អាមេរិកសង្ស័យរដ្ឋាភិបាលលោកអាសាដថា បានប្រើអាវុធគីមីសម្លាប់មនុស្សជាថ្មីទៀត
នៅថ្ងៃចន្ទម្សិលមិញ រដ្ឋាភិបាលអាមេរិកបានប្រកាសថា មានវត្ថុធាតុផ្សេងៗអាចថា ជាសារធាតុក្លរ បញ្ជាក់ថា រដ្ឋាភិបាលស៊ីរី បានប្រើប្រាស់អាវុធគីមីមានជាតិតុកស៊ិក សម្លាប់មនុស្សជាថ្មីទៀត ក្នុងខែមេសានេះ នៅក្នុងភូមិមួយ ដែលសំបូរក្រុមឧទ្ទាម និងក្រុមប្រឆាំង។ ការចោទប្រកាន់នេះ ធ្វើឡើងចំពេលរដ្ឋាភិបាលស៊ីរីកំពុងអនុវត្តកិច្ចព្រមព្រៀងក្រុងហ្សឺណែវ ដែលមានទិសដៅកំទេចអាវុធគីមីស៊ីរី អោយបានចប់សព្វគ្រប់នៅថ្ងៃ៣០មិថុនាខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
ម្សិលមិញនេះ សេតវិមានអាមេរិកបានប្រាប់ថា អ្នកជំនាញអាមេរិកបានពិនិត្យសិក្សាលើសារធាតុផ្សេងៗ។ សារធាតុទាំងនោះ អាចជាសារធាតុក្លរ មានជាតិតុកស៊ិក។ អាមេរិកសង្ស័យថា រដ្ឋាភិបាលលោកអាសាដ បានប្រើប្រាស់សារធាតុតុកស៊ិកទាំងនេះ ដើម្បីវាយប្រហារ ក្នុងភូមិ Kafarzita ក្បែរភាគកណ្តាលស៊ីរី ជាភូមិសំបូរក្រុមឧទ្ទាម និងសកម្មជនរបស់ក្រុមប្រឆាំងស៊ីរី។ កាលពីថ្ងៃអាទិត្យ ប្រធានាធិបតីបារាំងបានប្រកាសដែរថា មានសារធាតុខ្លះៗ តែបារាំងគ្មានភស្តុតាងបង្ហាញថា មានការប្រើប្រាស់អាវុធគីមីនៅស៊ីរីទេ។
យោងតាមសម្ព័ន្ធប្រឆាំងស៊ីរី កងទ័ពស៊ីរីប្រហែលជាបានប្រើអាវុធគីមី យ៉ាងហោចក៏៩ដងដែរ តាំងពីដើមឆ្នាំ២០១៤មក ហើយសម្រាប់ខែមេសានេះ កងទ័ពបានវាយប្រហារដោយអាវុធគីមី ដល់ទៅ៦ដង ធ្វើអោយមានមនុស្សស្លាប់ និងរបួសជាង១០នាក់ ដោយសារឈ្លក់ថប់ដង្ហើម។ សម្ព័ន្ធស៊ីរីបន្ថែមថា មានការទំលាក់គ្រាប់បែក ដែលមានទ្រង់ទ្រាយដូចជាប្រេងសាំងបំផ្ទុះ ពោរពេញទៅដោយសារធាតុក្លរ ដែលគេប្រើប្រាស់ក្នុងសម័យសង្គ្រាមលោកលើកទី១នោះ។ សារធាតុតុកស៊ិកនេះ បំផ្លាញផ្លូវដង្ហើម ហើយអាចធ្វើអោយមនុស្សថប់ដង្ហើមស្លាប់បាន។ សម្ព័ន្ធប្រឆាំងស៊ីរីបានសុំអោយអង្គការហាមឃាត់អាវុធគីមី ដែលទទួលបន្ទុកកំទេចអាវុធគីមីនៅស៊ីរីនោះ ធ្វើការស៊ើបអង្កេតបញ្ហានេះ។ ទូរទស្សន៍ផ្លូវការស៊ីរីបានទទួលស្គាល់ថា មានការប្រើប្រាស់សារធាតុបែបនោះ នៅភូមិ Kafar-zita មែន តែបានទំលាក់កំហុសទៅលើក្រុមជីហាដ អាល់ណូស្រា ដែលជាប់ពាក់ព័ន្ធនឹងក្រុមអាល់កៃដា។ រដ្ឋាភិបាលស៊ីរី ធ្លាប់បានចោទក្រុមឧទ្ទាមនេះ ពីបទបានប្រើប្រាស់សារធាតុតុកស៊ិកសារ៉ាំង កាលពីខែសីហា ឆ្នាំមុនដែរ ប៉ុន្តែ អាមេរិក និងបារាំងមិនបានជឿតាមនោះទេ។ គួររំលឹកថា កាលពីខែសីហាឆ្នាំ២០១៣ ជាយក្រុងដាម៉ាសបានរងការវាយប្រហារដោយអាវុធគីមី ជាតិសារ៉ាំង សម្លាប់មនុស្សប្រមាណ១៥០០នាក់។
ដើម្បីចៀសវាងការវាយប្រហារយោធាពីសំណាក់ប្រទេសលោកខាងលិច កាលពីខែកញ្ញាឆ្នាំ២០១៣ រដ្ឋាភិបាលស៊ីរីបានយល់ព្រមកំទេចអាវុធគីមី ក្នុងប្រទេស អោយរួចរាល់នៅដំណាច់ខែមិថុនាខាងមុខនេះ។ ដោយឡែក សារធាតុក្លរដែលអាមេរិកសង្ស័យថា កងទ័ពលោកអាសាដ បានប្រើប្រាស់សម្លាប់មនុស្សក្នុងខែមេសានេះ មិនមានចែងក្នុងបញ្ជីអាវុធគីមីដែលត្រូវកំទេចនៅស៊ីរីទេ។
នៅស៊ីរីដែរ សភាស៊ីរីនិងលោកអាសាដ គ្រោងអោយមានការបោះឆ្នោតប្រធានាធិបតី នៅថ្ងៃ៣មិថុនា ខាងមុខ។ ក្រុមប្រឆាំងស៊ីរី និងប្រទេសលោកខាងលិចបរិហារថា នេះជាឆាកសម្តែងប៉ុណ្ណោះ។ បារាំងលើកឡើងថា លទ្ធផលនៃការបោះឆ្នោតនេះ គ្មានតម្លៃនិងភាពគួរអោយជឿជាក់នោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ