វ៉ាស៊ីនតោនលែងបដិសេធពីលទ្ធភាពបំពាក់អាវុធដល់ពួកប្រឆាំងស៊ីរី
នៅថ្ងៃព្រហស្បតិ៍ទី២ឧសភាម្សិលមិញ លោក ប្រធានាធិបតី អាមេរិកបារ៉ាក អូបាម៉ា បានលើកឡើងអំពីលទ្ធភាពបំពាក់អាវុធដល់ពួកប្រឆាំងនឹងលោក ប្រធានាធិបតីស៊ីរី Bachar al-Assad។ គឺ ជាលើកទីមួយ ដែលទីក្រុងវ៉ាស៊ីនតោន បានថ្លែងយ៉ាងច្បាស់ទែង ពីវិធានការបែបនេះ។ ប៉ុន្តែ សហរដ្ឋអាមេរិក នៅតែប្រកាន់ជំហរប្រុងប្រយ័ត្នជានិច្ច នៅលើសេចក្តីជូនដំណឹងរបស់ខ្លួន ដោយយោងតាមសេចក្តីថ្លែងរបស់លោក Chuck Hagel រដ្ឋមន្ត្រីការពារជាតិអាមេរិក ដែលបានបានគូសបញ្ជាក់ថា” អាមេរិកនៅពុំទាន់មានសេចក្តីសម្រេចចិត្តណាមួយនៅឡើយទេក្នុងពេលនេះ”។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
ជាជំហានតូចមួយសំរាប់អាមេរិក តែក៏ប្រហែលជាជំហានដ៏ធំមួយសំរាប់ក្រុមអ្នកប្រឆាំងនៅស៊ីរី។ ការដឹកជញ្ជូនអាវុធទៅឲ្យក្រុមអ្នកបះបោរគឺជារឿងមួយដែលពុំទាន់មានប្រទេសលោកខាងលិចណាមួយ ហ៊ានប្រថុយប្រថានធ្វើតែម្នាក់ឯងនោះឡើយ។
ពីអំណើះទៅ សហរដ្ឋអាមេរិក សន្យាថានឹងបំពាក់អាវុធដល់ក្រុមអ្នកបះបោរស៊ីរី ប៉ុន្តែ អាមេរិកក៏ពុំមែនធ្វើតែម្នាក់ឯងគត់នោះទេ។ ពីព្រោះសេចក្តីសម្រេចចិត្តចុងក្រោយបង្អស់នឹងត្រូវធ្វើឡើងដោយមានការចូលរួមសហការណ៍ពីសំណាក់ដៃគូអឺរ៉ុប។
នេះ ជាការផ្លាស់ប្តូរមួយនៅក្នុងទស្សវិស័យអាមេរិក ប៉ុន្តែ រដ្ឋមន្ត្រីការពារជាតិអាមេរិក លោក Chuck Hagel បានគូសបញ្ជាក់ភ្លាមៗថា” ការជូនដំណឹងរបស់អាមេរិកនេះ ពុំមែនមានន័យថា អាមេរិកចង់បំពាក់អាវុធឲ្យពួកឧទ្ទាមភ្លាមៗនោះឡើយ។
ទោះជាយ៉ាងណាក៏ដោយ ក៏ជំហរថ្មីរបស់អាមេរិកនៅពេលនេះ បានបំផុសឲ្យមានសំណួរជាច្រើនជាពិសេសនៅខណៈពេលដែលសហរដ្ឋអាមេរិក មានការព្រួយបារម្ភខ្លាំងអំពីការប្រើអាវុធគីមី ពីសំណាក់របបស៊ីរី នៅក្នុងសង្គ្រាមជាមួយក្រុមឧទ្ទាម។
សហរដ្ឋអាមេរិកនៅក្នុងសប្តាហ៍នេះ បានប្រកាសថាខ្លួនមានភស្តុតាងជាច្រើន ស្តីពីការប្រើអាវុធគីមីនៅស៊ីរី។ ប៉ុន្តែប្រធានាធិបតីអាមេរិក លោកបារ៉ាក អូបាម៉ា នៅតែមានជំហរប្រុងប្រយ័ត្នខ្ពស់និងសម្រេចចិត្តមិនធ្វើសេចក្តីសន្និដ្ឋាន ណាមួយដោយប្រញាប់ប្រញាល់ឡើយ។
ជំហរថ្មីរបស់វ៉ាស៊ីនតោន ពុំមានលក្ខណៈធំដុំក៏ពិតមែន ប៉ុន្តែ វាបានធ្វើឲ្យអាមេរិកងាកចេញពីក្លឹបអ្នកប្រកែកមិនព្រមបំពាក់អាវុធពួកឧទ្ទាម ឆ្លងចូលមកដល់ក្លឹបអ្នកទីទើរដូចជាប្រទេសបារាំងនិងអង់គ្លេសដែរ។
នៅក្នុងទឹកដីស៊ីរីវិញនៅខណៈដែលការវាយប្រយុទ្ធគ្នារវាងកងទ័ពស៊ីរីនិងពួកឧទ្ទាមនៅតែបន្តនោះ ជាលើកទីមួយដែរ មានការផ្ទុះអាវុធនៅក្នុងក្រុង Banias ដែលភាគច្រើនជាសហគមន៍អ៊ីស្លាម Alaouite របស់លោកប្រធានាធិបតីស៊ីរី Bachar al-Assad កាលពីម្សិលមិញ ។ ការផ្ទុះអាវុធនេះ បានបណ្តាលឲ្យស្លាប់មនុស្សយ៉ាងតិច ៥០នាក់ ហើយនៅថ្ងៃសុក្រនេះ ពួកឧទ្ទាមស៊ីរី បានបរិហារថា ជាការសម្លាប់យ៉ាងរង្គាលនៅក្នុងភូមិមួយរបស់សហគមន៍ភាគតិចស៊ុននីតនៅក្នុងប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ