តើហេតុអ្វីបានជាអាហ្សង់ទីនត្រូវប្រឈមមុខនឹងការក្ស័យធនជាលើកទីពីរនៅពេលនេះ?
ចុះផ្សាយនៅថ្ងៃ៖
ស្តាប់ - ០៥:៥២
អាហ្សង់ទីននៅសល់ពេលតែប៉ុន្មានម៉ោងទៀតប៉ុណ្ណោះ ដើម្បីចរចាជាមួយម្ចាស់បំណុលរកដំណោះស្រាយឲ្យបានមុនពាក់កណ្តាលអធ្រាតថ្ងៃទី៣០កក្កដានេះ បើមិនដូច្នោះទេ អាហ្សង់ទីននឹងត្រូវក្ស័យធនជាលើកទី២ បន្ទាប់ពីការក្ស័យធនលើកទី១ កាលពីឆ្នាំ២០០១។
សំណួរ-តើមានដំណើរដើមហេតុអ្វីដែលជំរុញឲ្យអាហ្សង់ទីនត្រូវធ្លាក់ដល់ដំណាក់កាលស្ទើរក្ស័យធនសាជាថ្មីនៅពេលនេះ?
វិបត្តិដែលអាហ្សង់ទីនកំពុងជួបប្រទះនៅពេលនេះ គឺជាប់ទាក់ទងទៅនឹងវិបត្តិចាស់ កាលពីពេលក្ស័យធនលើកទី១ នៅឆ្នាំ២០០១។
គួរបញ្ជាក់ថា ករណីរដ្ឋក្ស័យធនមិនមែនដូចករណីក្ស័យធនរបស់ក្រុមហ៊ុនទេ។ ក្រុមហ៊ុននៅពេលក្ស័យធន អាចត្រូវបិទទ្វារឈប់រកស៊ី ក្រុមហ៊ុនត្រូវរំលាយចោល ហើយទ្រព្យសម្បត្តិរបស់ក្រុមហ៊ុនអាចនឹងត្រូវតុលាការប្រកាសលក់ឡាយឡុង ដើម្បីយកលុយមកសងបំណុល។ ចំពោះករណីរដ្ឋក្ស័យធនវិញ គេមិនអាចរំលាយរដ្ឋចោល ដើម្បីយកទ្រព្យមកលក់ឡាយឡុងសងបំណុលបានទេ។ នៅពេលណាដែលរដ្ឋក្ស័យធន ដំណោះស្រាយដែលគេតែងតែអនុវត្តជាលក្ខណៈទូទៅ នៅទូទាំងពិភពលោក គឺចរចាជាមួយម្ចាស់បំណុល ដើម្បីកាត់បន្ថយបំណុលមួយផ្នែក និងពន្យារពេលសងបំណុលដែលនៅសល់។ នេះជាអ្វីដែលអាហ្សង់ទីនបានធ្វើ នៅពេលក្ស័យធន កាលពីឆ្នាំ២០០១ ដោយម្ចាស់បំណុលបានសុខចិត្តកាត់បន្ថយបំណុលរហូតដល់ទៅជាង ៧០% ហើយបំណុលដែលនៅសល់ជិត ៣០% ទៀតត្រូវពន្យារពេលសងរហូតមកទល់នឹងពេលបច្ចុប្បន្ននេះ។
ក៏ប៉ុន្តែ នៅក្នុងពេលក្ស័យធន កាលពីឆ្នាំ២០០១នោះ មិនមែនម្ចាស់បំណុលទាំងអស់របស់អាហ្សង់ទីនសុខចិត្តកាត់បន្ថយបំណុលនោះទេ។ មានម្ចាស់បំណុលមួយផ្នែកតូច (តិចជាង ១០%) បានបដិសេធមិនកាត់បន្ថយបំណុល ហើយក្នុងចំណោមនោះ មានមូលនិធិវិនិយោគ ២របស់អាមេរិក បានប្តឹងផ្តល់ទៅតុលាការក្រុងញូវយ៉ក ដើម្បីទាមទារឲ្យអាហ្សង់ទីនសងបំណុលទាំងអស់។
តុលាការអាមេរិកក៏បានកាត់ឲ្យមូលនិធិវិនិយោគទាំង ២នេះឈ្នះ ហើយបញ្ជាឲ្យអាហ្សង់ទីនសងបំណុលទាំងអស់ដែលជំពាក់ដើមបណ្តឹងនេះ ទាំងការ ទាំងដើម មានចំនួនជាង ១ពាន់ ៣រយលានដុល្លារអាមេរិក។
សំណួរ-តើតុលាការអាមេរិកមានសិទ្ធិអំណាចអ្វីមកបញ្ជាអាហ្សង់ទីន ដែលជារដ្ឋអធិបតេយ្យបែបនេះ?
អាហ្សង់ទីន ដែលជារដ្ឋអធិបតេយ្យ មិនមានកាតព្វកិច្ចត្រូវតែធ្វើតាមតាមសេចក្តីសម្រេចរបស់តុលាការអាមេរិកនេះទេ។ ក៏ប៉ុន្តែ បញ្ហាចោទ គឺនៅត្រង់ថា នៅក្នុងសេចក្តីសម្រេចនេះ តុលាការក្រុងញូវយ៉កបានដាក់លក្ខខណ្ឌមួយថា បើអាហ្សង់ទីនមិនសងបំណុលមូលនិធិវិនិយោគរបស់អាមេរិក ដែលជាដើមបណ្តឹងក្នុងរឿងនេះទេ អាហ្សង់ទីនមិនអាចប្រើប្រព័ន្ធហិរញ្ញវត្ថុ និងប្រព័ន្ធធនាគារអាមេរិក ដើម្បីសងបំណុលម្ចាស់បំណុលផ្សេងទៀតបានទេ ពោលគឺ ម្ចាស់បំណុលដែលសុខចិត្តកាត់បន្ថយបំណុលជាង ៧០% ហើយដែលនៅសល់ជិត ៣០% ទៀត ដែលអាហ្សង់ទីនដល់កំណត់ត្រូវសងយ៉ាងយូរបំផុត នៅត្រឹមថ្ងៃទី៣០កក្កដានេះ។
សំណួរ-បំណុលដែលតុលាការអាមេរិកបញ្ជាឲ្យអាហ្សង់ទីនសងទៅមូលនិធិវិនិយោគអាមេរិកមានតែជាង ១ពាន់ ៣រយលានដុល្លារប៉ុណ្ណោះ។ តើអាហ្សង់ទីនពិតជាមិនមានលុយសងមែន ឬក៏មិនចង់សង?
នៅក្នុងពេលបច្ចុប្បន្ននេះ អាហ្សង់ទីនមានលុយបម្រុង ប្រហែលជា ២៨ពាន់លានដុល្លារអាមេរិក។ ដូច្នេះ ត្រឹមលុយ ១ពាន់ ៣រយលានដុល្លារ អាហ្សង់ទីនមិនមែនថាមិនមានលទ្ធភាពសងទេ។ ក៏ប៉ុន្តែ បញ្ហាចោទ គឺនៅត្រង់ថា បើសិនជាអាហ្សង់ទីនសុខចិត្តសងបំណុលទាំងអស់ទៅឲ្យមូលនិធិវិនិយោគអាមេរិកទាំង ២នេះ ម្ចាស់បំណុលផ្សេងទៀត ដែលកាលពីពេលក្ស័យធនឆ្នាំ២០០១ មិនព្រមទទួលដំណោះស្រាយកាត់បន្ថយបំណុល ក៏អាចនឹងនាំគ្នាចេញមុខមកប្តឹងផ្តល់ទារសំណងទាំងអស់ដែរ។ កាន់តែគ្រោះថ្នាក់ជាងនេះទៅទៀត គឺសូម្បីតែម្ចាស់បំណុលដែលបានព្រមព្រៀងកាត់បន្ថយបំណុលរួចហើយក៏ដោយ ក៏អាចងាកមកទារបំណុលទាំងអស់វិញបានដែរ ពីព្រោះថា នៅក្នុងកិច្ចព្រមព្រៀងកាត់បន្ថយបំណុលនេះ គេបានដាក់ ខ មួយថា អាហ្សង់ទីនមិនអាចសងបំណុលទៅម្ចាស់បំណុលដែលមិនព្រមកាត់បន្ថយបំណុល ក្នុងលក្ខខណ្ឌហិរញ្ញវត្ថុមួយល្អជាង ម្ចាស់បំណុលដែលសុខចិត្តកាត់បន្ថយបំណុលបានទេ។ ដូច្នេះ បើសិនជាអាហ្សង់ទីនសងបំណុល ១០០% ទៅឲ្យមូលនិធិវិនិយោគអាមេរិក ដែលមិនព្រមកាត់បន្ថយបំណុល កិច្ចព្រមព្រៀងកាត់បន្ថយបំណុលដែលអាហ្សង់ទីនបានចុះជាមួយនឹងម្ចាស់បំណុលផ្សេងទៀតនឹងត្រូវលែងមានសុពលភាព ហើយម្ចាស់បំណុលទាំងអស់នោះអាចនឹងទាមទារឲ្យអាហ្សង់ទីនសងបំណុលទាំងអស់មកវិញ។ ក្នុងករណីនេះ អាហ្សង់ទីនប្រាកដជាមិនមានលទ្ធភាពសងទេ ពីព្រោះថា បំណុលទាំងអស់នេះ មានរហូតដល់ទៅជាង ១០០ពាន់លានដុល្លារអាមេរិក។
សំណួរ-តើវិបត្តិនៅអាហ្សង់ទីននេះ អាចនឹងបង្កផលវិបាកអ្វីខ្លះ?
វិបត្តិនេះអាចនឹងបង្កផលប៉ះពាល់ធ្ងន់ធ្ងរទៅដល់អាហ្សង់ទីនផ្ទាល់។ សេដ្ឋកិច្ចអាហ្សង់ទីនមិនទាន់ងើបចេញពីវិបត្តិចាស់ស្រួលបួលផង ហើយបច្ចុប្បន្នកំពុងប្រឈមមុខនឹងបញ្ហាអតិផរណាខ្ពស់ផង។ ដូច្នេះ វាអាចនឹងបង្កជាវិបត្តិសេដ្ឋកិច្ច និងវិបត្តិសង្គមកាន់តែធ្ងន់ធ្ងរទៅទៀត។
ក៏ប៉ុន្តែ ក្រៅពីការប៉ះពាល់ដល់សេដ្ឋកិច្ចអាហ្សង់ទីន អ្វីដែលតុលាការអាមេរិកបានសម្រេច ទៅលើករណីបំណុលអាហ្សង់ទីននេះ អាចនឹងធ្វើឲ្យប៉ះពាល់ទៅដល់ប្រព័ន្ធហិរញ្ញវត្ថុពិភពលោកទាំងមូល ជាពិសេស ប៉ះពាល់ទៅដល់ទម្លាប់ជាអន្តរជាតិ ដែលគេតែងតែអនុវត្ត ក្នុងករណីរដ្ឋក្ស័យធន។ បញ្ហាដែលអាចនឹងចោទឡើង គឺនៅត្រង់ថា ប្រសិនបើទៅថ្ងៃអនាគត ប្រទេសណាមួយត្រូវក្ស័យធន ដែលចាំបាច់ត្រូវចរចាជាមួយម្ចាស់បំណុល ដើម្បីរកដំណោះស្រាយ តើម្ចាស់បំណុលណាសុខចិត្តកាត់បន្ថយបំណុល ឬពន្យារពេលទទួលសំណង បើគេរំពឹងថា គេនៅតែអាចប្តឹងផ្តល់ទាមទារយកបំណុលទាំងអស់មកវិញ ដូចករណីអាហ្សង់ទីននេះ?
ដូច្នេះហើយបានជាលោកស្រី Christine Lagarde អគ្គនាយិកាមូលនិធិរូបិយវត្ថុអន្តរជាតិបានលើកឡើងថា ប្រសិនបើអាហ្សង់ទីនពិតជាត្រូវក្ស័យធនលើកនេះមែន គេចាំបាច់ត្រូវតែសើរើមើលឡើងវិញនូវយន្តការដោះស្រាយបញ្ហារដ្ឋក្ស័យធន ដែលគេតែងតែអនុវត្តពីពេលមុនៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ