រទេសសម្ព័ន្ធមិត្តសម្រេចបញ្ជូនទ័ពជើងគោកទៅវាយពួកជីហាត។ ហើយទីបីគឺថា ការបង្កើតតំបន់ការពារពិសេសនេះ ត្រូវការការសម្រេចចិត្ត ពីក្រុមប្រឹក្សាសន្តិសុខរបស់អង្គការសហប្រជាជាតិ។ អាមេរិកយល់ថា រុស្ស៊ីប្រាកដជាបោះឆ្នោតជំទាស់ ដើម្បីជួយការពាររបបផ្តាច់ការរបស់លោក បាឆា អាល់ អាសាដ ព្រោះថា បើតំបន់នេះត្រូវបានបង្កើត វានឹងជួយការពារកងកម្លាំងឧទ្ទាម ដែលទាមទាររំលំរបបផ្តាច់ការ របស់លោក បាឆា អាល់ អាសាដ។
យ៉ាងណាមិញ មតិមួយចំនួន បានរិះគន់តួកគីថា មាននយោបាយអាត្មានិយម។ កន្លងមកតួកគី ឈរឱបដៃមើលទីក្រុងកូបាណេ ធ្លាក់ចូលក្នុងកណ្តាប់ដៃរបស់ពួកជីហាត។ មូលហេតុដោយសារតំបន់នេះ សម្បូរទៅដោយជនជាតិគួដ។ បើសិនតួកគី ទៅជួយប្រយុទ្ធការពារតំបន់នេះមិនឲ្យធា្លក់ទៅក្នុងកណ្តាប់ដៃពួកជីហាត ហាក់ដូចជាតួកគីជួយពួកជនជាតិគួដឲ្យបង្កើតតំបន់ស្វ័យត្នពិសេសនៅក្បែរព្រំដែន ហើយទៅថ្ងៃមុខ ពួកគួដទាំងនៅស៊ីរី និងនៅតួកគី នឹងទៀមទារឯករាជ្យជាក់ជាមិនខាន។ តែដល់ឥឡូវ ធ្វើជាចេញមុខចេញមាត់ មកចង់បង្កើតតំបន់ការពារពិសេស ប៉ុន្តែធាតុពិត តួកគី ចង់ក្តោបក្តាប់តំបន់នេះ ដែលសំបូរទៅដោយជនជាតិគួដ។ ធ្វើដូច្នេះ ជនជាតិគួដ លែងមានឱកាសនឹងបង្កើតតំបន់ស្វ័យត្នទៅថ្ងៃមុខទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ