កម្ពុជា-ថៃបន្តសង្គ្រាមសម្តីជុំវិញទីតាំងវត្តកែវសិក្ខាគិរីស្វារៈ
ក្រសួងការបរទេសកម្ពុជាបានធ្វើសេចក្តីថ្លែងការណ៍មួយទៀត នៅថ្ងៃទី១កុម្ភៈនេះ ដើម្បីពន្យល់ និងបង្ហាញភស្តុតាងផ្លូវច្បាប់ទាំងឡាយដែលបញ្ជាក់ថា វត្តកែវសិក្ខាគិរីស្វារៈគឺពិតជាស្ថិតនៅលើដែនអធិបតេយ្យរបស់កម្ពុជាយ៉ាងច្បាស់លាស់។ ទន្ទឹមគ្នានេះដែរ សេចក្តីថ្លែងការណ៍នេះ ក៏ជាឱកាសមួយរបស់កម្ពុជា ក្នុងការបញ្ជាក់ប្រាប់ទៅពិភពលោកថា កម្ពុជាត្រៀមការពារបូរណភាពដែនដីរបស់ខ្លួន ក្នុងពេលដែលនាយករដ្ឋមន្ត្រីថៃគំរាមធ្វើសង្គ្រាមប្រឆាំងកម្ពុជា។
ចុះផ្សាយនៅថ្ងៃ៖
សេចក្តីរាយការណ៍របស់លាង ដឺលុច ពីភ្នំពេញ
ក្នុងរយៈពេលតែ៥ថ្ងៃសោះ កម្ពុជាត្រូវធ្វើសេចក្តីថ្លែងការណ៍រហូតដល់ទៅ២ដង ដើម្បីពន្យល់ប្រាប់រដ្ឋាភិបាលថៃថា វត្តកែវសិក្ខាគិរីស្វារៈ ពិតជាស្ថិតនៅលើបូរណភាពដែនដីកម្ពុជា។ សេចក្តីថ្លែងការណ៍ទីមួយត្រូវបានក្រសួងការបរទេសកម្ពុជាធ្វើឡើង នៅពេលដែលលោកនាយករដ្ឋមន្ត្រីថៃអាប់ភីស៊ីត វេចាជីវ៉ា ស្រែកទាមទារអោយកម្ពុជាដកទង់ជាតិចេញពីវត្តកែវសិក្ខាគិរីស្វារៈ។
កាលពីថ្ងៃចន្ទម្សិលមិញ តាមរយៈសារព័ត៌មាន មន្ត្រីរដ្ឋាភិបាលថៃបានអត្ថាធិប្បាយបន្ទោសកម្ពុជាផងថា កម្ពុជាមិនគួរធ្វើសេចក្តីថ្លែងការណ៍នេះដែលបង្កើតអោយមានបរិយាកាសយល់ច្រឡំ និងប៉ះពាល់ដល់ការចរចា។ រដ្ឋាភិបាលថៃក៏បានធ្វើសេចក្តីថ្លែងការណ៍មួយ កាលពីល្ងាចថ្ងៃចន្ទម្សិលមិញ ប្រាប់អោយកម្ពុជាដកទង់ជាតិកម្ពុជាចេញពីវត្តកែវសិក្ខាគិរីស្វារៈ និងថាអោយកម្ពុជារុះរើវត្តនេះចេញទៀត។ ថៃប្រើភាសានេះ រឹតតែធ្វើអោយកម្ពុជារុលទៅមុខ បន្តស្រែកប្រាប់ថៃថា កម្ពុជាបានដោតទង់ជាតិរបស់ខ្លួននៅក្នុងវត្តដែលត្រូវបានសាងសង់នៅលើទឹកដីខ្លួន។
នៅក្នុងសេចក្តីថ្លែងការណ៍ទី២នេះ ក្រសួងការបរទេសកម្ពុជាបានលើកយកខ្លឹមសារគតិយុត្តលម្អិតជាងសេចក្តីថ្លែងការណ៍ទីមួយមកបង្ហាញ ដែលរួមមានអនុសញ្ញាបារាំង-សៀម១៩០៤ និង១៩០៧ ព្រមទាំងអង្គហេតុយ៉ាងច្រើនរបស់តុលាការយុត្តិធម៌អន្តរជាតិ ឆ្នាំ១៩៦២។ ភស្តុតាងទាំងអស់នេះបញ្ជាក់ថា វត្តកែវសិក្ខាគិរីស្វារៈស្ថិតនៅក្នុងទឹកដីកម្ពុជាយ៉ាងច្បាស់ ស្របតាមច្បាប់។ ក្រសួងការបរទេសបានបញ្ជាក់ថែមទៀតថា កម្ពុជាក៏នឹងមិនផ្លាស់ទីតាំងវត្តនេះទៅទីណាផ្សេងទៀតឡើយ ហើយនឹងបន្តដោតទង់ជាតិនៅលើវត្តនេះ។
ទោះយ៉ាងណាក្តី ក្រសួងការបរទេសកម្ពុជាបានបង្ហាញជំហរដោះស្រាយបញ្ហាដោយសន្តិវិធីជាមួយប្រទេសថៃ តែបានបញ្ជាក់យ៉ាងម៉ឺងម៉ាត់ថា កម្ពុជារក្សាសិទ្ធិការពារអធិបតេយ្យ និងបូរណភាពទឹកដីខ្លួន ក្នុងពេលដែលនាយករដ្ឋមន្ត្រីថៃអាប់ភីស៊ីតបានគំរាមធ្វើសង្គ្រាមប្រឆាំងកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ