ចិន -

អត្ថបទចុះផ្សាយនៅថ្ងៃ ចន្ទ 05 កញ្ញា 2011 - ព័ត៌មានទើបកែប្រើលើកចុងក្រោយ ថ្ងៃ ចន្ទ 05 កញ្ញា 2011

នាយកធនាគារពិភពលោក៖ ចិនត្រូវតែបង្កើនតម្រូវការទីផ្សារក្នុងស្រុកជាជាងពឹងលើតែការនាំចេញ

អគ្គនាយកធនាគារពិភពលោកជួបជាមួយអនុប្រធានាធិបតីចិន នៅប៉េកាំង ថ្ងៃទី៥ កញ្ញា ២០១១

REUTERS/China Daily

ដោយ សេង ឌីណា

នៅថ្ងៃចន្ទ ៥ កញ្ញា ២០១១ លោករ៉ូបឺត ហ្សេលិក (Robert Zoellick) អគ្គនាយកធនាគារពិភពលោក បានជំរុញឲ្យចិនផ្លាស់ប្តូរយុទ្ធសាស្រ្តកំណើនសេដ្ឋកិច្ច ដោយឈប់ពឹងផ្អែកតែទៅលើការនាំចេញ ហើយងាកមកបង្កើនតម្រូវការទីផ្សារក្នុងស្រុកវិញ។ ក៏ប៉ុន្តែ លោកហ្សេលិកក៏បានទទួលស្គាល់ដែរថា បញ្ហា ដែលចិនត្រូវប្រឈមមុខខ្លាំងជាងគេនៅពេលនេះ គឺកំណើនអត្រាអតិផរណា។

បទវិភាគរបស់ សេង ឌីណា

ស្តាប់ (04:39)

05/09/2011

អគ្គនាយកធនាគារពិភពលោកកំពុងស្ថិតនៅក្នុងទីក្រុងប៉េកាំង ដើម្បីដឹកនាំការសិក្សាមួយ ស្តីពីយុទ្ធសាស្រ្តសេដ្ឋកិច្ចរបស់ចិន។ លោកហ្សេលិកបានមានប្រសាសន៍ថា នៅក្នុងរយៈពេល ១០ឆ្នាំទៀត យុទ្ធសាស្រ្តកំណើនសេដ្ឋកិច្ចចិន ដែលបច្ចុប្បន្នពឹងផ្អែកខ្លាំងទៅលើការនាំចេញនឹងលែងមានប្រសិទ្ធិភាពទៀតហើយ។ ចិនប្រាកដជាត្រូវបង្កើនតម្រូវការទីផ្សារក្នុងស្រុក ដើម្បីជំរុញកំណើនសេដ្ឋកិច្ច។

ចាប់ពីឆ្នាំ២០០៨ រហូតមកទល់ពេលបច្ចុប្បន្ននេះ សេដ្ឋកិច្ចរបស់សហរដ្ឋអាមេរិក និងអឺរ៉ុប ដែលជាទីផ្សារដ៏ចម្បង សម្រាប់ការនាំចេញទំនិញចិន កំពុងតែស្ថិតក្នុងវិបត្តិធ្ងន់ធ្ងរ។ ក្រៅពីគ្មានកំណើនសេដ្ឋកិច្ច ប្រទេសទាំងនេះក៏កំពុងតែជំពាក់បំណុលគេវ័ណ្ឌ ក ហើយរដ្ឋាភិបាលនីមួយៗសុទ្ធតែនាំគ្នាកាត់បន្ថយការចំណាយ។

ក្នុងពេលបំពេញទស្សនកិច្ចនៅចិន កាលពីខែសីហា កន្លងទៅថ្មីៗនេះ លោកចូ បាយដិន (Joe Biden) អនុប្រធានាធិបតីអាមេរិក ក៏បានប្រាប់មេដឹកនាំចិនដែរថា ចិនលែងអាចពឹងលើទីផ្សារអាមេរិក ដើម្បីនាំចេញបានទៀតហើយ។

ចិនគឺជាប្រទេសដែលមានប្រជាជនច្រើនជាងគេបំផុតនៅលើពិភពលោក (ជាង ១ពាន់ ៣រយលាននាក់ នៅឆ្នាំ២០១០)។ កាលពីខែកក្កដាកន្លងទៅនេះ ធនាគារពិភពលោកទើបនឹងបានបង្កើនចំណាត់ថ្នាក់ចិនទៅជាប្រទេសដែលប្រជាជនមានប្រាក់ចំណូលលើមធ្យម។ ដូច្នេះ ចិនគឺជាទីផ្សារដែលប្រកបដោយសក្តានុពលខ្ពស់ ដែលអាចស្រូបយកទំនិញរបស់ចិនផង និងទំនិញរបស់ប្រទេសជាដៃគូចិនផង។

ក៏ប៉ុន្តែ បញ្ហាធំបំផុត ដែលចិនកំពុងតែប្រឈមមុខនៅពេលបច្ចុប្បន្ននេះ គឺកំណើននៃអត្រាអតិផរណា។ ការបង្កើនតម្រូវការទីផ្សារក្នុងស្រុកអាចនឹងធ្វើឲ្យអតិផរណាកាន់តែកើនឡើងខ្ពស់ថែមទៀត។ រហូតមកទល់ពេលនេះ រដ្ឋាភិបាលចិនបានផ្តោតជាសំខាន់ទៅលើការចាត់វិធានការ ដើម្បីទប់ស្កាត់អតិផរណា តាមរយៈការបង្កើនអត្រាការប្រាក់ និងការកម្រិតចរន្តឥណទាននៃធនាគារឯកជន។

ដើម្បីផ្លាស់ប្តូរយុទ្ធសាស្រ្តទៅបង្កើនតម្រូវការទីផ្សារក្នុងស្រុក ដើម្បីជំរុញកំណើនសេដ្ឋកិច្ច ចិនប្រាកដជាត្រូវធ្វើកំណែទម្រង់ទៅលើរចនាសម្ព័ន្ធផលិតកម្មបច្ចុប្បន្ន។ សព្វថ្ងៃនេះ កំណើនសេដ្ឋកិច្ចចិនពឹងផ្អែកលើការនាំចេញ ដូច្នេះ ទំនិញដែលផលិតនៅចិន គឺផលិតតម្រូវទៅនឹងទីផ្សារក្រៅប្រទេស។ ហេតុដូច្នេះ ដើម្បីបង្វែរពីទីផ្សារបរទេស មកទីផ្សារក្នុងស្រុក រចនាសម្ព័ន្ធផលិតកម្មចាំបាច់ត្រូវតែសម្របទៅនឹងតម្រូវការក្នុងស្រុក៕